បើមិនចង់ខូចមុខ កុំប្រើគ្រឿងសម្អាងដែលផ្ទុកគ្រឿងផ្សំ ៦ នេះ ជាមួយគ្នាឲ្យសោះ

ការជ្រើសរើសផលិតផលយកមកប្រើប្រាស់នៅលើស្បែក ត្រូវតែជាការជ្រើសរើសដ៏ម៉ត់ចត់បំផុត អ្នកគប្បីពិនិត្យទាំងការវេចខ្ចប់ ប្រភព ជាពិសេសគ្រឿងផ្សំដែលមាននៅលើសំបក ឬប្រអប់ជាដើម។ ពេលខ្លះមិនមែនឲ្យតែប្រតិកម្មសុទ្ធតែជារបស់មិនល្អនោះទេ ប្រហែលមកពីយើងប្រើមិនត្រូវ ឬប្រហែសលាយគ្រឿងផ្សំទាំងនេះចូលគ្នាក៏មិនដឹង៖

១. Retinoid ឬ Retinol និង Alpha Hydroxy Acid ឬ AHAs

គ្រឿងផ្សំទាំងនេះមានតួនាទីពន្លឿនការផ្លាស់ប្តូរកោសិកាស្បែក និងបង្កើនការផលិតកូឡាជែនឲ្យស្បែកភ្លឺថ្លា គ្មានភាពជ្រីវជ្រួញ អញ្ជឹងបើប្រើលើសកំណត់គឺមិនល្អនោះទេ ព្រោះវាអាចធ្វើឲ្យស្បែកស្ដើង ងាយប្រតិកម្ម ឬឡើងរោល។

២. Retinoid ឬ Retinol និង Benzoyl Peroxide

សារធាតុ Retinoids ត្រូវបានគេស្គាល់ថា ជាសារធាតុប្រឆាំងភាពចាស់ ប៉ុន្តែវាក៏ជាកម្លាំងដ៏ខ្លាំងក្លាមួយក្នុងការបំបាត់មុនផងដែរ ដោយសារពួកវាជួយជម្រុះស្បែកដើម្បីការពាររន្ធញើសដែលជាប់។ Benzoyl peroxide អាចធ្វើឱ្យអសកម្មនៃម៉ូលេគុល retinoid។

៣. Retinoid ឬ Retinol និង វីតាមីន C

វីតាមីន C មានប្រសិទ្ធភាពបំផុតនៅក្នុងបរិស្ថាន pH ដែលមានជាតិអាស៊ីត។ Retinol ដំណើរការក្នុង pH ខ្ពស់ (អាល់កាឡាំងកាន់តែច្រើន) ។ បើ​ប្រើ​វា​ជាមួយ​គ្នា វាគ្មានប្រសិទ្ធិភាពទេ អាចនឹងរោលមុខទៀតផង។ អ្នកគួរប្រើ Retinol នៅពេលយប់ ហើយវីតាមីន C នៅពេលថ្ងៃ។

៤.  Retinoid ឬ Retinol និង Salicylic Acid

ដោយសារតែគ្រឿងផ្សំទាំងពីរអាចធ្វើឲ្យស្បែកស្ងួត និងប្រឆាំងការកើតមុនដូចគ្នា បើលាយគ្នាក្នុងពេលតែមួយស្បែកប្រាកដជារលាកជាមិនខានឡើយ។ អ្នកអាចប្ដូរមកប្រើ Retinoid ឬ Retinol ពេលយប់ និង Salicylic Acidពេលថ្ងៃវីញ។

៥. សាប៊ូលាងមុខ និង វីតាមីន C

មិនមែនហ្វូមលាងមុខទេណា សាប៊ូនេះគឺសំដៅទៅលើសាប៊ូដែលផលិតពីសូលុយស្យុងអាល់កាឡាំងខ្លាំងដូចជា សូដ្យូមអ៊ីដ្រុកស៊ីត ខ្លាញ់ធម្មជាតិ និងប្រេង។ ការប្រើសាប៊ូដែលមានជាតិអាស៊ីតខ្ពស់ដែលមាន pH ខ្ពស់នឹងកាត់បន្ថយសមត្ថភាពស្រូបយកវីតាមីន C របស់ស្បែក។

៦. ផលិតផលពីរដែលមាននាទីដូចគ្នា

មុននឹងប្រើប្រាស់សូមពិនិត្យមើលគ្រឿងផ្សំឲ្យច្បាស់ បើអ្នកប្រើប្រាស់ផលិតផលពីរមានសកម្មភាពដូចគ្នា មុខរបស់អ្នកប្រហែលទទួលយកមិនបាននាំឲ្យមានការរលាក និងស្ដើង។

ដូច្នេះហើយ បើអ្នកប្រើប្រាស់ផលិតផលមិនឃើញប្រសិទ្ធិភាព ឬរោលរលាកប្រហែលមកពីអ្នកលាយគ្រឿងទាំងលើនេះចូលគ្នាដោយមិនបានដឹងជាមុនហើយ សូមពិភាក្សាជាមួយពេទ្យសើស្បែក ពេលមានបញ្ហាកើតឡើង ជៀសវាងប្រឹក្សានឹងអ្នកលក់គ្រឿងសម្អាងគ្មានជំនាញច្បាស់លាស់៕

ប្រែសម្រួល៖ វារី

ចុចអាន៖មកដឹងកាន់តែច្បាស់ ពីប្រភេទឡេការពារម្ដៅថ្ងៃ ឲ្យត្រូវនឹងផ្ទៃមុខ

ចុចអាន៖គ្រឿងសម្អាង និងទឹកអប់មានអាយុកាលផុតកំណត់ ប្រើមិនប្រយ័ត្នអាចមានគ្រោះថ្នាក់