ព័ត៌មានជាតិ

ចាប់ខ្លួនថៅកែបុរី អ៊េមីរ៉លស៊ីធី រឿងចេញសែកស្អុយ

បានផុស

៥ years មុន

នៅ

ថ្ងៃព្រហស្បតិ៍ ២២ កក្កដា ២០២១

ដោយ

កាលពីរសៀលថ្ងៃទី២១ ខែកក្កដា ឆ្នាំ២០២១ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានឃាត់ខ្លួនថៅកែបុរីម្នាក់ តាមដីកាបង្គាប់ឲ្យនាំខ្លួនរបស់លោក ធាម ច័ន្ធពិសិទ្ធ ចៅក្រមស៊ើបសួរសាលាដំបូងរាជធានីភ្នំពេញ ។

ប្រភពព័ត៌មានពីសាលាដំបូងបានអោយដឹងថា លោក កែវ មុនីរតន៍ អាយុ៥៥ឆ្នាំ ត្រូវបានចោទប្រកាន់ពីបទ « មិនបំពេញកាតព្វកិច្ចចំពោះឧបករណ៍អាចជួញដូរបាន » តាមមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រព្រឹត្តការទូទាត់ប្រាក់ ប្រព្រឹត្តនៅចំណុចរាជធានីភ្នំពេញ កាលពីថ្ងៃទី១៧ ខែកុម្ភៈ លោក កែវ មុនីរតន៍ ភេទប្រុស អាយុ៥៥ ឆ្នាំ ត្រូវបានគេស្គាល់ថា ជាថៅកែបុរី អ៊េមឺរ៉លដ៏ ស៊ីធី មានអាសយដ្ឋានស្នាក់នៅផ្ទះលេខ៧ ផ្លូវលេខ១០១៥ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយឃាត់ខ្លួនសមត្ថកិច្ចបាននឹងកំពុងរៀបចំសំណុំរឿង បញ្ជូនថៅកែបុរីនោះទៅកាន់សាលាដំបូងរាជធានីភ្នំពេញ នៅថ្ងៃទី២២ ខែកក្កដា នេះ ។

បើយោងតាមសមត្ថកិច្ចបានបង្ហើបថា លោក កែវ មុនីរតន៍ ថៅកែ បុរី អ៊េមឺរ៉លដ៍ ស៊ីធី ធ្លាប់ត្រូវបានសមត្ថកិច្ចឃាត់ខ្លួនបញ្ជូនទៅតុលាការ និងនាំទៅដាក់ពន្ធនាគារចំនួន២លើកមកហើយ ហើយលើកនេះបើអាចជាប់ទៀតនោះសរុប៣លើកហើយ ពាក់ព័ន្ធករណីចេញសែកមិនមានទឹកប្រាក់ដដែលៗនេះ ។

នៅក្នុងសម័យកាលកូវីដនេះ កុំថាឡើយអ្នករកស៊ីតូចតាច សូម្បីថៅកែបុរីក៏ភ្លាត់ស្នៀតជាប់ជុងម្ដងៗដែរ ដោយសារក្ស័យទុន ឬបង្វិលប្រាក់សងគេមិនទាន់ ៕

អត្ថបទ ៖ មករា