ព័ត៌មានជាតិ

អគ្គនាយកដ្ឋានពន្ធដារ ផ្ដល់ស្បៀងជូនពលរដ្ឋភៀសសឹកនៅស្រុកកោះកុង

បានផុស

៧ ខែ មុន

នៅ

ថ្ងៃចន្ទ ១៥ ធ្នូ ២០២៥

ដោយ

អ៊ិន ពិសី

អគ្គនាយក នៃអគ្គនាយកដ្ឋានពន្ធដារ ផ្ដល់ស្បៀងជូនពលរដ្ឋភៀសសឹកនៅស្រុកកោះកុង គ្រាពួកគាត់រងការគំរាមកំហែងពីយោធាថៃឈ្លានពាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ កាលពីថ្ងៃទី ១៤ ខែធ្នូ ឆ្នាំ ២០២៥ បានចាត់លោក ចំរើន ទូច ប្រធានសាខាពន្ធដារខេត្តកោះកុង នាំយកសម្ភារចាំបាច់មួយចំនួន រួមមាន អង្ករ ៥ តោន ទឹកសុទ្ធ ៣០០ កេស និងឆៃប៉ូវ ៣០០ គីឡូក្រាម ចែកជូនដល់ជនភៀសសឹកដែលបានរត់ភៀសខ្លួនចេញពីផ្ទះសម្បែងនៅតាមតំបន់ជម្លោះព្រំដែនកម្ពុជា-ថៃ ខេត្តកោះកុង។

ស្បៀងអាហារដែលប្រគល់ជូនអាជ្ញាធរស្រុកកោះកុង ចាត់ចែងដោះស្រាយជូនជនភៀសសឹកនៅមណ្ឌលសុវត្ថិភាពឃុំត្រពាំងរូង ស្រុកកោះកុង មានចំនួនប្រមាណ ៤ ០០០ នាក់។

លោក ចំរើន ទូច បានសម្ដែងការអាណិតអាសូរដល់ពលរដ្ឋក្មេងចាស់ ជនពិការ និងស្ត្រីមេម៉ាយ ដែលកំពុងស្នាក់នៅតំបន់សុវត្ថិភាពក្នុងស្រុកកោះកុង យ៉ាងខ្លាំង ដោយសារការគំរាមកំហែងពីសំណាក់យោធាថៃឈ្លានពានចង់បានទឹកដីកម្ពុជាតាមរយៈការប្រើកម្លាំងយោធា។

លោកប្រធានសាខាពន្ធដារខេត្តកោះកុង ជឿជាក់ថា អំណោយមានជាស្បៀងអាហារ នឹងជួយចែករំលែកការដោះស្រាយមួយរយៈពេលខ្លីអំឡុងភៀសសឹកនាពេលនេះ។ ជាមួយនេះ លោកក៏ស្នើដល់ពលរដ្ឋថែរក្សាសុខភាពឲ្យបានល្អផងដែរ។