របរលក់ពោតស្ងោរ អាចឲ្យ​ស្រ្តី​ម្នាក់​នៅជនបទ​រកប្រាក់ចំណូល​ពី ១៥ ទៅ ២០ ម៉ឺនរៀល ក្នុងមួយថ្ងៃ

ផ្លែពោត គឺជាអាហាររូបត្ថម្ភដ៏ល្អដែលមានអត្ថប្រយោជន៍ជាច្រើនដល់សុខភាព រាប់ចាប់តាំងពីការជួយដល់ប្រព័ន្ធរំលាយអាហារ រហូតដល់ការការពារភ្នែក និងបេះដូង។ ផ្លែពោត ត្រូវបានគេយកទៅស្ងោរ ធ្វើជាអាហារសម្រន់ដ៏មានរសជាតិ ដែលកំពុងទទួលបានការគាំទ្រនិងពេញនិយមពីអ្នកបរិភោគ និងជាមុខរបរមួយប្រភេទអាចរកប្រាក់ចំណូលបន្ថែមជួយដល់សេដ្ឋកិច្ចគ្រួសារ។

អ្នកស្រី ប៊ាន ស្រីពៅ រស់នៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ បានប្រាប់ឱ្យដឹងថា អ្នកស្រីបានប្រកបរបរលក់ពោតស្ងោរនេះរយៈពេល ៣ ទៅ ៤ឆ្នាំមកហើយ ក្រៅពីរបរធ្វើស្រែ ចម្កា និងចិញ្ចឹមគោ។

អ្នកស្រី បន្តថា ពេលដល់រដូវប្រាំង អ្នកស្រី​បានទៅទិញផ្លែពោតដល់ចម្ការផ្ទាល់ ដើម្បីបានផ្លែពោតល្អៗ យកមកស្ងោរ រក្សាបាននូវរសជាតិផ្អែមឆ្ងាញ់ ពេលពោតស្ងោរឆ្អិន គឺដឹកលក់តាមម៉ូតូផង និងលក់នៅកន្លែងផង។

ក្នុងមួយថ្ងៃ អ្នកស្រី​អាចលក់ពោតស្ងោរបានចាប់ពី ៤ផ្លូន ទៅ ៥ផ្លូន ដែលអាចរកប្រាក់ចំណូលជាមធ្យមពី ១៥ម៉ឺនរៀល ទៅ ២០ម៉ឺនរៀល។

អ្នកស្រី បានឱ្យដឹងបន្ថែមថា មុខរបរលក់ពោរស្ងោរនេះ គឺគ្រាន់តែជាមុខរបរបន្ទាប់បន្សំបន្ថែម ដើម្បីរកប្រាក់ចំណូលជួយគ្រួសារ និងជួយផ្គត់ផ្គង់កូនស្រី ដែលកំពុងសិក្សាបន្តនៅរាជធានីភ្នំពេញ៕

អត្ថបទ៖ ប្រុញ វិធិន