ព័ត៌មានជាតិ

មន្ត្រីជំនាញចុះត្រួតពិនិត្យទីតាំងជាក់ស្តែង ដើម្បីបោសសម្អាតមីន និងយុទ្ធភណ្ឌមិនទាន់ផ្ទុះនៅរមណីយដ្ឋានប្រាសាទកោះកេរ

បានផុស

៥ years មុន

នៅ

ថ្ងៃសៅរ៍ ៤ កញ្ញា ២០២១

ដោយ

មន្ត្រីជាន់ខ្ពស់ក្រសួងវប្បធម៌បានឲ្យដឹងនៅព្រឹកនេះថា អាជ្ញាធរជាតិព្រះវិហារ បានសហការជាមួយអង្គភាព CMAC និងមន្ត្រីជំនាញ បានចុះត្រួតពិនិត្យទីតាំងជាក់ស្តែង ដើម្បីបោសសម្អាតមីន និងយុទ្ធភណ្ឌមិនទាន់ផ្ទុះនៅរមណីយដ្ឋានប្រាសាទកោះកេរ ដែលសកម្មភាពនេះ បានធ្វើឡើងក្រោយពីកម្ពុជា បានរៀបចំគម្រោងដាក់ប្រាសាទនេះ ជាសម្បត្តិបេតិកភណ្ឌពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះត្រួតពិនិត្យទីតាំងជាក់ស្តែងនេះ បានធ្វើឡើងកាលពីថ្ងៃព្រហស្បតិ៍ ទី០២ ខែកញ្ញា ឆ្នាំ២០២១ ដឹកនាំដោយលោក ផេង សំអឿន អគ្គនាយករងអាជ្ញាធរជាតិព្រះវិហារ ទទួលបន្ទុកនៅរមណីយដ្ឋានប្រាសាទកោះកេរ ហើយការចុះត្រួតពិនិត្យនៅទីតាំងជាក់ស្តែង ដែលបានស្នើសុំបោសសម្អាតមីន និងយុទ្ធភណ្ឌមិនទាន់ផ្ទុះនេះ មានចំនួន២ទីតាំង នៅក្នុងរមណីយដ្ឋានប្រាសាទកោះកេររួមមាន៖

ទីតាំងទី១, ប្រាសាទតាមែន (តំបន់អទិភាព) គឺស្នើសុំបោសសម្អាតមីនជុំវិញបរិវេណប្រាសាទនេះមុនគេទំហំ៤,៦៧ហិចតា ដែលស្ថិតនៅភាគខាងជើង នៃរមណីយដ្ឋានប្រាសាទកោះកេរ និងទីតាំងទី២, ស្ថិតនៅតំបន់ការពារទី១ និងតំបន់ការពារទី២ ទំហំ៥៧,២៥ហិចតា ជាតំបន់ស្នើសុំបោសសម្អាតមានរយៈពេលខ្លី ព្រោះជាកន្លែងសម្រាប់កិច្ចការពារអភិរក្សប្រាសាទ ស្រាវជ្រាវ និងសម្រាប់កិច្ចអភិវឌ្ឍន៍ទេសចរណ៍ជាដើម។

សូមបញ្ជាក់ថា កាលពីថ្ងៃសុក្រ ទី២៧ ខែសីហា ឆ្នាំ២០២១ អាជ្ញាធរជាតិព្រះវិហារបានរៀបចំកិច្ចប្រជុំមួយ ស្តីពីការងារបោសសម្អាតមីនក្នុងរមណីយដ្ឋានប្រាសាទព្រះវិហារ និងតំបន់ប្រាសាទកោះកេរ ដឹកនាំដោយមានការចូលរួមពីប្រធាននាយកដ្ឋាន អនុប្រធាននាយកដ្ឋាន មន្ត្រី តំណាងអង្គភាព CMAC និងអ្នកពាក់ព័ន្ធយ៉ាងច្រើន ហើយបើតាមលោក គង់ ពុទ្ធិការ អគ្គនាយក នៃអាជ្ញាធរជាតិព្រះវិហារបានបញ្ជាក់ថា កិច្ចប្រជុំនេះ បានកំណត់ចំណុចអាទិភាពជាមុនសិន ដោយសារតែផ្ទៃដី ដែលត្រូវបោសសំអាតមីនមានទំហំធំ ដូច្នេះយើងត្រូវតែពិនិត្យចំណុចអាទិភាព និងលើកជាផែនការសកម្មភាពជាមួយស៊ីម៉ាក់ជាមុនសិន។

បើតាមលោក គង់ ពុទ្ធិការ អាជ្ញាធរកំពុងរៀបចំផែនការ ដើម្បីដោះមីននៅតំបន់ប្រសាទចំនួន២ គឺតំបន់ប្រាសាទកោះកែរ និងប្រាសាទព្រះវិហារ ដោយសារតែតំបន់ទាំងនេះ មានសល់គ្រាប់មីន ក៏ដូចជាគ្រាប់មិនទាន់ផ្ទុះមួយចំនួន ដែលត្រូវតែឆែកឡើងវិញ ដើម្បីចៀសវាងមានផលប៉ះពាល់ដល់ភ្ញៀវទេសចរណ៍ ក៏ដូចជាប្រជាពលរដ្ឋ៕

ដោយ ៖ កោះកែវ