ស្គាល់អត្តសញ្ញាណ កុមារាពាក់កាតចាក់វ៉ាក់សាំង ចូលរៀន

រូបភាពកុមារាម្នាក់ដែលឈរពាក់ម៉ាស់ ពាក់កាតចាក់វ៉ាក់សាំង នៅក្នុងសាលារៀន មានឈ្មោះ គង់ សីហា អាយុ ៧ ឆ្នាំ រៀនថ្នាក់ទី១ នៅសាលាបឋមសិក្សាជ័យ រស់នៅភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប។ នេះបើតាមការឱ្យដឹងពីនាយិកាសាលាបឋមសិក្សាជ័យ អ្នកគ្រូ សុខ ញ៉ា ប្រាប់កម្ពុជាថ្មី នារសៀលថ្ងៃទី ០២ ខែវិច្ឆិកានេះ។

នាយិកាសាលាបឋមសិក្សាជ័យអ្នកគ្រូ សុខ ញ៉ា បានឱ្យដឹងថា ឪពុករបស់កុមារារូបនេះ ឈ្មោះ ជាង គ័ង ម្តាយឈ្មោះ សាង ធី ជាអ្នកស្រែចម្ការ។

កុមារារូបនេះ ទើបចុះឈ្មោះចូលរៀនកាលពីដើមឆ្នាំ ហើយចូលរៀនបាន១ ខែផ្ទុះជំងឺកូវីដ។ ហើយថា រូបថតដែលថតនោះ គឺក្រុមអង្គការ ចុះមកចែកសម្ភារកាលពីថ្ងៃអាទិត្យទី ៣១ ខែតុលានេះ។

បើតាមអ្នកគ្រូ សុខ ញ៉ា ប្រាប់ថា ស្ថានភាពគ្រួសាររបស់កុមារូបនេះ ស្ថិតក្នុងភាពក្រីក្រ ខណៈដែលមានការជួយឧបត្ថម្ភច្រើនពីសប្បុរសជននានា បន្ទាប់ពីមានការចែកចាយរូបថតតាមបណ្តាញសង្គម។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហោះសារ អមជាមួយនឹងរូបថតមួយសន្លឹក បង្ហាញពីការចូលរៀនរបស់សិស្សានុស្ស ដែលមានរូបកុមារា សុំ សីហា ឈរពាក់ម៉ាសក្នុងសាលាពាក់កាតចាក់វ៉ាក់សាំង អត់ពាក់ស្បែកជើង។

សម្ដេចតេជោបានបង្ហោះខ្លឹមសារទាំងស្រុងថា “ទោះជារូបភាពមួយសន្លឹកនេះខ្ញុំមិនដឹងថានៅទីណា?និងចៅតូចនេះឈ្មោះអី អាយុប៉ុន្មាន? តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។ ប័ណ្ណចាក់វ៉ាក់សាំងពាក់នៅក​បង្ហាញថាខ្ញុំបានចាក់វ៉ាក់សាំងរួចហើយនិងចូលរៀនដោយគ្មានការភ័យខ្លាចជាមួយនិងការពាក់ម៉ាស់បានត្រឹមត្រូវ។
ទោះចៅមិនមានស្បែកជើងពាក់តែតាជឿថាចៅច្បាស់ជាលាងដៃនិងរក្សាអនាម័យបានល្អ”៕

អត្ថបទ៖​ឡេង ដេត