ជនសង្ស័យមុខសញ្ញាដើរលួចគ្មានសល់ ទីបំផុតជាប់អន្ទាក់សមត្ថកិច្ច

ជនសង្ស័យម្នាក់ ដែលជាមុខសញ្ញាលួចមិនរើសមុខ នៅតាមភូមិ និងតាមផ្ទះប្រជាពលរដ្ឋ ទីបំផុតត្រូវបានកម្លាំងអធិការក្រុងបាត់ដំបងចាប់ខ្លួន ខណ:មានជនរងគ្រោះចូលមកដាក់ពាក្យបណ្តឹង។

ក្រោយពីទទួលបានពាក្យបណ្តឹង ពីដើមបណ្តឹងឈ្មោះ ពាញ រដ្ឋា ហៅ អុង ភេទប្រុស អាយុ៣៣ឆ្នាំ មានទីលំនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ដែលបានប្ដឹងថា នៅថ្ងៃទី២៨ ខែកញ្ញា ឆ្នាំ២០២១ នៅពេលទៀបភ្លឺ មានករណីចោរចូលលួចសម្ភារ:មួយចំនួនក្នុងដីភូមិរបស់លោកនៅទីតាំងខាងលើ។

ក្រោយទទួលបានបណ្ដឹងនេះភ្លាម លោកអធិការ ពេជ្រ សារ៉ែន បានចាត់កម្លាំងជំនាញចុះស្រាវជ្រាវ ទីបំផុតកម្លាំងបានឃាត់ខ្លួនជនសង្ស័យ១នាក់ ដើម្បីយកមកសាកសួរ។ ជនសង្ស័យនោះ ឈ្មោះ ពៅ ប្រាថ្នា ហៅ ម៉ៅ ភេទប្រុស  អាយុ៣៥ឆ្នាំ មានទីលំនៅភូមិដង្កោទាប សង្កាត់ទួលតាឯក ក្រុងបាត់ដំបង ដោយជនសង្ស័យបានសារភាពថា គេពិតជាបានចូលលួចសម្ភារ:ក្នុងផ្ទះខាងលើពិតប្រាកដមែន។

សំភារ:ដែលសមត្ថកិច្ចដកហូតបានរួមមាន ឈើសុក្រមចំនួន ៦ សន្លឹក ពូថៅចំនួន ១ ដោយបច្ចុប្បន្ន ជនសង្ស័យ និងវត្ថុតាងត្រូវបានផ្នែកជំនាញកំពុងរៀបចំសំណុំរឿងបញ្ជូនតាមនិតិវិធីច្បាប់ តាមបញ្ជារបស់លោកព្រះរាជអាជ្ញា កែវ សុជាតិ៕

អត្ថបទ៖ សោ និយមរ័ត្ន