បណ្ដេញជនជាតិវៀតណាម៥៧នាក់ពីកម្ពុជា ពាក់ព័ន្ធករណីឆបោកតាមអនឡាញ និងប្រើប្រាស់គ្រឿងញៀន

សមត្ថកិច្ចកម្ពុជា បានបន្តបណ្ដេញចេញពីកម្ពុជានូវជនជាតិវៀតណាមចំនួន ៥៧នាក់ ក្រោយរកឃើញថា អ្នកទាំងនោះបានលួចឆ្លងដែនខុសច្បាប់ចូលកម្ពុជា ហើយបានប្រព្រឹត្តបទល្មើសគ្រឿងញៀន និងអំពើឆបោកតាមប្រព័ន្ធអនឡាញ។

ការអនុវត្តនីតិវិធីបណ្ដេញចេញចំពោះជនជាតិវៀតណាមទាំង៥៧នាក់ ដែលក្នុងនោះមានស្រីចំនួន១៥នាក់ បានធ្វើឡើងកាលពីថ្ងៃទី១៣ ខែវិច្ឆិកា ឆ្នាំ២០២៥ តាមច្រកទ្វារព្រំដែនអន្តរជាតិបន្ទាយចក្រី ខេត្តព្រៃវែង ក្រោមការបញ្ជាពីឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ។

តាមការអះអាងរបស់អគ្គនាយកដ្ឋានអន្តោប្រវេសន៍ ក្នុងចំណោមជនជាតិវៀតណាមខាងលើ ដែលត្រូវបានបណ្ដេញចេញ គឺមានជាប់ពាក់ព័ន្ធនឹងករណីប្រើប្រាស់ដោយខុសច្បាប់សារធាតុញៀន ការជួញដូរបំពង់ខ្យល់សង្ស័យជាខ្យល់សប្បាយ (HAPPY BALOON) និងលួចស្នាក់នៅធ្វើការខុសច្បាប់ ក្នុងការប្រព្រឹត្តអំពើឆបោកតាមប្រព័ន្ធបច្ចេកវិទ្យា (ONLINE SCAMS)។

ជនជាតិវៀតណាមទាំងនោះ នាយកដ្ឋានស៊ើបអង្កេត និងអនុវត្តនីតិវិធី ទទួលបានពីមន្ទីរប្រឆាំងបទល្មើសគ្រឿងញៀន ស្នងការដ្ឋាននគរបាលរាជធានីភ្នំពេញ ខេត្តស្វាយរៀង និងខេត្តព្រះសីហនុ៕