Suga សមាជិកក្រុម BTS ត្រូវបានប៉ូលីសប្រទះឃើញ ស្រវឹងដេកដី ហើយកំពុងត្រូវបានស៊ើបអង្កេតករណីបើកបរខុសច្បាប់

កាលពីថ្មីៗនេះ ផ្ទុះព័ត៌មាន ករណី Suga ដែលជាសមាជិកក្រុម BTS កំពុងតែត្រូវបាន ប៉ូលីស ធ្វើការស៊ើបអង្កេតពាក់ព័ន្ធករណីបើកបរក្នុងស្ថានភាពស្រវឹង។ យោងតាមប្រភពព័ត៌មានពី Yonhap News បានឲ្យដឹងថា តារាប្រុសរូបនេះ បានប្រើប្រាស់ យានជំនិះអគ្គិសនី ឬគេហៅថា Electric Scooter បន្ទាប់ពី​ចេញពីកន្លែងផឹកស៊ី ដោយបានទទួលទានគ្រឿងស្រវឹង។

នៅក្នុងនោះ ប៉ូលីសនៅតំបន់ Yongsan បានកំពុងតែធ្វើការស៊ើបអង្កេតយ៉ាងម៉ត់ចត់ ក្នុងករណីរបស់ Suga ដែលបានបំពានខុសនឹងច្បាប់ចរាចរណ៍។ នៅប្រទេសកូរ៉េខាងត្បូង ម៉ូតូអគ្គិសនី ដែលគេស្គាល់ថាជាស្កូតទ័រអគ្គិសនី គឺមានសម្រាប់ជួលតែក្នុងករណីសម្រាប់អ្នកដែលមានអាជ្ញាប័ណ្ណប៉ុណ្ណោះ។ ដោយសារអត្រានៃការបង្កគ្រោះថ្នាក់ ត្រូវបានត្រួតពិនិត្យយ៉ាងតឹងរ៉ឹង ហើយត្រូវបានចាត់ទុកដោយច្បាប់ចរាចរណ៍ស្រដៀងនឹងការបើកបររថយន្តផងដែរ។

យោងតាមប៉ូលីស បានឲ្យដឹងថា Suga ត្រូវបានគេប្រទះឃើញដេកដួលនៅលើដងផ្លូវម្នាក់ឯង នៅយប់ថ្ងៃទី 6 ខែសីហា ឆ្នាំ 2024 បន្ទាប់ពីបានធ្វើសកម្មភាពបើកបរម៉ូតូអគ្គិសនី បន្ទាប់ពីផឹកស្រា។ ប៉ូលិស​ដែល​ដើរ​ល្បាត​ក្បែរ​នោះ​បាន​ចុះ​ទៅ​ជួយ​តារាប្រុសរូបនេះ ហើយ​បាន​ប្រាប់ឲ្យដឹងថា មានក្លិនស្រាយ៉ាងខ្លាំង។

បច្ចុប្បន្ននេះ Suga កំពុងបម្រើពេលវេលារបស់លោកនៅក្នុងជួរយោធាជាភ្នាក់ងារសេវាកម្មសង្គម ដែលជាធម្មតាដំណើរការតាមកាលវិភាគពីម៉ោង ៩ព្រឹក ដល់ ម៉ោង៦ ល្ងាច ហើយលោកអាចត្រឡប់ទៅផ្ទះវិញបាន។ យ៉ាងណាមិញ ផលិតកម្ម HYBE មិន​ទាន់​ចេញ​សេចក្តី​ថ្លែងការណ៍​អំពី​បញ្ហា​នេះ​នៅ​ឡើយ​ទេ៕