ស្រោមខ្នើយមិនបោកមួយសប្ដាហ៍ មានបាក់តេរីច្រើនជាងបង្គន់ដល់ទៅ ១៧០០០ ដង

បើអ្នកមិនទាន់បោកស្រោមខ្នើយចាប់ពីមួយសប្ដាហ៍ឡើងទៅ អ្នកកំពុងតែគេងនៅលើបាក់តេរីច្រើនជាងបង្គន់ដល់ទៅ ១៧០០០ ដងឯណោះ ។

លទ្ធផលនេះបានមកពីការពិសោធន៍ដោយយកសំណាកពីខ្នើយមិនទាន់បោក ហើយដាក់ក្នុងកែវ ៧ ថ្ងៃ ដើម្បីបង្ហាញបាក់តេរីដែលអាចប៉ះពាល់ស្បែក ឬបង្កទៅជាបញ្ហាផ្សេងៗ ។

ការសិក្សាបានបង្ហាញថាមនុស្សទូទៅប្ដូរស្រោមខ្នើយ ២៤ ថ្ងៃម្ដង ទោះបីពេទ្យសើស្បែកណែនាំឲ្យប្ដូរស្រោមខ្នើយ ២ ដងក្នុងមួយសប្ដាហ៍ក៏ដោយ ។

វេជ្ជបណ្ឌិត Hadley King មកពីមហាវិទ្យាល័យវេជ្ជសាស្ត្រ Weill នៃសាកលវិទ្យាល័យ Cornell មានប្រសាសន៍ថា មនុស្សជម្រុះកោសិកាចាស់ៗដាក់ស្រោមខ្នើយ ៥០ លានកោសិកាក្នុងមួយថ្ងៃ បូករួមទាំងញើស គ្រឿងសម្អាង ប្រេងលាបសក់ និងរបស់ជាប់ពីក្រៅថែមទៀត ដែលជាអាហារសម្រាប់សត្វល្អិត ជាពិសេសទាក់ទាញឲ្យវានៅលើពូករបស់អ្នក ។ អ្នកស្រី King បន្ថែមថា គេងនៅលើស្រោមខ្នើយដដែលរយៈពេលមួយសប្ដាហ៍ពេញបង្កទៅជាអាឡ័កស៊ី បញ្ហាស្បែក និងរលាកស្បែក ។

យោងតាមការពិសោធន៍បានបង្ហាញថា មានបាក់តេរីពីរប្រភេទសំខាន់ៗនៅលើស្រោមខ្នើយគឺ bacilli បង្ក​ឱ្យ​មាន​ការ​ឆ្លង​មេរោគ​លើ​ភ្នែក ​ជំងឺ​ទឹក​នោម​ផ្អែម រលាក​សួត រលាក​ស្រោមខួរ និង​ការ​ឆ្លង​មេរោគ​តាម​ប្រព័ន្ធសាច់ដុំឆ្អឹង​ជាដើម ហើយបាក់តេរីមួយទៀតគឺ gram-positive cocci ជាមេរោគដែលស៊ាំនឹងថ្នាំអង់ទីប៊ីយ៉ូទីក ។

ទាំងនេះហើយជាចម្លើយសម្រាប់អ្នកងើបឡើងដោយមានស្នាមខាំនៅមុខ រមាស់ស្បែក និង រលាកស្បែក ដោយគ្មានមូលហេតុ ៕

ប្រែសម្រួល៖ វារី

ប្រភព៖ dailymail

ចុចអាន៖ គ្រោះថ្នាក់កម្រិតណា បើអត់ឧស្សាហ៍សម្អាតកន្លែងគេង?