ស្ដេច​​ក្មេងបំផុត​ក្នុង​ប្រវត្តិសាស្ត្រ​ វៀតណាម សោយ​រាជ្យ​ក្នុងព្រះជន្ម​ជាង ១ វស្សា តែសុគតនៅ ១៧ ឆ្នាំក្រោយ

ស្តេចដំបូងបំផុតដែលបានឡើងសោយរាជ្យក្នុងប្រវត្តិសាស្ត្ររបស់វៀតណាម នៅពេលទ្រង់មានព្រះជន្មជាង ១ ឆ្នាំបានបង្កើតនូវ​ប្រវត្តិសាស្ត្រ​ក្នុងប្រទេស ហើយទ្រង់ក៏ត្រូវបានគេសរសើរថា​ ជាក្សត្រមានប្រាជ្ញាដ៏កម្រមួយអង្គផងដែរ។​ ប៉ុន្តែទ្រង់បានសុគតនៅក្នុងព្រះជន្ម១៨វស្សា។

ស្ដេច Lê Nhân Tông ប្រសូត​ក្នុង​ឆ្នាំ ១៤៤១ ដោយមាន​រហស្សនាម​ថា Le Bang Co ជា​បុត្រ​របស់​ស្ដេច Le Thai Tong និងមហេសី Nguyen Thi Anh។ យ៉ាងណា នៅ​ព្រះជន្ម​មួយ​ព្រះ​វស្សា ទ្រង់​ត្រូវ​បាន​គេ​តែងតាំង​ជា​ព្រះ​មហាក្សត្រ​ ក្នុងពេលដែលបិតាទ្រង់ស្រាប់តែសោយទិវង្គតភ្លាមៗនៅថ្ងៃទី ៤ ខែសីហា ឆ្នាំ ១៤៤២។ ​ដោយមានការគាំទ្រពីមន្ត្រីធំៗនិងជាបុគ្គលមានឥទ្ធិពលក្នុងប្រទេសដូចជា Trịnh Khả, Lê Thụ និង Nguyen Xi​ បួនខែក្រោយមក ទ្រង់ត្រូវបាននាំមកសោយរាជ្យក្នុងព្រះជន្មអាត្រឹមតែ១ ឆ្នាំ ៦ ខែប៉ុណ្ណោះ។ ព្រះអង្គ​បាន​ក្លាយជា​ស្តេច​ដំបូង​បំផុត​ដែល​ឡើង​សោយរាជ្យ​ក្នុង​ប្រវត្តិសាស្ត្រ​វៀតណាម និង​ជា​អធិរាជ​ទី​បី​នៃ​រាជវង្ស Le នៃ Dai Viet ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងព្រះជន្មដែល​មិន​ទាន់​អាច​និយាយ​បាន ព្រះអង្គក៏​មិន​អាច​ជួយ​ប្រទេស​បាន​ដែរ។ កិច្ចការ​ជាតិ​សំខាន់ៗ​នា​ពេល​នេះ​ត្រូវ​បាន​គ្រប់​គ្រង​ដោយមាតាទ្រងគឺ​ម្ចាស់​ក្សត្រី ង្វៀន ធីអាញ់ ព្រមទាំងមានការគាំត្រយ៉ាងពេញទំហឹងពីសំណាក់មន្រ្តីក្នុងរាជវាំងផងដែរ។ ក្រោយមក នៅពេលដែលស្ដេច Le Bang Co មានព្រះជន្ម ១២ វស្សា ទ្រង់បានកាន់អំណាចជាផ្លូវការនៅក្នុងដៃ ហើយបានមើលការខុសត្រូវផ្នែកនយោបាយ ខណៈដែលព្រះមហាក្សត្រិយានីដែលជាមាតាបានចូលនិវត្តន៍។

នៅក្នុងសៀវភៅប្រវត្តិសាស្ត្រ ស្តេច Le Nhan Tong គឺជាបុរសមានគុណធម៌ ដែលឲ្យតម្លៃទៅលើលទ្ធិខុងជឺ ចេះស្តាប់ដំបូន្មាន និងមិនប្រមឹកស្រា។ នៅពេលនោះ ដាយវៀតមានការអភិវឌ្ឍន៍ខ្លាំង សេដ្ឋកិច្ច និងការអប់រំមានភាពត្រចះត្រចង់។ ជាងនេះទៅទៀត នៅក្រោមរជ្ជកាលរបស់ទ្រង់ ប្រទេសរបស់វៀតណាមក៏បានវាយដណ្តើមឈ្នះស្តេចចាម្ប៉ាហើយបានបញ្ចូលទឹកដី Bon Man ចូលទៅក្នុងដាយវៀតផងដែរ។

ព្រះមហាក្សត្រក៏ត្រូវបានប្រជាពលរដ្ឋសរសើរថាស្រឡាញ់ប្រជាជនយ៉ាងខ្លាំង កាត់បន្ថយថ្លៃឈ្នួលផ្ទះ និងពន្ធជាប្រចាំ ផ្តល់រង្វាន់ដល់មន្ត្រីរាជការ និងលុបបំបាត់ចោរឆក់ និងភាពវឹកវរក្នុងបក្ស។ សូម្បី​តែ​វីរបុរស​ដែល​ត្រូវ​បាន​គេ​ប្រហារ​ជីវិត​ពី​មុន​ក៏​ដោយ ព្រះរាជា​ក៏​បាន​ចេញ​ព្រះរាជក្រឹត្យ​សរសើរ​ពី​គុណ​សម្បត្តិ​របស់​ពួកគេ និង​ប្រគល់​ទ្រព្យ​សម្បត្តិ និង​ដី​ធ្លី​ជូន​កូនចៅ​វិញ។

ព្រះមហាក្សត្រ Le Nhan Tong គឺជាអ្នកប្រាជ្ញដ៏កម្រម្នាក់ក្នុងប្រវត្តិសាស្ត្រវៀតណាម។ ទ្រង់ជាស្តេចដែលមានទេពកោសល្យ និងគុណធម៌ដ៏ល្អឥតខ្ចោះ ហើយមានប្រជាប្រិយភាពយ៉ាងខ្លាំងពីប្រជាជន ប៉ុន្តែជា​អកុសល ស្តេច​អង្គនេះបាន​សោយ​ទិវង្គត​ភ្លាមៗ​ ដោយ​សារ​សត្រូវលបធ្វើគុត។​​ នៅឆ្នាំ ១៤៥៩ ការបះបោរបានកើតឡើង Lang Son Vuong ឬ Le Nghi Dan (ព្រះអនុជដែលមានមាតាផ្សេងគ្នា) បានសម្លាប់ស្តេចដើម្បីដណ្តើមរាជ្យ។ ហេតុការណ៍​នេះ​បាន​ធ្វើ​ឲ្យ​មន្ត្រីរាជការ និង​យោធា និង​ប្រជាពលរដ្ឋ​មានការ​ខឹងសម្បារ​យ៉ាង​ខ្លាំង​។ ពេល​ទ្រង់​ត្រូវ​គេ​ធ្វើគត ស្ដេច Le Nhan Tong មាន​ព្រះជន្ម ១៨ ព្រះវស្សា​ប៉ុណ្ណោះ។ មួយថ្ងៃក្រោយមក ម្ចាស់ក្សត្រី ង្វៀន ធីអាញ់ ក៏ត្រូវបានគេធ្វើឃាត ហើយសោយទិវង្គតក្នុងព្រះជន្ម ៣៨ ព្រះវស្សា៕

អត្ថបទ៖ សាង ស្រីល័ក្ខ