ការសិក្សា៖ មនុស្សមានក្លិនខ្លួនលេចធ្លោ ងាយទាក់ទាញសត្វមូសជាងគេ

យោងតាមការសិក្សាថ្មីបានឲ្យដឹងថា សត្វមូសបឺតឈាមរើសមនុស្សដូចយើងហូបអាហារដែរ វាមិនបឺតឈាមមនុស្សគ្រប់គ្នាដែលវាឃើញនោះទេ គឺមូសជ្រើសយកតែមនុស្សមានក្លិនលេចធ្លោប៉ុណ្ណោះ ។

ក្រុមអ្នកវិទ្យាសាស្ត្រមកពីវិទ្យាស្ថានស្រាវជ្រាវជំងឺគ្រុនចាញ់ Johns Hopkins Bloomberg និង Macha Research Trust នៅប្រទេសសំប៊ី បានរួមដៃគ្នាធ្វើការពិសោធន៍មួយនៅស្រុក Choma ទៅលើអ្នកស្ម័គ្រចិត្ត ៦ នាក់ ដោយលែងមូស ២០០ ក្បាលដែលកំពុងឃ្លានខ្លាំង គឺមូសអាហ្វ្រិកប្រភេទ Anopheles gambiae ។

ក្នុងដំណើរការពិសោធន៍ អ្នកវិទ្យាសាស្ត្របានបំពាក់ជាមួយកាមេរ៉ា Infrared ដើម្បីសង្កេតមើលក្លិនដែលទាក់ទាញមូស ហើយលទ្ធផលបង្ហាញថាមូសចូលចិត្តហោះសំដៅទៅកាន់អ្នកបញ្ចេញអាស៊ីដ carboxylic (សមាសធាតុធម្មជាតិដែលផលិតដោយមីក្រុបស្បែក) ច្រើនជាងគេ ។

ជាមួយគ្នានេះដែរ ការពិសោធន៍បានរកឃើញលក្ខណៈពិសេសនៃអ្នកស្ម័គ្រចិត្តម្នាក់ គាត់បង្ហាញលទ្ធផលអំពីការទាក់ទាញមូសតិចជាងគេបំផុតព្រោះការបរិភោគរុក្ខជាតិម្យ៉ាងមានវត្តមាន eucalyptol (សមាសធាតុមាននៅក្នុងប្រេង ជី និងគ្រឿងទេស) ក្នុងកម្រិតខ្ពស់គួរឲ្យកត់សម្គាល់ ។

យ៉ាងណាអ្នកស្រាវជ្រាវនឹងព្យាយាមសិក្សាបន្ថែមទៀតទៅលើការប្រមាញ់របស់មូសចំពោះមនុស្ស ដើម្បីចំណេះដឹងថ្មីៗដែលអាចផ្ដល់ប្រយោជន៍សម្រាប់ការរស់នៅរបស់យើងទាំងអស់គ្នាជារៀងរាល់ថ្ងៃ ៕

ប្រភព ៖ sputnik

ចុចអាន ៖ ការសិក្សារកឃើញថា ហិតក្លិនញើសគ្នា អាចជួយព្យាបាលជំងឺថប់បារម្ភ