អតីតកាលជារឿងកន្លងហួស បើមិនចង់កើតទុក្ខច្រើន គួររៀនដោះលែង

មានមនុស្សមិនតិចនាក់ទេកំពុងឈឺចាប់ ទឹកភ្នែក សោកស្ដាយដោយសារអតីតកាល។ អតីតកាលជារឿងមួយដែល មនុស្សភាគច្រើនពិបាកគ្រវាត់វាចោល ដោយសារអតីតខ្លះមានឥទ្ធិពលលើអ្នកជួបនោះខ្លាំងពេក។ ប៉ុន្តែអ្នកគួរដឹងថា អតីតកាលឈឺចាប់មិនអាចយកមកឡូកឡំជាមួយបច្ចុប្បន្ននោះឡើយ ដូច្នេះ អ្នកគួរតែដោះលែងវាតាមវិធីទាំងនេះ ៖

១. បណ្ដោយឲ្យវាទៅ

បំភ្លេចអ្វីមួយវាមិនមែនងាយស្រួលដូចមាត់ថានោះទេ ប៉ុន្តែត្រូវតែតាំងចិត្តធ្វើឲ្យបានដោយព្រមដោះលែងរឿងកន្លងហួស ឲ្យរសាត់តាមខ្យល់ ទោះបីជាត្រូវលំបាកយ៉ាងណាក៏ដោយ។ កុំសើរើអតីត សូមកប់វាជាមួយនឹងថ្ងៃម្សិលចុះ!

២. បញ្ចេញការឈឺចាប់ចេញក្រៅ

ការឈឺចាប់ដែលធ្លាប់តែលាក់ទុកក្នុងចិត្តតែឯងអស់ពេលជាយូរ គួរតែដល់បញ្ចេញវាចេញមកក្រៅឲ្យអស់នៅពេលនេះ។ អ្នកអាចទៅកន្លែងមួយស្រែកឲ្យអស់ចិត្ត ឬ សរសេរទុក្ខព្រួយលើក្រដាសហើយដាក់ក្នុងដបមួយ រួចបោះទៅក្នុង ទឹកឬដុតវាចោល រួចគិតថា អតីតកាលនឹងទៅតាមដបដែលបោះ ចោលឬកំទេចផេះនោះ ។

៣. កុំចាត់ទុកខ្លួនជាអ្នករងគ្រោះ

ទោះពីមុនអ្នកណាខុស អ្នកណាត្រូវក៏ដោយ ក៏ពេលនេះវាគ្មានន័យអីទៀតដែរ ព្រោះ គ្រប់យ៉ាងបានកើតឡើងរួចទៅ ហើយ ។ អ្វីដែលអាចធ្វើបានគួរតែឈប់ចាត់ទុកខ្លួនឯងជាជនរងគ្រោះ ឬក៏បន្ទោសគេតទៀត គួរតែឲ្យ វារលាយរលត់ទៅ។

៤. ផ្ដោតលើបច្ចុប្បន្នដែលកំពុងមាន

ល្មមដល់ពេលដែលអ្នកបោះអតីតចោលហើយ ឈប់រស់នៅជាមួយវាបើអ្នកនៅតែស្ពាយវាជាប់ខ្លួន តើថ្ងៃណា អាច ចេញផុតពីផ្ទៃពណ៌ខ្មៅនោះបាន? អ្នកគួរតែប្រើពេលវេលាដែលរីករាយជាមួយអ្វីដែលអ្នកកំពុងមានដោយស្រឡាញ់និង ថែរក្សាអ្វីដែលមាននៅចំពោះមុខ។

៥. លើកលែងទោសឲ្យខ្លួនឯងនិងអ្នកដទៃ

ការលើកលែងទោសគឺជាវិធីមួយដែលជួយឲ្យផ្លូវចិត្តអាចស្ងប់បាន។ បើគេធ្វើខុសអ្នកអភ័យទោសឲ្យគេចុះ ហើយបើ អ្នកជាអ្នកខុស អ្នកក៏គួរអភ័យទោសឲ្យខ្លួនឯងដែរ។ ការធ្វើបែបនេះ អាចជួយឲ្យធូរស្រាលផ្លូវចិត្ត ព្រោះ អ្នកលែងជាប់ ជំពាក់ជាមួយនឹងនរណា និងអាចគេចចេញពីអតីតកាលបានថែមទៀត ៕

ប្រែសម្រួល៖ សន្យា

ប្រភព៖ THECONVERSATION

ចុចអាន៖ លាហើយ Comfort Zone ព្រោះខ្ញុំត្រូវការរីកចម្រើនឆ្ពោះទៅមុខ

ចុចអាន៖ ៥ យ៉ាង ជួយបំបាត់អារម្មណ៍ឯកាពេលយើងនៅផ្ទះម្នាក់ឯងយូរពេក