ព័ត៌មានជាតិ

ទូតចិនថាប្រទេសលោកគាំទ្ររហូតដល់គម្រោងព្រែកជីកហ្វូណនតេជោសម្រេចបានជោគជ័យ

បានផុស

៣ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

ឯកអគ្គរដ្ឋទូតចិនប្រចាំកម្ពុជាលោក វ៉ាង វិនពីន បានបញ្ជាក់ថាប្រទេសចិននឹងបន្តគាំទ្ររហូតដល់គម្រោងជីកព្រែកហ្វូណនតេជោសម្រេចបានជោគជ័យតាមការគ្រោងទុក។ នេះបើតាមការចុះផ្សាយនៅលើហ្វេសបុកផេករដ្ឋសភាកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋសភាជាតិកម្ពុជាបានដកស្រង់ប្រសាសន៍របស់លោក វ៉ាង វិនពីន ដែលបានចូលជួបជូនពរសម្ដេចប្រធានសភាក្នុងឱកាសចូលឆ្នាំខ្មែរនៅថ្ងៃទី៣១ ខែមីនា នេះមកចុះផ្សាយថា «ចិនប្តេជ្ញាគាំទ្រយ៉ាងពេញទំហឹង ដើម្បីអនុវត្តគម្រោង “ព្រែកជីកហ្វូណនតេជោ” ឱ្យសម្រេចបានជោគជ័យតាមការគ្រោងទុកដែលជាសមិទ្ធផលប្រវត្តិសាស្ត្រដ៏មានសារៈសំខាន់សម្រាប់កម្ពុជា»។

ក្នុងឱកាសនោះដែរប្រធានសភា សម្ដេចសភាធិបតី ឃួន សុដារី មានប្រសាសន៍ផងដែរថាការអភិវឌ្ឍ និងរីកចម្រើនរបស់កម្ពុជា រហូតដល់ពេលបច្ចុប្បន្ននេះ មិនអាចកាត់ផ្តាច់ពីជំនួយគាំទ្រដ៏មានតម្លៃរបស់ប្រទេសចិននោះឡើយ ហើយមិត្តភាពរវាងកម្ពុជា និងចិន គឺជាមិត្តភាពធន់និងទុកចិត្តបាននៅគ្រប់កាលៈទេសៈ។

គួរឱ្យដឹងផងដែរថា គម្រោងជីកព្រែកដ៏ធំរបស់កម្ពុជា ព្រែកជីកហ្វណនតេជោ គឺជាគម្រោងផ្លូវទឹកប្រវត្តិសាស្ត្រដែលមានប្រវែង១៨០គីឡូម៉ែត្រតភ្ជាប់ទន្លេមេគង្គទៅកាន់សមុទ្រខេត្តកែប ដែលគ្រោងនឹងចំណាយលុយសាងសង់ប្រមាណ១,៧ពាន់លានដុល្លារអាមេរិក។ រដ្ឋាភិបាលនឹងបើកការដ្ឋានសាងសង់ដំណាក់កាលទី២ នៅថ្ងៃទី១១ ខែមេសា ខាងមុខក្នុងភូមិសាស្ត្រស្រុកបូរីជលសារ ខេត្តតាកែវ៕