កំពូលលេសទាំង ៤ មនុស្សមិនចង់សន្សំប្រាក់ តែងតែប្រើជានិច្ច

សន្សំប្រាក់ជាវិធីសាស្ត្របន្សល់លុយកាក់ទុកប្រើប្រាស់រាល់ពេលមានតម្រូវការបន្ទាន់ ឬដើម្បីសម្រេចបំណងទិញអចលនទ្រព្យណាមួយ។ ការសន្សំ​ប្រាក់​តិច ​ឬច្រើន​អាស្រ័យ​ទៅលើ​ទំហំចំណូល​ដែល​​រកបាន និងភាពប៉ិនប្រសប់នៃការចាយវាយ​របស់​មនុស្ស​ម្នាក់ៗ។

ត្រង់ណេះ កម្ពុជាថ្មី មិនសំដៅដល់អ្នកជួបការលំបាកខ្លាំង ដែលមានសមត្ថភាពផ្គត់ផ្គង់តម្រូវការត្រឹមតែមួយថ្ងៃៗនោះទេ។ ផ្ទុយទៅវិញ អ្នកខ្លះមានចំណូលសមរម្យ តែរកបានមកមិនដែលចេះសល់យ៉ាងម៉េចសោះ នោះក៏ដោយសារពួកគេមានលេសមួយចំនួនមិនព្រមកែ។

 ១. ខ្ញុំត្រូវការ​ចំណាយច្រើន

ពេលខ្លះ ពាក្យថា “ខ្ញុំត្រូវការ​ចំណាយច្រើន” ប្រើគ្រាន់តែដើម្បីដោះសារប៉ុណ្ណោះ ដែលតាម​ពិតទៅ​អ្នក​គ្រាន់តែ​ចង់​បាន​ មិនមានភាពចាំបាច់អ្វីឡើយ។ កែបាន គួរកែ! ទម្លាប់ចំណាយលុយតាមការនឹកឃើញ រួចនិយាយថាជាតម្រូវការ។ ប្រហែលវាអាចជាតម្រូវការពិតមែន តែក៏ប្រហែលជាតម្រូវការមិនសំខាន់។ ដូច្នេះ បើមិនបញ្ឈប់ប្រើលេសនេះទេ ទោះខំរកដប់ម្ភៃឆ្នាំទៀត ក៏មិនសល់លុយនឹងគេដែរ។

២. ខ្ញុំមានចំណូលតិចណាស់

នរណាៗក៏ត្រូវការចំណាយរាល់ថ្ងៃដែរ! ហេតុអីអ្នកខ្លះគេមានចំណូលប្រហាក់ប្រហែលឬតិចជាងយើងផង តែគេមានលុយសន្សំ? បើចង់សន្សំពិត ទោះលុយតិចក៏អាចដកពីរបីម៉ឺនរៀលទុកបានដែរ។ កុំចេះតែថា ​រកបានប្រាក់តិច មិនដឹងសន្សំបែបណា គឺដកបន្តិចហ្នឹងហើយ សម្រាប់សន្សំនោះ។

៣. ខ្ញុំយឺត​ពេលក្នុងការសន្សំ​ហើយ

ពាក្យថា សន្សំប្រាក់នេះណា៎ នឹង​មិន​ដែល​យឺត​ពេល​ឡើយ។ អ្នកខ្លះនិយាយថា ខ្ញុំរៀបការហើយ ពិបាកសន្សំលុយណាស់! ខ្លះទៀតថា ខ្លួនកំពុងបណ្ដាក់ទុនរកស៊ីជាដើម ដែលនាំឱ្យការសន្សំជួបការលំបាក ឬជាពេលមិនសក្តិសមសម្រាប់សន្សំ។ល។ ទាំងនេះសុទ្ធតែជាលេសទាំងអស់!

៤. ខ្ញុំមាន​អាជីពល្អនិងប្រាក់ចំណូល​រឹងមាំ

គ្មានការងារណាឋិតឋេរជារៀងរហូតទេ។ វិបត្តិសង្គម ជំងឺរាតត្បាត និងបញ្ហាដទៃទៀត នឹងនាំឱ្យអ្នកប្រឈមជាមួយគ្រោះថ្នាក់ហិរញ្ញវត្ថុនៅថ្ងៃណាមួយ។

បើអ្នកពឹង​ផ្អែក​លើ​ការងារ​ខ្លាំងពេក ពេលវិបត្តិមកដល់ សេដ្ឋកិច្ចផ្ទាល់ខ្លួនឬគ្រួសាររបស់អ្នក ប្រាកដជាធីងធោង ហើយអាចឈានទៅដល់ការជំពាក់បំណុលជុំទិស៕

ប្រែសម្រួល៖ សន្យា

ប្រភព៖ Lifehack

ចុចអាន៖ អ្នក​ពូកែ​សន្សំ​ប្រាក់តែង​ប្រើ​វិធី​នេះ​ពេល​ដើរ​ទិញ​ទំនិញ

ចុចអាន៖ ចេះគិត ចេះចាយ ចេះសន្សំ ដូច​ខាង​ក្រោមនេះ​ អ្នកនឹងក្លាយជាអ្នកមាន