សម្ដេច​ ហ៊ុន សែន ជំរុញវិនិយោគិនជប៉ុនបង្កើនការវិនិយោគថែមទៀតលើការកែច្នៃផលិតផលកសិកម្ម

សម្តេចតេជោ ហ៊ុន សែន ប្រធានព្រឹទ្ធសភា នៅព្រឹកថ្ងៃទី១០ ខែវិច្ឆិកា ឆ្នាំ២០២៥នេះ បានទទួលជួបពិភាក្សាការងារជាមួយលោក TAKAHASHI Fumiaki ប្រធានសមាគមជប៉ុន-កម្ពុជា នៅវិមាន៧មករា។ ក្នុងជំនួបជាមួយប្រតិភូដែលសុទ្ធសឹងជាអ្នកវិនិយោគជប៉ុននោះ សម្ដេចតេជោ បានជំរុញឱ្យមានការបង្កើនការវិនិយោគបន្ថែមទៀតពីក្រុមហ៊ុនជប៉ុនលើការកែច្នៃផលិតផលកសិកម្មនៅកម្ពុជា។

ការជំរុញបែបនេះរបស់សម្ដេចតេជោ ជាការឆ្លើយតបនឹងលោក TAKAHASHI Fumiaki ដែលបានលើកឡើងពីការចាប់អារម្មណ៍ខ្លាំងពីអ្នកវិនិយោគជប៉ុន ក្នុងការស្វែងរកឱកាសវិនិយោគលើវិស័យនានាក្នុងប្រទេសកម្ពុជា។ តាមការគូសរំលេចពីលោក TAKAHASHI Fumiaki វត្តមានគណៈប្រតិភូដែលមកកម្ពុជាពេលនេះ គឺមានក្រុមហ៊ុនប្រមាណ៣៦ ក្រុមហ៊ុន ដែលក្រុមហ៊ុនជប៉ុនទាំងនោះភាគច្រើនទាក់ទងនឹងវិស័យបច្ចេកវិទ្យា បណ្ដុះបណ្ដាលវិជ្ជាជីវៈ កសិឧស្សាហកម្ម ជាដើម។

សម្ដេចតេជោ បានបង្ហាញនូវការពេញចិត្តចំពោះអ្នកវិនិយោគជប៉ុន ដែលបានចាប់អារម្មណ៍លើវិស័យកសិឧស្សាហកម្ម និងបច្ចេកវិទ្យានៅកម្ពុជា។ សម្ដេចតេជោ បានគូសបញ្ជាក់ទៅកាន់ប្រតិភូវិនិយោគជប៉ុន ថា កសិឧស្សាហកម្ម ជាចំណុចស្នូលមួយរបស់រដ្ឋាភិបាលកម្ពុជា រាប់តាំងពីដើមរៀងមក រហូតមកដល់រដ្ឋាភិបាលថ្មីពេលនេះ ដឹកនាំដោយសម្ដេចធិបតី ហ៊ុន ម៉ាណែត ក៏ចាត់ទុកកសិឧស្សាហកម្ម ពោលគឺការកែច្នៃនូវផលិតផលកសិកម្មនេះ គឺជារឿងចាំបាច់ និងអាទិភាព។ ខណៈបច្ចេកវិទ្យា ក៏ជាវិស័យដែលរដ្ឋាភិបាលកំពុងផ្ដោតការយកចិត្តទុកដាក់ជាអាទិភាព។

ក្នុងន័យនេះ តាមអ្នកនាំពាក្យព្រឹទ្ធសភា លោក ជា ធីរិទ្ធ ថ្លែងឱ្យដឹងក្រោយជំនួបថា សម្ដេចតេជោ ហ៊ុន សែន បានជំរុញអ្នកវិនិយោគជប៉ុនឱ្យពង្រីកសក្តានុពលវិនិយោគលើវិស័យកសិឧស្សាហកម្ម និងបច្ចេកវិទ្យា កាន់តែកើនឡើងបន្ថែមទៀត ស្របនឹងតម្រូវការវិនិយោគរបស់កម្ពុជាលើវិស័យទាំងពីរនេះ។

បន្ថែមពីកសិឧស្សាហកម្ម និងបច្ចេកវិទ្យា សម្ដេចតេជោ ក៏បានលើកឡើងពីវឌ្ឍនភាពរបស់សមាគមជប៉ុន-កម្ពុជា ដែលបានខិតខំប្រឹងប្រឹងតភ្ជាប់ទំនាក់ទំនងប្រទេសទាំងពីរ ជាពិសេសការបណ្ដុះបណ្ដាលជំនាញវិជ្ជាជីវៈបន្ថែមដល់ប្រជាជនកម្ពុជា ដែលក្នុងនោះយុវជនតែម្ដង។ ការបណ្ដុះបណ្ដាលជំនាញវិជ្ជាជីវៈ សម្ដេចតេជោ ចាត់ទុកថា ជាជំនាញតម្រូវការទាំងក្នុងបរិបទប្រទេសកម្ពុជា ក៏ដូចជាបរិបទប្រទេសជប៉ុន ហើយជាចំណែកនៃការជំរុញផ្នែកសេដ្ឋកិច្ចដ៏សំខាន់ផងដែរ៕

ដោយ៖ ធឿន វ៉ាន់សុង