ប្រទេសន័រវេស ចាត់ទុកកម្ពុជាគឺជាអ្នកត្រួសត្រាយផ្លូវដ៏សំខាន់ក្នុងគោលនយោបាយសកម្មភាពមីន

ប្រទេសន័រវេស ចាត់ទុកកម្ពុជាគឺជាអ្នកត្រួសត្រាយផ្លូវមួយដ៏សំខាន់ក្នុងគោលនយោបាយសកម្មភាពមីន ហើយតាមរយៈបទពិសោធ និងសមិទ្ធផលសកម្មភាពមីន កម្ពុជាគឺជាតួអង្គមួយដ៏សំខាន់សម្រាប់អនុសញ្ញាស្តីពីការហាមឃាត់ការប្រើប្រាស់ ការស្តុកទុក ការផលិត និងការផ្ទេរ ឬប្រឆាំងនឹងមីន និងលើការបំផ្លាញ(អូតាវ៉ា)។ នេះជាការលើក​ឡើងរបស់លោកស្រី Anne Karine Jahren ទីប្រឹក្សាជាន់ខ្ពស់ទទួលបន្ទុកគោលនយោបាយមនុស្សធម៌ នៃក្រសួងការបរទេសន័រវេស នៅក្នុងជំនួបពិភាក្សាទ្វេភាគីជាមួយ លោក លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន ថ្ងៃទី ៣ ធ្នូ ២០២៥ ប្រទេសស្វីស។

ក្នុងជំនួបនោះ លោកស្រី Anne Karine Jahren បានកោតសរសើរចំពោះកិច្ចខិតខំប្រឹងប្រែងរបស់កម្ពុជា ក្នុងសកម្មភាពមីន ហើយបញ្ជាក់ថា ន័រវេស ជាប្រទេសផ្តល់ជំនួយមែនពិត តែជោគជ័យសំខាន់ គឺដោយសារភាពជាម្ចាស់របស់កម្ពុជា ក្នុងនោះដែរ កម្ពុជាមានប្រព័ន្ធគ្រប់គ្រង និងសម្របសម្រួលសកម្មភាពមីនដ៏រឹងមាំ។ លោកស្រី Anne Karine Jahren បន្តទៀតថា៖« កម្ពុជា គឺជាអ្នកត្រួសត្រាយផ្លូវមួយដ៏សំខាន់ក្នុងគោលនយោបាយសកម្មភាពមីន ហើយតាមរយៈបទពិសោធន៍ និងសមិទ្ធផលសកម្មភាពមីនកម្ពុជា កម្ពុជាគឺជាតួអង្គមួយដ៏សំខាន់មួយសម្រាប់អនុសញ្ញាអូតាវ៉ា»។

ក្នុងឱកាសនោះ លោក លី ធុជ បានថ្លែងអំណរគុណដល់រាជរដ្ឋាភិបាល និងប្រជាជនន័រវេស សម្រាប់ការគាំទ្រសកម្មភាពមីននៅកម្ពុជា ជាពិសេសជួយដល់ការស្រេចបានខេត្តកែប ដែលជាខេត្តដំបូងប្រកាសអស់មីន។
តាងនាមឱ្យរាជរដ្ឋាភិបាលកម្ពុជា លោកបានចាត់ទុកប្រទេសន័រវេស និងអង្គការជំនួយនៃប្រជាពលរដ្ឋន័រវេស្សន៍ (NPA) គឺជាមិត្តពិតប្រាកដ និងជាដៃគូយូរអង្វែងរបស់កម្ពុជា ក្នុងការទទួលបាននូវសមិទ្ធផលយ៉ាងធំធេងសម្រាប់វិស័យសកម្មភាពមីន។

លោកបញ្ជាក់ទៀតថា ក្រៅពីសមិទ្ធផលក្នុងប្រទេស កម្ពុជាក៏បានចូលរួមចំណែកក្នុងសកម្មភាពមីនសាកល តាមរយៈការចែករំលែកបទពិសោធ និងជំនាញទៅកាន់ប្រទេសរងគ្រោះផ្សេងទៀត ជាក់ស្តែងមានកូឡុំប៊ី និងអ៊ុយក្រែន ជាដើម។ លោកក៏បានស្នើសុំឱ្យប្រទេសន័រវេសគាំទ្រកម្ពុជា ដើម្បីបង្កើនលទ្ធភាពចែករំលែក និងជួយដល់ប្រទេសមានតម្រូវការចាំបាច់។

ក្រោយពីកិច្ចខិតខំប្រឹងប្រែងអស់រយៈពេលជាង ៣០ឆ្នាំ កម្ពុជាបានត្រៀមដាក់ចេញនូវគោលនយោបាយជាតិសកម្មភាពមីន ២០២៦-២០៣៥ ហើយកម្ពុជាប្តេជ្ញាអនុវត្តន៍ឱ្យសម្រេចបាននូវគោលដៅស្របតាមផែនការសកម្មភាពសៀមរាប-អង្គរ ឆ្នាំ២០២៥-២០២៩។

គួរជម្រាបថា អំឡុងបំពេញបេសកកម្មក្រៅប្រទេស លោកទេសរដ្ឋមន្រ្តី លី ធុជ បានបក​អាក្រាត​ប្រាប់អន្តរជាតិថា ថៃ យកបញ្ហាផ្ទុះមីនធ្វើជាមូលហេតុវាយប្រហារឈ្លានពានមកលើកម្ពុជា និងទាមទារឱ្យអនុសញ្ញាស្តីពីគ្រាប់បែកចង្កោម ថ្កោលទោសថៃឱ្យខ្លាំងក្លា ចំពោះការប្រើប្រាស់គ្រាប់បែកចង្កោម»៕