ប្រជាពលរដ្ឋសំណូមពរអភិបាលខេត្តកំពង់ធំ ទប់ស្កាត់ការរុករានឈូសឆាយដីព្រៃលិចទឹក ដើម្បីការពារដែនជម្រកត្រីពង

ខេត្តកំពង់ធំ៖ មានការព្រួយបារម្ភពីសំណាក់ប្រជាពលរដ្ឋ ដោយសារមានក្រុម​ឈ្មួញ​​មួយ​ចំនួននាំគ្នាកាប់ឆ្ការរុករានដីព្រៃលិចទឹក ស្ថិតនៅបឹងរាលប្រទះចៀល ឃុំសានគរ ស្រុកកំពង់ស្វាយ ខេត្តកំពង់ធំ។

មហាជនបានសំណូមពរ ឯកឧត្តម សុខ លូ អភិបាលខេ ត្តកំពង់ធំ  និង លោក ប៉ែន វណ្ណរិទ្ធ ប្រធានមន្ទីរ កសិកម្មរុក្ខា ប្រមាញ់ និង នេសាទ ខេត្តកំពង់ធំ  រួមទាំង លោក ហម ហុន នាយខណ្ឌរដ្ឋបាលជលផល ខេត្តកំពង់ធំ មេត្តាជួយមានវិធានការ ការពារ ទប់ស្កាត់ ការកាប់បំផ្លាញព្រៃលិចទឹក ដើម្បីបន្សល់ទុកជម្រកត្រីពងកូន។

តាមសេចក្តីរាយការណ៍បានឱ្យដឹងថា ក្រុមមេក្លោងដែលបានធ្វើសកម្មភាពជួលប្រជាពលរដ្ឋ៣នាក់ឱ្យកាប់ឆ្ការព្រៃលិចទឹក ដែលមានឈ្មោះ តាព្រីង ជាមេការគ្រឿងចក្រ លោក ថន និងលោក ថាំង ថយ ជាឈ្មួញជើងខ្លាំងខាងកាប់បំផ្លាញ ឈូសឆាយរុករានដីព្រៃលិចទឹក ដែល​ជា​ជម្រកមច្ឆជាតិពងកូន នៅខាងលិចបឹងរៀលចំងាយប្រហែល១,០០០ម៉ែត្រ តែពុំមានសមត្ថកិច្វ​ស្ថាប័ន​ណាហ៊ានបង្រ្កាបនោះឡើយ។

ជាក់ស្តែងកាលពីថ្ងៃទី២៧ ខែមិថុនា ឆ្នាំ២០២១ មានក្រុមការងារព័ត៌មាន​បានចុះទៅ​កន្លែង​ហេតុការណ៍ផ្ទាល់  បានជួបប្រទះបុគ្គល៣នាក់កំពុងធ្វើសកម្មភាពកាប់​បំផ្លាញ​រុករានដីព្រៃលិចទឹកខុសច្បាប់ ខណៈដែលក្រឡេកឃើញក្រុមការងារសារព័ត៌មាន អ្នកទាំង​បីនាក់​ក៏បានដាក់មេប្រូចបាត់ស្រមោលទៅ។

តាមប្រភពពីបងប្អូនប្រជាពរដ្ឋបានរៀបរាប់ប្រាប់ថា ដីនៅតំបន់បឹងរាលប្រទះចៀលនេះ ពុំមាន​ប្រជាពលរដ្ឋណាហ៊ាន​ឈូស​ឆាយនោះទេ គឺមានតែក្រុមឈ្មួញដែលត្រូវគ្នា​ជាមួយ​ជំនាញ​បានគប់គិតគ្នាជាមួយលោក ថាំង ថយ  រស់នៅភូមិក្រសាំងក ឃុំសាន់គរ ស្រុកកំពង់ស្វាយ ខេត្តកំពង់ធំ បានជួលមនុស្ស៣នាក់ឱ្យកាប់ព្រៃលិចទឹកដើម្បីយកមកធ្វើ​ជា​កម្មសិទ្ធ។

ពលរដ្ឋចំណាស់ម្នាក់ធ្វើស្រែក្បែរតំបន់បឹងរាលបានបញ្ជាក់ថា លោក ថាំង ថយ និងបក្សពួករបស់​គេជា​ច្រើននាក់ទៀតពិតជាមានអំណាច មិនមានសមត្ថកិច្ចណាម្នាក់ហ៊ានចេញមុខបង្រ្កាប​នោះ​ឡើយ តែប្រជាពលរដ្ឋរកព្រឹកខ្វះល្ងាចហ៊ាន​តែកាប់តែមួយម៉ែត្រ  នឹងមានដីកា​តាមដល់ផ្ទះ៕

អត្ថបទ៖ ប៊ុន រដ្ឋា