ព័ត៌មានជាតិ

ពលរដ្ឋសង្កាត់ស្ទឹងមានជ័យទី ១ សាទរពេលទទួលបានផ្លូវបេតុងថ្មី ១ ខ្សែ ងាយស្រួលធ្វើដំណើរ

បានផុស

៩ ខែ មុន

នៅ

ថ្ងៃអង្គារ ២៨ តុលា ២០២៥

ដោយ

ប្រជាពលរដ្ឋជាច្រើនគ្រួសារ នាំគ្នាសាទរចំពោះការយកចិត្តទុកដាក់ពីអាជ្ញាធរមូលដ្ឋានដែលធ្វើការចាក់បេតុងផ្លូវចំនួន ១ ខ្សែ បង្កភាពងាយស្រួលដល់អ្នកធ្វើដំណើរ ព្រោះកន្លងមកមានជង្ហុកសំបុកមាន់ជាច្រើន ថែមទាំងដក់ទឹកទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងទីតាំងផ្លូវកំពុងធ្វើការចាក់បេតុងនេះស្ថិតនៅភូមិមានជ័យ ១ ភូមិមានជ័យ ២ និង ភូមិថ្មី សង្កាត់ស្ទឹងមានជ័យទី ១ ខណ្ឌមានជ័យ រាជធានីភ្នំពេញ។

លោក ផល្លា ជាប្រជាពលរដ្ឋ បានសម្ដែងក្ដីសប្បាយរីករាយ និងថ្លែងអំណរអរគុណដល់អាជ្ញាធរមូលដ្ឋាន ក៏ដូចជាអាជ្ញាធរជំនាញពាក់ព័ន្ធ ដែលដោះស្រាយការលំបាករបស់ប្រជាពលរដ្ឋ ប្រែក្លាយកំណាត់ផ្លូវជាផ្លូវបេតុង ជូនដល់ពួកគាត់ និងអ្នកធ្វើដំណើរងាយស្រួលក្នុងការធ្វើដំណើរ។

លោក ផល្លា លើកឡើងថា កន្លងមក កំណាត់ផ្លូវខាងលើនេះ ដែលមានប្រវែងតែប៉ុន្មានម៉ែត្រតែប៉ុណ្ណោះ ចាប់ផ្ដើមកើតមានជង្ហុក ថែមទាំងដក់ទឹក ពិបាកពេលដែលធ្វើដំណើរ សាចទឹកប្រឡាក់អ្នកធ្វើដំណើរជាដើម។

លោក ជា សារ៉េត ចៅសង្កាត់ស្ទឹងមានជ័យ ១ បានឲ្យកម្ពុជាថ្មីដឹងថា ទីតាំងការដ្ឋានកំពុងស្ថាបនាចាក់ផ្លូវបេតុងថ្មីនេះ អាជ្ញាធរសង្កាត់ បានប្រើប្រាស់ថវិកាអភិវឌ្ឍន៍ឆ្នាំ ២០២៥ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋប្រើប្រាស់ប្រចាំថ្ង។ អាជ្ញាធរ បានប្រើប្រាស់ថវិកាអភិវឌ្ឍន៍ឆ្នាំ ២០២៥ លើគម្រោងស្ថាបនាផ្លូវបេតុងនេះមានប្រវែង ២៥៧ ម៉ែត្រ ទទឹង ៥ ម៉ែត្រ ក្នុងមូលដ្ឋានសង្កាត់៕

អត្ថបទ ៖ ម៉េង