KPT+

ដុសធ្មេញរាល់ថ្ងៃ ដឹងអត់ថាគួរប្ដូរច្រាសដុសធ្មេញ នៅពេលណា?

បានផុស

៥ years មុន

នៅ

ថ្ងៃពុធ ១០ វិច្ឆិកា ២០២១

ដោយ

ការថែទាំសុខភាពមាត់ធ្មេញ ជារឿងសំខាន់មួយដែលគ្នាយើងគួរយកចិត្តទុកដាក់ ព្រោះថា បើមិនដូច្នោះទេ នឹងអាចប្រឈមទៅនឹងអាការឈឺធ្មេញ ឬជំងឺមាត់ធ្មេញមួយចំនួន។ ជាមួយគ្នានោះ ការប្រើប្រាស់ច្រាសដុសធ្មេញ ជាចំណែកមួយសំខាន់នៃសុខភាពមាត់ធ្មេញ។ ដូចនេះ សមាគមទន្តពេទ្យសហរដ្ឋអាមេរិក ក៏បានណែនាំនូវរបៀបប្រើប្រាស់ច្រាសដុសធ្មេញ និងវិធីទុកដាក់ច្រាសដុសធ្មេញត្រឹមត្រូវ ដើម្បីសុខភាពមាត់ធ្មេញល្អប្រសើរចៀសផុតពីជំងឺផ្សេងៗដូចខាងក្រោម៖

១.ផ្លាស់ប្តូរក្នុងរយៈពេល៣-៤ខែម្តង

ក្រុមគ្រូពេទ្យធ្មេញ បានណែនាំថា រយៈពេលប្រើប្រាស់ច្រាសដុសធ្មេញយ៉ាងយូរត្រឹមបី ទៅបួនខែ គួរប្តូរចេញទោះបីច្រាសនៅមានសភាពល្អក៏ដោយ ព្រោះថាច្រាសដុសធ្មេញប្រើកាន់តែយូរថ្ងៃ ប្រសិទ្ធភាពរបស់វាកាន់តែថយទៅៗតាមហ្នឹងដែរ។ ម្យ៉ាងទៀត យើងក៏គួរគប្បីប្តូរច្រាសថ្មីផងដែរ ករណីដែលយើងមានជំងឺក្អក ផ្តាសាយជាប់យូរ ព្រោះមេរោគពីជំងឺនោះ អាចតោងជាប់សរសៃច្រាសនាំឱ្យយើងកើតជំងឺម្តងទៀត។

២.ផ្លាស់ប្តូរពេលសរសៃច្រាសដុសធ្មេញសឹករិចរិល

ពេលខ្លះ ច្រាសដុសធ្មេញរបស់យើងអាចសឹករិចរិលមុនរយៈពេលនៃការណែនាំរបស់ក្រុមទន្តពេទ្យ ពោលគឺរយៈពេលបីខែ។ ដូច្នេះ យើងក៏គួរប្តូរវាចេញដែរ ព្រោះថាកន្លែងសឹករិចរិលនោះ គឺមិនអាចសម្អាតដល់ធ្មេញឱ្យបានស្អាតល្អឡើយ ហើយក៏ពុំសូវមានប្រសិទ្ធភាពកម្ចាត់បាក់តេរីបានល្អទៅតាមនោះដែរ។

នៅមុនពេលដុសសម្អាតធ្មេញ ដើម្បីឱ្យប្រាកដថាច្រាសដុសធ្មេញពុំមានបាក់តេរី យើងគួរលាងសម្អាតវាឱ្យបានស្អាតមុនប្រើ និងក្រោយប្រើរួចគប្បីលាងសម្អាតច្រាសដុសធ្មេញផងដែរ និងទុកដាក់កន្លែងមានខ្យល់ចេញចូល (ចៀសវាងទុកក្នុងប្រអប់ ឬបំពង់បិទជិត)។ ធ្វើដូចនេះ វាជួយឱ្យសុខភាពមាត់ធ្មេញចៀសពីបញ្ហាមួយចំនួនដែលបង្កដោយមេរោគ។

ជាមួយគ្នានេះ យើងគួរដុសធ្មេញជាប្រចាំ ពីពីរទៅបីដងក្នុងមួយថ្ងៃជាមួយសរសៃច្រាសទន់។ គួរជ្រើសរើសទំហំ និងទ្រង់ទ្រាយច្រាសសមល្មមនឹងមាត់របស់យើង ដែលអាចសម្អាតសព្វទីកន្លែងក្នុងមាត់បាន៕

អត្ថបទផ្ដល់ដោយ៖ Hello Krupet

ចុចអាន៖ស្ងួតមាត់ក្រោយភ្ញាក់ពីគេង តាមពិត មកពីមូលហេតុទាំងនេះ

ចុចអាន៖របៀបទប់ទល់ និងកម្ចាត់ជំងឺមាត់ធ្មេញឧស្សាហ៍កើត ៥ ប្រភេទ