កម្រងជីវិត៖ ដូនវ័យ ៨៣ឆ្នាំ ស៊ូដើរលក់ផ្លិតក្រោមកម្ដៅថ្ងៃ មិនលើកដៃដើរសុំទាន

ក្រោមកម្ដៅសូរ្យសែងហួតហែងនារដូងប្រាំង ខណៈមនុស្សម្នានាំគ្នាចូលជ្រកម្លប់ ដែលសូម្បីតែដំណើររង់ចាំភ្លើងស្តុប ក៏រកឈប់នៅក្រោមម្លប់ឈើ ប៉ុន្តែប្លែកអីតែស្ដ្រីវ័យចំណាស់មួយរូប ជួតក្បាលក្រមា មានអំរែកផ្លិតស្លឹកត្នោតលើស្មា នៅបន្តចរយាត្រាទៅមុខយ៉ាងស្មាហាប់ស្វែងរកអតិថិជនតាមដងវិថីនានាក្នុងរាជធានីភ្នំពេញ។ ពេលឃើញដូនចាស់ ពិតណាស់ ធ្វើឱ្យយើងនឹកឃើញដល់ម្ដាយ ឬជីដូនរបស់យើង ដែលវេលាដូចគ្នានេះ ពួកគាត់កំពុងនៅផ្ទះ មានកូនចៅនៅបម្រើមើលថែ ឬក៏កំពុងរក្សាឧបោសថសីលនៅទីអារាម ឬបូជនីដ្ឋាននានា។

ឆ្លើយដោយសម្ដីមួយៗ តូចឆ្មារ តែច្បាស់ ស្ត្រីចំណាស់រូបនេះបានឱ្យដឹងថា ដូនមានឈ្មោះ ម៉ៅ សាមួន ជាស្ត្រីមេម៉ាយ តាំងពីសម័យ ប៉ុល ពត ទីលំនៅបច្ចុប្បន្ននៅ ស្រុកស្វាយអន្ទរ ខេត្តស្វាយរៀង មានវ័យ ៨៣ឆ្នាំ។​ គ្រាន់តែលឺតួលេខអាយុដូន ធ្វើឱ្យយើងនឹកដល់សមាជិកគ្រួសារខ្លួនដែលអ្នកខ្លះមានវ័យខ្ទង់ ៥០ ៦០ឆ្នាំ ក៏ហាក់ទារុញទារា ដើរទ្រីមទ្រោម ទប់ខ្លួនសឹងមិននឹងទៅហើយ។

តើកូនចៅលោកយាយនៅឯណា? លោកយាយចាស់ហើយ ហេតុអ្វីមិនឱ្យកូនចៅចិញ្ចឹម?

ខ្ញុំមានកូនប្រុស២នាក់​ កូនច្បងមកគិតដល់ឥឡូវអាយុ៦៥ឆ្នាំ តែបានស្លាប់បាត់ហើយ ឯកូនប្រុសពៅ អាយុ ៥៣ឆ្នាំ គេមានគ្រួសាររស់នៅស្រុកឆ្ងាយ។ សុំទានគេ មិនថោកទាបទេ កុំឱ្យតែយើង លួចប្លន់ បោកប្រាស់គេ តែខ្ញុំមិនដើរសុំទានគេទេ ខ្ញុំនៅមានកម្លាំង នៅរកបាន ចេះតែរកទៀតទៅ ដើម្បីបានលុយធ្វើបុណ្យ ទៅវត្តខ្លួនឯង។

លោកយាយដើរលក់ផ្លិតរាល់ថ្ងៃហត់ទេ? មានចុករោយស្រពន់ដៃជើងទេ?

វាស៊ាំទៅហើយ។ ខែធ្វើស្រី ខ្ញុំធ្វើស្រែ ពេលច្រូតស្រូវហើយ ទំនេរពីធ្វើស្រែ ខ្ញុំដើរលក់ផ្លិតស្លឹកត្នោតនៅភ្នំពេញ។ បើហត់ ហើយក្ដៅខ្លាំងរកឈប់ជ្រកម្លប់ ហើយបើចុករោង ច្របាច់ប្របល់លាបប្រេងកូឡាខ្លួនឯងទៅ។

លោកយាយមកលក់ម្ដង មានរយៈពេលប៉ុន្មានថ្ងៃ? ចំណេញប្រហែលប៉ុន្មាន? យាយដេរខ្លួនឯង មែនទេ?

មកម្ដង ២ ៣ថ្ងៃ ដើរលក់ហើយ មកស្នាក់នៅមុខផ្ទះគេ នៅច្បារអំពៅ ម្ចាស់ផ្ទះគេអត់ថាអីទេ។ បើកាត់ថ្លៃឈ្នួលឡាន ៣៥ ០០០ [ រៀសល] ចំណេញបានជាង ១២ ម៉ឺន [ រៀសល]។ ផ្លិតហ្នឹងគឺខ្ញុំទិញពីគេទេ ផ្លិតមួយតម្លៃ ៣០០០ [ រៀសល] លក់វិញ មួយ ៤០០០ [ រៀសល]។

ក្រសួង​សង្គមកិច្ច អតីតយុទ្ធជន និង​យុវនីតិសម្បទា បាន​បង្កើត​មជ្ឈមណ្ឌល​គាំពារ​មនុស្ស​ចាស់ ដើម្បី​ធ្វើការ​បណ្តុះបណ្តាល​ធនធាន​មនុស្ស​សម្រាប់​ថែទាំ​មនុស្ស​ចាស់​។ ប៉ុន្តែការបង្កើត​មជ្ឈមណ្ឌល​នេះ មិន​មាន​គោលដៅ​​ចិញ្ចឹម​មនុស្ស​ចាស់​ទេ​។ រដ្ឋាភិបាល​មិនទាន់បង្កើត​មជ្ឈមណ្ឌល​ចិញ្ចឹម​មនុស្ស​ចាស់​ទេ ខណៈកម្ពុជាមាន​មជ្ឈមណ្ឌល​ជាច្រើន ហើយ​និន្នាការ​របស់​អង្គការសហប្រជាជាតិ គឺ​មិន​ចង់ឱ្យ​បង្កើត​មណ្ឌល​មនុស្សចាស់​។ ប៉ុន្តែ​ក្រសួង​សង្គមកិច្ច អតីតយុទ្ធជន និង​យុវនីតិសម្បទា ក៏ដូចជា​រដ្ឋាភិបាល ជំរុញ​ឱ្យ​វិស័យ​ឯកជន ឬក៏​ដៃគូរ​អភិវឌ្ឍន៍ ចូលរួម​បង្កើត​មជ្ឈមណ្ឌល​ថែទាំ​មនុស្ស​ចាស់​​។ បច្ចុប្បន្ន ក្រសួង​សង្គមកិច្ច អតីតយុទ្ធជន និង​យុវនីតិសម្បទា កំពុង​បន្ត​អនុវត្ត​គោលនយោបាយ​ជាតិ​ស្ដីពី​ មនុស្ស​វ័យចាស់ ឆ្នាំ​២០១៧ ដល់ ២០៣០ ឱ្យមាន​លក្ខណៈ​ល្អប្រសើរ។ ​ជាមួយគ្នានេះ ក្រសួង​សង្គមកិច្ច បាន​បង្កើត​សមាគម​មនុស្ស​ចាស់​ចំនួន​ ១ ៦៤៦​ ឃុំ សង្កាត់ នៅក្នុង​រាជធានី ខេត្ត​ទូទាំងប្រទេស សំដៅ​ជួយ​ដោះស្រាយ​ការលំបាក​របស់​មនុស្ស​វ័យចាស់ និង​ជួយ​គ្នា​ទៅវិញទៅមក​។

នៅ​ឆ្នាំ ២០១៥ ប្រជាជន​វ័យចាស់ ក្នុងប្រទេស​កម្ពុជា​ដែលមាន​អាយុ​ចាប់ពី ៦០ ឆ្នាំ​ឡើង មាន​ចំនួន ១,៣ លាន​នាក់ ឬ​ស្មើនឹង ៨, ៣ ភាគរយ​នៃ​ប្រជាជន​សរុប ហើយ​ចំនួន​នេះ នឹង​កើន​ឡើងដល់ ១១,០១ ភាគរយ នៅ​ឆ្នាំ ២០៣០ ព្រមទាំង​កើនឡើង​ដល់ ២១ ភាគរយ នៅ​ឆ្នាំ ២០៥០​៕

អត្ថបទ៖ ច័ន្ទ វីរៈ