តារាសម្តែងស្រីជើងចាស់ ១០ រូបស៊ីថ្លៃខ្ពស់បំផុតប្រចាំប្រទេសចិន

ជាធម្មតា តារាល្បីមុខតែស៊ីថ្លៃខ្ពស់ណាស់នៅក្នុងការសម្ដែងម្ដងៗមិនថា ភាពយន្តខ្នាតធំ ឬរឿងភាគឡើយ។ ប៉ុន្តែតម្លៃនោះថ្លៃប៉ុនណា គ្នាយើងខ្លះប្រហែលមិនទាន់ដឹងនោះទេ។ ដូច្នេះអត្ថបទនេះនឹងបង្ហាញមុខតារាសម្ដែងស្រីរបស់ប្រទេសចិនដែលរកចំណូលបានខ្ពស់ជាងគេទាំង ១០ រូបក្នុងឆ្នាំ ២០២១ ។

១០. នាង Zhou Xun

Zhou Xun ជាតារាស្រីដើរដែលមានប្រជាប្រិយបំផុតនៅក្នុងរឿងភាគទូរទស្សន៍ជាច្រើន។ ក្រៅពីសម្ដែងនាងរកប្រាក់បានតាមរយៈការថតស្ពតពាណិជ្ជកម្មផ្សេងៗ។ Zhou Xun ក៏ជាម្ចាស់ស្ទូឌីយោមួយ និងធ្លាប់បានបោះពុម្ពសៀវភៅលក់ទៀតផង។ មួយរឿងៗនាងទទួលបានចំណូលយ៉ាងតិច ១៥​ លានយ័ន (ប្រហែល ២,៣១៤,៦៧២ ដុល្លារអាមេរិក) ។

៩. នាង Shu Qi

តារាសម្តែងតៃវ៉ាន់ Shu Qi ទទួលបានប្រជាប្រិយរាប់សិបឆ្នាំមកហើយ តាមរយៈខ្សែភាពយន្តបែបហុងកុងជាច្រើនរឿង។ នាងជារាជនីសិចស៊ីនៅក្នុងប្រទេស និងជាតារាស្រីដ៏ល្បីឈ្មោះក្នុងឆាកអន្តរជាតិ។ គិតត្រឹមឆ្នាំ ២០២១ ផលិតករត្រូវចំណាយយ៉ាងហោច ២៩ លានយ័ន ( ប្រហែល ​៤,៤៧៥,២៣៩ ដុល្លារអាមេរិក) សម្រាប់ Shu Qi សម្ដែងមួយរឿង។

៨. នាង Liu Xiaoqing

Liu Xiaoqing ជាតារាសម្តែងចំណាស់ជាងគេនៅក្នុងបញ្ជីតារាស្រីស៊ីថ្លៃខ្ពស់បំផុត។ នាងក្លាយជាតារាសម្តែងដ៏ល្បីល្បាញនៅក្នុងប្រទេសចិនតាំងពីទសវត្សឆ្នាំ ១៩៨០ មកម្ល៉េះ។ ទោះបីនាងមិននៅក្មេងទៀតក៏ដោយ តែនាងនៅតែចូលរួមសម្ដែងកុនធំៗ និងរឿងភាគទូរទស្សន៍ដូចពីមុន។ តារាស្រីវ័យជ្រេរូបនេះ រកចំណូលបាន ៣២ លានយ័ន (ប្រហែល ៤,៩៣៨,១១៨ ដុល្លារអាមេរិក) ។

៧. នាង Ruby Lin

តារាសម្តែងតៃវ៉ាន់ Ruby Lin បានក្លាយជាតួឯកស្រីល្បីឈ្មោះដំបូងនៅក្នុងរឿងភាគទូរទស្សន៍ Princess Pearl ។ ក្រោយឆ្នាំ ២០០៩ នាងបានបង្កើតស្ទូឌីយោផ្ទាល់ខ្លួនមួយដែលអាចរកប្រាក់បានខ្ពស់គួរសម ហើយបច្ចុប្បន្ននាងក៏នៅតែសម្ដែងរឿងភាគទូរទស្សន៍ផ្សេងៗផងដែរ។ Ruby Lin ត្រូវបានប្រភពទម្លាយថារកចំណូលបាន ៤៥ លានយ័ន (ប្រហែល ៦,៩៤៤,៤៤៥ ដុល្លារអាមេរិក) ។

៦. នាង Zhao Wei

Zhao Wei ឬច្រចៀកកាំ ដែលត្រូវបានមហាជនស្គាល់យ៉ាងច្បាស់និងគាំទ្រតាមរយៈភាពយន្តរឿង ព្រះនាងយ៉េយ៉េ ក្នុងឆ្នាំ ១៩៩៨។ ក្នុងឆ្នាំ ២០១៣ នាងបានដឹកនាំការសម្តែងភាពយន្តដំបូងរបស់ខ្លួនគឺរឿង So Young ដែលរកចំណូលបានជាង ៧០០ លានយ័ន។ តាមរយៈភាពល្បីល្បាញនេះ ​ក្នុងមួយរឿង Zhao Wei អាចរកស៊ីថ្លៃបាន ៥៦ លានយ័ន (៨,៦៤២,១១០ ដុល្លារអាមេរិក) ។

៥. នាង Cecilia Cheung

នាងចាប់ផ្តើមមានភាពល្បីល្បាញដំបូងតាមរយៈខ្សែភាពយន្តរឿង “King of Comedy”. ដែលដើរតួជាមួយទិនហ្វី (Stephen Chow) ក្នុងឆ្នាំ ១៩៩៩ ។ បន្ទាប់ពីនោះមក Cecilia Cheung កាន់តែរីកចម្រើនទាំងក្នុងអាជីពសម្ដែង និងចម្រៀង។ ប្រជាប្រិយភាពរបស់នាង អាចឱ្យនាងរកចំណូលបានយ៉ាងតិច ៧៥ លានយ័ន (ប្រហែល​ ១១,៥៧៣,១៨២)។

៤. នាង Carina Lau

ប្រាក់ចំណូលនៃការសម្តែងរបស់ Carina Lau ត្រូវបានគេដឹងថានាងស៊ីថ្លៃប្រហែល ៩០ លានយ័ន (១៣, ៨៨៦,១០០ ដុល្លារអាមេរិក)។ បច្ចុប្បន្ន Carina Lau មិនសូវសម្ដែងប៉ុន្មានទេ ដោយសារនាងមានជំនួញនៅក្នុងដៃច្រើន។

៣. នាង Gong Li

Gong Li ក្លាយជាតារាសម្ដែងមានកេរ្តិ៍ឈ្មោះពាសពេញពិភពលោកតាមរយៈខ្សែភាពយន្ត Holly Wood ល្បីៗជាច្រើនរឿង។ នាងជានិមិត្តរូបម្នាក់នៃប្រទេសដែលបាននាំយកកុនចិនទៅកាន់ទីផ្សារឧស្សាហកម្មភាពយន្តនៅអឺរ៉ុប និងសហរដ្ឋអាមេរិក។ ទោះបីវ័យជ្រេ អាយុ ៥៨ ឆ្នាំហើយក្ដី តែ Gong Li បានទទួលចំណូលក្នុងមួយរឿងយ៉ាងហោច ៩០ លានយ័ន (១៣, ៨៨៦,១០០ ដុល្លារអាមេរិក) ។

២. នាង Maggie Cheung

Maggie Cheung ជាតារាសម្តែងហុងកុងដ៏ល្បីល្បាញម្នាក់នៅក្នុងប្រទេសចិន។ នាងធ្លាប់បង្ហាញខ្លួននៅក្នុងខ្សែភាពយន្តជាង ៧០ រឿងចាប់តាំងពីឆ្នាំ ១៩៨៣ នៃការប្រឡូកសិល្បៈ។ Maggie Cheung ជាតារាស្រីអាស៊ីដំបូងគេដែលឈ្នះរង្វាន់នៅមហោស្រពភាពយន្ត Cannes Film Festival។ មកទល់នឹងឆ្នាំ ២០២១ នាងជាតារាសម្ដែងដែលមានតម្លៃខ្លួន ១១០ លានយ័ន (១៦,៩៧២,៩៥៦ ដុល្លារអាមេរិក) ក្នុងមួយរឿង។

១. នាង Zhang Ziyi

Zhang Ziyi មិនត្រឹមតែជាតារាសម្តែងភាពយន្តចិនប៉ុណ្ណោះទេ នាក៏ជាតារាស្រីល្បីនៅលើពិភពលោកផងដែរ។ Zhang Ziyi សាងកេរ្តិ៍ឈ្មោះរន្ទឺជាដំបូងតាមរយៈការដើរតួក្នុងខ្សែភាពយន្តដែលទទួលពានរង្វាន់អូស្ការគឺរឿង Crouching Tiger, Hidden Dragon ឆ្នាំ ២០០០។ តាមប្រភពពីកាសែត ChinaWhisper បានឱ្យដឹងថា តារាស្រីជើងចាស់រូបនេះ ស៊ីថ្លៃយ៉ាងហោច ១២០ លានយ័ន (ប្រហែល ១៨,៥២៣,៣៨០ ដុល្លារអាមេរិក) ៕

ប្រែសម្រួល៖ សន្យា

ប្រភព៖ China Whisper

ចុចអាន៖ តារាចម្រៀង ១០ រូបមានទ្រព្យសម្បត្តិច្រើនជាងគេបំផុត ប្រចាំឆ្នាំ ២០២១

ចុចអាន៖ រឿងគួរឱ្យចាប់អារម្មណ៍ទាំង៧ ពីតារាស្រី Liu Yifei តួអង្គ Mulan