KPT+
ពីសិស្សក្រីក្រទទួលអំណោយ ក្លាយជាអ្នកដឹកនាំការចែកអំណោយសិស្សជាង ១០០ ក្រុម
“អ្វីដែលយើងរំពឹងនោះ គឺប្អូនៗក្មួយៗ ប្រមាណ ៤០០នាក់ ដែលយើងជួយជារៀងរាល់ឆ្នាំនៅទឹកដីជីផាតនេះ ហោចណាស់ ១០នាក់យ៉ាងតិច អាចបន្តការសិក្សាថ្នាក់ឧត្តម។ វាអាចគ្រាន់ជាសុបិន្តមួយ តែគ្មានអ្វីដែលមិនអាចទៅរួច ប្រសិនទឹកចិត្ត ឆន្ទៈ ក្រោមគោលដៅរួមតែមួយ”។
នេះជាការលើកឡើងរបស់ លោក ឯម ស៊ីដា សម្រាប់ទិវាកុមារ ឆ្នាំ២០២២ ដែលលោកគឺជាអ្នកដឹកនាំកម្មវិធី “១ មិថុនា ទំពាំងខ្ញុំ” ធ្វើសកម្មភាពសប្បុរសធម៌ជួយសម្រួលការខ្វះខាត និងផ្ដល់សម្ភារៈសិក្សា អាហារូបត្ថម្ភ សម្ភារៈអនាម័យ ដល់សិស្សានុសិស្សនៅតំបន់ដាច់ស្រយាលជាង ១០០ ទីតាំង។ ក្នុងនោះចំពោះលោកផ្ទាល់ លោកបានកំណត់ទីតាំង និងគោលដៅជាក់លាក់ ក្នុងការជួយសិស្សានុសិស្ស ជិត ៤០០ នាក់ ទាំង២សាលាបឋមសិក្សា នៅ ឃុំជីផាត ស្រុកថ្មបាំង ខេត្តកោះកុង។
លោក ឯម ស៊ីដា បានរម្លឹកពីអតីតកាលរបស់ខ្លួនថា ក្រោមប្រទេសជាតិមានសុខសន្តិភាព គ្រួសាររបស់បានចាកចេញពីជំរុំទល់ដែន មករស់នៅជាយរាជធានីភ្នំពេញ ដែលកាលណោះ ជម្ពូវ័ន្ត ជាតំបន់ពោរពេញដោយវាលស្រែនៅឡើយ។ ដំណាក់កាលចាប់ផ្ដើមសាងជីវិតថ្មីលើទឹកដីកំណើត គ្រួសាររបស់លោកមានជីវភាពមិនប្រសើរឡើយ ដោយសូម្បីតែ លោកជាកុមារ ក៏ដើរស៊ីឈ្នួលដក ស្ទូង ច្រូតស្រូវឱ្យគេ ដើម្បីបានថវិកាខ្លះមកដោះស្រាយជីវភាពគ្រួសារ និងយកមកសិក្សា។
លោក ឯម ស៊ីដា បានឱ្យដឹងបន្ថែមថា៖ “ឥឡូវខ្ញុំរៀនចប់ មានការងារ និងជីវភាពល្អប្រសើរហើយ តែខ្ញុំនៅចងចាំកាលនៅរៀន ខ្ញុំធ្លាប់ទទួលបានអំណោយ សម្ភារៈសិក្សាពីសប្បុរសជន ខ្ញុំមានអារម្មណ៍រំភើប និងរីករាយខ្លាំង។ ខ្ញុំគិតថា បើខ្ញុំធំឡើង ខ្ញុំអាចចែកអំណោយ ឬសម្ភារៈសិក្សាដល់សិស្សដទៃ មិនដឹងល្អយ៉ាងណា ហើយពួកគេគឺពិតជាត្រេកអរខ្លាំងដូចខ្ញុំហើយ”។
បុរសវ័យ ៣១ ឆ្នាំរូបនេះ ធ្លាប់ចូលរួមកម្មវិធីសប្បុរសធម៌មួយចំនួនជាមួយក្រុមដទៃជាបន្តបន្ទាប់ ហើយលោកបានចាប់ផ្ដើម ដាក់គោលដៅ នៅសាលាតំបន់ដាច់ស្រយាល នៃសហគមន៍ជីផាត គ្រាដែលលោកបានមកកម្សាន្តនៅទីនោះ។
លោក ឯម ស៊ីដា បញ្ជាក់ថា៖ “ពីមុន យើងគ្រាន់តែជួយពីមួយកន្លែង ទៅមួយកន្លែង។ ក្រោយមក ខ្ញុំក៏ដាក់គោលដៅ ទីតាំងមួយឱ្យជាក់លាក់ ដើម្បី តាមដាន និងចង់ឃើញផ្លែផ្កាពិតប្រាកដនៃការជួយនោះ តើសិស្សនៅតំបន់ដាច់ស្រយាលនេះអាចបន្តសិក្សាដល់ថ្នាក់ណា និងតើនៅជួបបញ្ហាអ្វីខ្លះ? តែខ្ញុំតាំងចិត្តថា នឹងជួយទំនុកបំរុងសិស្សនៅតំបន់ជីផាត ឱ្យដល់ចូលរៀននៅសាកលវិទ្យាល័យ”។
ក្រៅពីដាក់គោលដៅជួយសិស្សានុសិស្សនៅតំបន់ជីផាត លោកក៏បានបណ្ដុះយុវជន និងមិត្តភក្ដិបងប្អូនជាង ១០០នាក់ទៀត ឱ្យដឹកនាំសកម្មភាពសប្បុរសធម៌នេះ នៅតាមខេត្តកំណើត និងតំបន់ដែលពួកគេចាប់អារម្មណ៍ចង់ជួយ។
លោក ឯម ស៊ីដា លើកឡើងថា៖ “អ្វីដែលខ្ញុំចង់ធ្វើ គឺមិនមែនមានតែខ្ញុំទេ គឺបណ្ដុះទឹកចិត្តយុវជនដទៃទៀត ឱ្យបែកខ្ញែកកាន់តែច្រើនចូលរួមធ្វើសកម្មភាពជួយសង្គម ឬជួយអ្នកជុំវិញខ្លួន អ្នករស់នៅខេត្តរបស់ខ្លួន និងជួយជនរួមជាតិ តាមលទ្ធភាពនៃការខំប្រឹងរបស់ពួកគេ ក្រៅពីការសិក្សា ការងារ និងជំនួញរកស៊ីប្រចាំថ្ងៃ”។
ស្វាមី និងជាឪពុករបស់កូនស្រី វ័យ៤ឆ្នាំរូបនេះ បញ្ជាក់ថា ជំនួយសម្រាប់ជួយ និងផ្ដល់ជូនសិស្សានុសិស្ស និងលោកគ្រូ អ្នកគ្រូ កន្លងមក គឺបានពីការបរិច្ចាគផ្ទាល់របស់លោក និងគ្រួសារ ព្រមទាំងការស្នើជំនួយពីក្រុមហ៊ុនផលិតផលនានា រួមទាំងការចូលរួមបរិច្ចាគតាមសទ្ធា និងលទ្ធភាពរបស់ញាតិមិត្ត និងមហាជន ដែលបានស្គាល់ក្រុមរបស់លោក និងអ្នកឃើញការបង្ហោះតាមបណ្ដាញសង្គម។
គួរបញ្ជាក់ថា ក្នុងទិវាសិទ្ធិកុមារអន្តរជាតិ ឆ្នាំ២០២២ នេះ ជាលើកទី៧ហើយ ដែលលោក ឯម ស៊ីដា បានដឹកនាំក្រុមធ្វើសកម្មភាពសប្បុរសធម៌នេះ នៅតំបន់ជីផាត។ ថ្វីដ្បិតអស់រយៈកាលប្រមាណ២ឆ្នាំកន្លងមកនេះ ការជួបជុំផ្សេងៗត្រូវបានខកខាន ប៉ុន្តែលោកក៏បានទៅជួបប្អូនៗសិស្សានុសិស្សលក្ខណៈទ្រង់ទ្រាយតូច ក្នុងស្ថានភាពប្រុងប្រយ័ត្នបំផុតលើហានិភ័យនៃការរីករាលដាលជំងឺឆ្លងកូវីដ-១៩៕
អត្ថបទ៖ ច័ន្ទ វីរៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៧ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»