អាជ្ញាធរមីន ស្នើពិភពលោកឈឺឆ្អាលករណីថៃប្រើគ្រាប់បែកចង្កោមបន្សល់ទុកសោកនាដកម្មដល់មនុស្សជំនាន់ក្រោយ

អាជ្ញាធរមីនកម្ពុជា បានអំពាវនាវឱ្យសហគមន៍អន្តរជាតិយកចិត្តទុកដាក់ចំពោះករណីដែលប្រទេសថៃបានប្រើគ្រាប់បែកចង្កោមក្នុងជម្លោះព្រំដែន ដែលអាចបន្សល់ទុកសោកនាដកម្មធ្ងន់ធ្ងរដល់មនុស្សជំនាន់ក្រោយ ជាពិសេសកុមារ។ ក្នុងអំឡុងជម្លោះព្រំដែននោះ កងយោធាថៃប្រើគ្រាប់បែកចង្កោមប្រភេទM46 និងប្រភេទគ្រាប់បែកផ្សេងៗទៀត។ ករណីនេះមិនមែនជាអាវុធធម្មតាទេ ប៉ុន្តែជាអន្ទាក់គ្រោះថ្នាក់ដ៏យូរអង្វែងសម្រាប់ជនស៊ីវិល ដែលបង្កហានិភ័យដល់ជីវិត និងសុវត្ថិភាពរបស់ពលរដ្ឋក្នុងរយៈពេលវែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរមីន ដែលមានក្រុមអ្នកជំនាញលើការងារបោសសម្អាតមីន បានពន្យល់ថា គ្រាប់បែកចង្កោកម M46 ប្រភេទនេះងាយនឹងផ្ទុះ នៅពេលប៉ះស្រាលៗ រំញ័រតិចតួច ការចង់ដឹងចង់ឃើញរបស់កុមារ ឧបករណ៍របស់កសិករនៅក្នុងដី មួយណាក៏អាចបង្កឱ្យមានគ្រោះថ្នាក់ដល់ជីវិតផងដែរ។ អាជ្ញាធរមីន បន្តថា៖«គ្រាប់ទាំងនេះខ្ចាត់ខ្ចាយពាសពេញដីរបស់យើង កសិដ្ឋានរបស់យើង ព្រៃរបស់យើង ភូមិរបស់យើង ហើយនៅទីនោះជាយូរបន្ទាប់ពីការបាញ់ផ្លោងរួច។ សម្រាប់កសិករកម្ពុជា វាមានន័យថាជាការភ័យខ្លាចជាប្រចាំថ្ងៃដោយគ្រាន់តែចង់ចិញ្ចឹមគ្រួសាររបស់​ខ្លួន។សម្រាប់កុមារកម្ពុជា វាគឺជាឃាតករដែលបន្លំខ្លួនជាប្រដាប់លេង ឬជាសំណល់ធម្មតា»។

ការប្រើគ្រាប់បែកចង្កោមមកលើកម្ពុជាកនេះ វាមិនមែនជាឧបទ្ទវហេតុទេ វាគឺជាការគំរាមកំហែងដល់ផ្ទៃដី និងជីវិតរបស់ប្រជាជនកម្ពុជា។ កម្ពុជាស្គាល់អាវុធទាំងនេះ ធ្លាប់រងទុក្ខពីសំណល់ និងដឹងច្បាស់ពីអ្វីដែលពួកគេធ្វើ ហើយយើងដឹងថាអ្នកណាជាអ្នករងគ្រោះគឺជនស៊ីវិលស្លូតត្រង់ សម្រាប់ឆ្នាំខាងមុខ។ ការប្រើប្រាស់គ្រាប់បែកចង្កោមមិនមែនគ្រាន់តែជាការវាយប្រហារនៅថ្ងៃនេះទេ ប៉ុន្តែវាគឺជាការវាយប្រហារទៅលើអនាគតរបស់ប្រទេសកម្ពុជា។ ក្នុងន័យនេះ អាជ្ញាធរមីនស្នើឱ្យពិភពលោកត្រូវតែឈឺឆ្អាលរឿងនេះ មិនត្រូវនៅស្ងៀមឡើយ។

កាលពីថ្ងៃទី២៥ ខែតុលា ២០២៥ មានករណីផ្ទុះគ្រាប់បែកចង្កោមនៅឃុំស្រអែម ស្រុកជាំក្សាន្ត ខេត្តព្រះវិហារ បណ្តាលឱ្យស្លាប់កុមារាឈ្មោះ សឿន សុវណ្ណ អាយុ១០ឆ្នាំ និងឪពុករងរបួសធ្ងន់។ គ្រាប់នេះត្រូវបានអាជ្ញាធរមីន អះអាងថាជាគ្រាប់បែកចង្កោមថ្មីៗដែលថៃប្រើប្រាស់ក្នុងសង្គ្រាមឈ្លានពានកម្ពុជា។

ទន្ទឹមនេះ អាជ្ញាធរមីន ថ្កោលទោសយោធាថៃដែលប្រើប្រាស់គ្រាប់បែកចង្កោម និងចាត់ទុកថា ជាការបំពានយ៉ាងធ្ងន់ធ្ងរចំពោះច្បាប់អន្តរជាតិ ព្រោះគ្រាប់បែកចង្កោមត្រូវ បានហាមប្រាម នៅក្រោមអនុសញ្ញាស្តីពីគ្រាប់បែកចង្កោមឆ្នាំ២០០៨ ដោសារតែគ្រាប់នេះ បង្កផលប៉ះពាល់ទៅលើផ្ទៃដីធំ និងបង្កគ្រោះថ្នាក់ចំពោះប្រជាជន ជាពិសេសក្មេងតូច»៕