អាជ្ញាធរ និងភ្នាក់ងារអនាម័យចូលរួមសម្អាតបរិស្ថាន ដើម្បីលើកកម្ពស់អនាម័យ និងសោភណ្ឌភាពក្នុងតំបន់

ភ្នាក់ងារអនាម័យរួមនិងអាជ្ញាធរ តាមសង្កាត់នៃខណ្ឌសែនសុខ បានចូលរួមអនុវត្តសកម្មភាពសម្អាតបរិស្ថាន និងប្រមូលសំរាមនៅតាមតំបន់សាធារណៈ កាលពីព្រឹកថ្ងៃទី១៦ ខែមីនា ឆ្នាំ២០២៦ ដើម្បីធានាបាននូវអនាម័យបរិស្ថាន សោភណ្ឌភាព និងផាសុខភាពក្នុងសហគមន៍។

ក្នុងសកម្មភាពនេះ ភ្នាក់ងារអនាម័យបានធ្វើការសំអាតសំរាមតាមផ្លូវបេតុង ក្នុងភូមិរោងចក្រ សង្កាត់គោកឃ្លាង ខណៈដែលក្រុមការងារក៏បានបន្តសម្អាតអនាម័យតាមបណ្តោយប្រឡាយបារាំង ស្ថិតក្នុងភូមិទ្រុងមាន់ សង្កាត់អូរបែកក្អម ដើម្បីបំបាត់សំរាម និងកាត់បន្ថយបញ្ហាបរិស្ថានដែលអាចប៉ះពាល់ដល់សុខភាពប្រជាពលរដ្ឋ។

ជាមួយគ្នានេះដែរ ភ្នាក់ងារក្រុមហ៊ុន 800 Super ក៏បានចូលរួមបោសសំអាត និងរើសសំរាមតាមកំណាត់វិថី លេខ ១០១៩ ខាងមុខសាលាបឋមសិក្សាភ្នំពេញថ្មី ដោយធ្វើការប្រមូលសំរាម និងសម្អាតផ្លូវ ដើម្បីធ្វើអោយបរិស្ថាននៅតំបន់នោះមានភាពស្អាត និងមានសណ្តាប់ធ្នាប់ល្អប្រសើរឡើង។

សូមបញ្ជាក់ថា សកម្មភាពខាងលើ គឺជាការចូលរួមយ៉ាងសកម្មរបស់អាជ្ញាធរ និងភ្នាក់ងារពាក់ព័ន្ធ ក្នុងការថែរក្សាបរិស្ថាន និងលើកកម្ពស់អនាម័យសាធារណៈ ដែលជាចំណែកសំខាន់ក្នុងការកសាងសហគមន៍ស្អាត មានរបៀបរៀបរយ។

អាជ្ញាធរ សូមអំពាវនាវដល់បងប្អូនប្រជាពលរដ្ឋទាំងអស់ ចូលរួមសហការជាមួយអាជ្ញាធរ និងក្រុមការងារអនាម័យ ដោយទុកដាក់វេចខ្ចប់សំរាមអោយបានត្រឹមត្រូវ និងបញ្ចេញសំរាមតាមម៉ោងដែលបានកំណត់។ ការអនុវត្តបែបនេះ នឹងជួយថែរក្សាអនាម័យបរិស្ថាន សោភណ្ឌភាពទីក្រុង និងផ្តល់នូវផាសុខភាពក្នុងការរស់នៅរបស់សហគមន៍យើងទាំងអស់គ្នា៕ អត្ថបទ៖សំណាង