ផ្លូវកៅស៊ូ​មួយ​ខ្សែ​កំពុង​សាងសង់​តភ្ជាប់​ពី​ខេត្ត​ក្រចេះដល់​ខេត្ត​មណ្ឌលគិរី កាត់បន្ថយ​ចម្ងាយ​ផ្លូវ​​ធ្វើ​ដំណើរកាន់តែឆាប់រហ័ស​

កំណាត់ផ្លូវមួយខ្សែក្នុងឃុំដារ ស្រុកចិត្របុរី ខេត្តក្រចេះ កំពុង​សាងសង់​ចាក់ក្រាលកៅស៊ូ​តភ្ជាប់ពីភូមិអញ្ចាញ ឃុំដារឆ្ពោះទៅភូមិចម្រើន ឃុំថ្មីក្នុង​ស្រុក​ចិត្របុរីខេត្តក្រចេះ។

ខ្សែ​ផ្លូវនេះ​មានប្រវែង ១២,៧ គីឡូម៉ែត្រ ​​​ក្រាលកៅស៊ូ ២ជាន់ គឺជាការបើកច្រកតភ្ជាប់គ្នាថ្មីមួយទៀតរវាង ឃុំថ្មី ស្រុកចិត្របុរី ខេត្តក្រចេះ និងឃុំស្រែឈូក ស្រុកកែវសីម៉ា ខេត្តមណ្ឌលគិរី ដែល​នឹងជួយកាត់បន្ថយពេលវេលាធ្វើដំណើររបស់ប្រជាពលរដ្ឋបានយ៉ាងច្រើន បន្ទាប់ពីការសាងសង់ត្រូវបានបញ្ចប់ជាផ្លូវការ។

ផ្លូវដែល​កំពុង​សាងសង់​នេះ​ ជាផ្លូវមួយក្នុងចំណោមផ្លូវទាំង ១៤ ខ្សែ នៃគម្រោងកែលម្អបណ្តាញតភ្ជាប់ផ្លូវថ្នល់កម្ពុជា “RCIP”។

តាមការឱ្យដឹងពីមន្ត្រីនៃមន្ទីរអភិវឌ្ឍន៍ជនបទខេត្តក្រចេះ បានឱ្យដឹងថា ផ្លូវទាំង ១៤ ខ្សែ នៃគម្រោងកែលម្អបណ្តាញតភ្ជាប់ផ្លូវថ្នល់កម្ពុជា “RCIP” ការងារជំហានទី១ អនុវត្តដោយក្រុមហ៊ុន ប៉ូលិចិន្តា ​ដែល​ខ្សែផ្លូវលេខ១ នៅភូមិថ្មគ្រែ និងភូមិចង្រ្កង់ បាន​ចាក់​បង្ហាប់ស្រទាប់ថ្មមិចតាមស្តង់សម្រេចបាន ១០០%។ ខ្សែផ្លូវលេខ២ ភូមិសំបុកកសាងបាន​ចាក់បង្ហាប់ស្រទាប់ថ្មមិចសម្រេចបាន ៩៦%។ ផ្លូវ​លេខ​៣ ភូមិក្បាលជួរ និងភូមិដីសម្បទានកកុដ បាន​ចាក់បង្ហាប់ស្រទាប់ថ្មមិចបានពាក់កណ្ដាល ហើយការងារជារួមសម្រេចបាន ៩១% ។

ផ្លូវ​លេខ៦ នៅភូមិព្រែកប្រសព្វ និងភូមិព្រែកប្រសព្វលើ មកភូមិកំពែងបាន​ចាក់បង្ហាប់ស្រទាប់​ថ្ម​មិច សម្រេចបាន ៩៥%។ ផ្លូវលេខ២០ ភូមិច្រវ៉ា និងភូមិកោះដាច់ បាន​ចាក់បង្ហាប់ស្រទាប់​ថ្មមិច សម្រេចបាន ៥០% គម្រោងផ្លូវទាំងមូលសម្រេចបាន៩០%។

ផ្លូវ​លេខ២៩ ភូមិថ្មរៀប កំពុងចាក់ថ្មម៉េចបណ្ដើរ ជាលទ្ធផលសម្រេចបាន ៥៤%។ ផ្លូវទាំង ៦ ខ្សែខាងលើនេះ សម្រេចបានលទ្ធផល ៩០% គិតត្រឹមថ្ងៃទី២០ ខែកុម្ភះ ឆ្នាំ២០២៦។

ដោយឡែក ផ្លូវចំនួន ៨ ខ្សែទៀត រួមមាន៖ ផ្លូវទី១ ភូមិកន្ទួត និងភូមិទ្រាប សម្រេចបាន ៤៧%។ ផ្លូវលេខ ១២ ភូមិបន្ទាយ និងភូមិអញ្ចាញ សម្រេចបាន៩៤។ ផ្លូវលេខ១៥ ភូមិអូរគគី និងភូមិចម្រើន បាន​ចាក់​បង្ហាប់ស្រទាប់ថ្មមិច សម្រេចបាន១០០%។ ផ្លូវភូមិស្ទឹងស្វាយ និងភូមិខ្នងពស់ បាន​ចាក់បង្ហាប់ស្រទាប់​ថ្ម​មិច សម្រេចបាន ៩១%។ ផ្លូវលេខ៤១ តភ្ជាប់ពីភូមិចម្រើន ទៅភូមិភ្នំមាស សម្រេចបាន ១០០% តែមិនទាន់ក្រាលកៅស៊ូនោះទេ ហើយថ្ងៃនេះបានក្រាលកៅស៊ូបានចម្ងាយ ២គីឡូម៉ែត្រ។

ដោយឡែក ៣ខ្សែទៀត មានផ្លូវ ភូមិកាប៉ូទៅភូមិម្រើម កំពុងចូលសម្អាតបាន ៣០%។ ផ្លូវភូមិថ្ម​អណ្ដើក កំពុងសម្អាតនិង​កំពុងដាក់លូ ហើយនៅភូមិស្វាយជ្រះក៏កំពុងសំអាត ១០០%៕

អត្ថបទ៖ ប្រុញ វិធិន