ព័ត៌មានជាតិ

ច្បាប់ប្រឆាំង SCAM ឱ្យរដ្ឋរឹបអូសទ្រព្យសម្បត្តិដែលកើតចេញពីបទល្មើសដោយមិនចាំបាច់មានការផ្ដន្ទាទោសជាមុន

បានផុស

៣ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

រដ្ឋមន្ត្រីក្រសួងយុត្តិធម៌ លោកឧបនាយករដ្ឋមន្ត្រី កើត រិទ្ធ បានបញ្ជាក់ថា សេចក្ដីព្រាងច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យាបានបង្កើតនូវទម្រង់ថ្មីមួយទៀតនៃបទល្មើសសម្អាតប្រាក់ពិសេសមួយដែលអនុញ្ញាតឱ្យរដ្ឋរឹបអូសទ្រព្យដែលទិញដោយប្រើប្រាស់លុយបានពីបទល្មើស ឬការបោកប្រាស់អនឡាញបានដោយមិនចាំបាច់មានការផ្ដន្ទាទោសពីបទល្មើសដែលជាសំអាងនៃបទល្មើសសម្អាតប្រាក់ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំសភាកាលពីថ្ងៃទី៣០ ខែមីនា លោកឧបនាយករដ្ឋមន្ត្រី កើត រិទ្ធ បានការពារច្បាប់នេះថាជាការធ្វើឱ្យស្របតាមស្ដង់ដាររបស់ក្រុមការងារហិរញ្ញវត្ថុ FATF និងការអនុវត្តនភតាមបណ្ដាប្រទេសមួយចំនួនទៀតដូចជា សិង្ហបុរី ជាដើម។

លោកបញ្ជាក់ថា៖ «លក្ខណៈពិសេសនៃច្បាប់នេះគឺអនុញ្ញាតឱ្យមានការសម្រេចរឹបអូសទ្រព្យដែលជាផលនៃបទល្មើសក្នុងករណីដែលម្ចាស់ទ្រព្យមិនមានភស្ភុតាងបញ្ហាអំពីប្រភពស្របច្បាប់នៃទ្រព្យដែលសង្ស័យថាពាក់ព័ន្ធនឹងបទល្មើស ឬជាផលនៃបទល្មើសឆបោកតាមប្រព័ន្ធបច្ចេកវិទ្យា ឬបទល្មើសពាក់ព័ន្ធផ្សេងទៀតដែលមានក្នុងច្បាប់នេះ»។

លោកបញ្ជាក់ថានេះជាទម្រង់នៃបទល្មើសសម្អាតប្រាក់ពិសេស ដែលហៅថា Stand-alone money laundering ដែលឱ្យរឹបអូសទ្រព្យបានដោយមិនចាំបាច់មានការផ្តន្ទាទោសពីបទល្មើស ដូចអ្វីដែលមានចែងក្នុងច្បាប់ស្ដីពីការប្រឆាំងបទល្មើសសម្អាតប្រាក់ទេ។

លោកបានបញ្ជាក់បន្ថែមថា៖ «ការរៀបចំនួវច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យានៅពេលនេះបង្ហាញឱ្យឃើញច្បាប់ដ៏មុះមុតខាងនយោបាយរបស់រដ្ឋាភិបាលក្នុងការប្រឆាំងការសម្អាតប្រាក់ដែលកើតចេញពីប្រព័ន្ធបច្ចេកវិទ្យានេះ និងដោយរួមចំណែកធ្វើឱ្យសម្រេចបាននូវការគោលដៅធ្វើការប្រឆាំងការសម្អាតប្រាក់នាពេលខាងមុខដែលកម្ពុជាកម្ពុជានឹងទទួលការវាយតម្លៃនៅឆ្នាំ២០២៨ខាងមុខ»។

ប្រទេសកម្ពុជាធ្លាប់ត្រូវបានក្រុមការងារហិរញ្ញវត្ថុ FATF ពិភពលោកដាក់ចូលបញ្ជីប្រផេះនៃការលាងលុយកខ្វក់ចំនួន២ដងក្នុងឆ្នាំ២០១១ និងឆ្នាំ២០១៩ ទោះជាយ៉ាងណាក្រោយមកដោយមានវិធានការជាបន្តបន្ទាប់របស់រដ្ឋាភិបាលក្រុមការងារនេះបានដកកម្ពុជាចេញវិញនៅឆ្នាំ២០២៣។ យ៉ាងណាក្ដីអគ្គទេសាភិបាលធនាជាតិកម្ពុជាលោកស្រី ជា សិរី ធ្លាប់លើកឡើងកាលពីអំឡុងខែមករាកន្លងទៅពីការបារម្ភនៃការធ្លាក់ចូលបញ្ជីនេះជាថ្មីបន្ទាប់ពីមានសេចក្ដីរាយការណ៍បន្តបន្ទាប់ពីឧក្រិដ្ឋកម្មឆបោកអនឡាញនៅកម្ពុជា។

សេចក្ដីព្រាងច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យាកំពុងត្រូវបានព្រឹទ្ធសភាពិនិត្យ ក្រោយពីសភាជាតិអនុម័តកាលពីថ្ងៃទី៣០ ខែមីនា។ ច្បាប់នេះមាន៥ជំពូក និង២៤មាត្រា បានបង្កើតនូវបទល្មើសព្រហ្មទណ្ឌពិសេសចំនួន៥ ដើម្បីពង្រឹងនូវប្រសិទ្ធភាពប្រឆាំងការឆបោក និងបង្ហាញឆន្ទៈរបស់រដ្ឋាភិបាលក្នុងការប្រឆាំងការសម្អាតប្រាក់ផងដែរ៕