ព័ត៌មានជាតិ

ម្ចាស់អាជីវកម្មទាំងអស់ត្រូវអនុវត្តតាមការកំណត់របស់ច្បាប់ ករណីមិនអនុវត្តតាមនោះទេ ត្រូវបិទហាងលែងឱ្យដំណើរការអាជីវកម្ម

បានផុស

៥ years មុន

នៅ

ថ្ងៃអង្គារ ១៨ ឧសភា ២០២១

ដោយ

ឧត្តរមានជ័យ ៖ នេះជាការលើកឡើងរបស់ ឯកឧត្តម ឌី រ៉ាដូ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ ដែលបានអញ្ជើញដឹកនាំកិច្ចប្រជុំជាមួយរដ្ឋបាលស្រុកអន្លង់វែងពិភាក្សាអំពីករណីម្ចាស់ហាងក្លាសិកបើកអាជីវកម្មល្មើសបំរាមរបស់រដ្ឋបាលខេត្ត នៅសាលប្រជុំធំសាលាស្រុកអន្លង់វែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះក៏មានការអញ្ជើញចូលរួមពី លោកលោកស្រី អភិបាលស្រុក ប្រធានមន្ទីរទេសចរណ៍ អនុប្រធានមន្ទីរ អង្គភាពពាក់ព័ន្ធ ស្នងការរងនគរបាលខេត្ត មេបញ្ជាការរងមូលដ្ឋានកងរាជអាវុធហត្ថស្រុក អធិការរងស្រុក ម្ចាស់ហាងក្លាសិក និងអ្នកពាក់ព័ន្ធទាំងអស់។

បន្ទាប់ពីបានពិភាក្សាគ្នាមក អង្គប្រជុំសម្រេចបានលទ្ធផលដូចខាងក្រោម ៖

១.ម្ចាស់ហាងក្លាស៊ីកធ្វើកិច្ចសន្យាគោរពតាមការកំណត់របស់ច្បាប់និងការណែនាំរបស់ខេត្ត ករណីលើកក្រោយទៀតនឹងទទួលខុសត្រូវចំពោះមុខច្បាប់

២.អជ្ញាធរត្រូវអនុវត្តគ្រប់ម្ចាស់អាជីវកម្មទាំងអស់មិនលើកលែងហាងណាមួយនោះទេ។គ្រប់ហាងទាំងអស់ត្រូវអនុវត្តតាមការកំណត់របស់ច្បាប់និងការណែនាំរបស់អាជ្ញាធរ ករណីមិនអនុវត្តតាមត្រូវបិទហាង

៣.អជ្ញាធរស្រុកអន្លង់វែងត្រូវចុះអនុវត្តសេចក្តីសម្រេចរបស់ខេត្តដែលដាក់ចេញ។

ព្រមជាមួយគ្នានេះ ឯកឧត្ដម បានសង្កត់ធ្ងន់ថា គ្រប់ម្ចាស់អាជីវកម្មទាំងអស់ត្រូវតែអនុវត្តតាមការកំណត់របស់ច្បាប់ និងការណែនាំរបស់អាជ្ញាធរ ករណីមិនអនុវត្តតាមនោះទេ ត្រូវបិទហាងលែងឱ្យដំណើរការអាជីវកម្មរបស់ខ្លួនបន្តទៀត។

ឆ្លៀតក្នុងឱកាសនោះផងដែរ ឯកឧត្តម ក៏បានក្រើនរំលឹកដល់អាជ្ញាធរ មន្ទីរ អង្គភាពពាក់ព័ន្ធ ត្រូវចាត់វិធានការឱ្យបានហ្មត់ចត់ ដោយការចុះអនុវត្ត អប់រំណែនាំឲ្យពួកគាត់បានយល់ដឹងកាន់តែច្បាស់ និងអនុវត្តតាមវិធានការរបស់រាជរដ្ឋាភិបាល ព្រោះថាបច្ចុប្បន្នជំងឺកូវីដ១៩នេះ នៅតែបន្តតាមយាយីដល់សុខភាពរបស់មនុស្សនៅទូទាំងពិភពលោករួមទាំងប្រទេសយើងផងដែរ ដូច្នេះត្រូវគោរពប្រតិបត្តិឲ្យខាងតែបាន នូវវិធានការ ៣កុំ និង ៣ការពារ ស្របតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា៕

ដោយ ៖ ចាន់ ធី