ព័ត៌មានជាតិ

រសៀលនេះ កម្ពស់ទឹកស្ទឹងព្រែកត្នោត ហក់ឡើងដល់កម្រិតប្រកាសអាសន្ន

បានផុស

៥ years មុន

នៅ

ថ្ងៃចន្ទ ២៥ តុលា ២០២១

ដោយ

មន្ទីរសាធារណការ និងដឹកជញ្ជូនរាជធានីភ្នំពេញ បានប្រកាសឲ្យដឹងនារសៀលនេះថា នៅវេលាម៉ោង១៣ និង៣០រសៀល ថ្ងៃទី២៥ ខែតុលា ឆ្នាំ២០២១នេះ កម្រិតកម្ពស់ទឹកស្ទឹងព្រែកត្នោត បានឡើងដល់កម្រិតប្រកាសអាសន្នហើយ និងបានអំពាវនាវឲ្យប្រជាពលរដ្ឋ ប្រុងប្រយ័ត្នផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរសាធារណការបញ្ជាក់ថា “ដោយស្ថានភាពទឹកស្ទឹងព្រែកត្នោតកំពុងកើនឡើង សូមបងប្អូនប្រជាពលរដ្ឋ ដែលកំពុងរស់នៅក្នុងភូមិសាស្ត្រសង្កាត់គង់នយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួស ក្នុងខណ្ឌដង្កោ មេត្តាត្រៀមលក្ខណៈប្រុងប្រយ័ត្ន និងយកចិត្តទុកដាក់ឲ្យបានខ្ពស់ ក្នុងករណីដែលអាចកើតមានទឹកជំនន់ជាយថាហេតុ”។ បើតាមមន្ទីរសាធារណការ ខណៈនេះអាជ្ញាធរ បាននិងកំពុងខិតខំបង្ការ និងទប់ស្កាត់ទឹកជំនន់តាមសណ្ដារស្ទឹងព្រែកត្នោតនេះ។

សូមបញ្ជាក់ថា នៅព្រឹកថ្ងៃទី២៥ ខែតុលា ឆ្នាំ២០២១នេះ លោក ឃួង ស្រេង អភិបាលរាជធានីភ្នំពេញ បានចុះពិនិត្យ និងដឹកនាំបញ្ជាកម្លាំង ដើម្បីទប់ទំនប់សណ្តស្ទឹងព្រែកត្នោត កុំឲ្យលិចលង់លំនៅឋានប្រជាពលរដ្ឋ ខណៈទឹកបានហក់ឡើងខ្លាំង ដល់កម្រិតប្រុងប្រយ័ត្នខ្ពស់ ស្របពេលមានការបើកទ្វារទឹក ពីខេត្តកំពង់ស្ពឺ។ នៅក្នុងឱកាសនោះដែរ លោកអភិបាលរាជធានីភ្នំពេញ បានស្នើសុំទៅដល់ក្រសួងធនទឹក ឲ្យបង្វែរមុខទឹក កុំឲ្យជន់លិចរាជធានីភ្នំពេញ ពីព្រោះវានឹងធ្វើឲ្យប៉ះពាល់សេដ្ឋកិច្ចធ្ងន់ធ្ងរ៕