Connect with us

ព័ត៌មានជាតិ

ជាលើកដំបូងដែលលោកទេសរដ្ឋមន្ត្រី ចម ប្រសិទ្ធ ទទួលសញ្ញាប័ត្របណ្ឌិតកិត្តិយស​ពីវិទ្យាស្ថាន​បច្ចេកវិទ្យាគីរីរម្យ​​

បានផុស

នៅ

គួរ​ជាទី​មោ​ទ​ភាព​ក្រៃលែង​ចាប់តាំងពី​ការបង្កើត​វិទ្យាស្ថាន​បច្ចេកវិទ្យា​គីរីរម្យ​មក ការប្រគល់​សញ្ញាប័ត្រ​ប​ណ្ឌិ​ត​កិត្តិយស​ជូន​ចំពោះ​ឥស្សរជន​ដែលមាន​ស្នាដៃ​ឆ្នើម​បាន​ចូលរួមចំណែក​ក្នុងការ​អភិវឌ្ឍ​សង្គមជាតិ​នាឱកាស​នេះ ជា​លើកដំបូង​សម្រាប់​វិទ្យាស្ថាន ដើម្បី​បង្ហាញ​ពី​ការគោរព និង​ទទួលស្គាល់​ស្នាដៃ​ឆ្នើម​ប្រកបដោយ​គុណ​តម្លៃ​ដ៏​ខ្ពង់ខ្ពស់ ព្រមទាំង​វីរភាព​របស់​ឥស្សរ​ជនជាតិ​កម្ពុជា​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅ​ថ្ងៃទី​១១ ខែវិច្ឆិកា ឆ្នាំ​២០២១ ក្រុមប្រឹក្សាភិបាល​នៃ​វិទ្យាស្ថាន​បច្ចេកវិទ្យា​គីរីរម្យ​បានសម្រេច​ប្រគល់​សញ្ញាប័ត្រ​បណ្ឌិត​កិត្តិយស​ផ្នែក​វិទ្យាសាស្ត្រ បច្ចេកវិទ្យា និង​នវានុវត្តន៍ ជូន​ដល់​លោក​កិត្តិ​សេដ្ឋា​បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ សម្រាប់​សមិទ្ធិផល​ដ៏​អស្ចារ្យ ជាច្រើន​របស់​ឯកឧត្ដម​ក្នុង​រយៈពេល​ជាច្រើន​ទសវត្សរ៍​កន្លងមក ដែល​កម្មវិធី​បាន​ប្រព្រឹត្តទៅ​នៅ​ឧទ្យាន​ជាតិ​ព្រះ​សុរាម្រិត​កុ​សមៈ​គីរីរម្យ ខេត្តកំពង់ស្ពឺ​។​

លោក​បណ្ឌិត ឡេង ភី​រម្យ នាយក​វិទ្យាស្ថាន តំណាង​របស់​លោកតា​ កេស៊ិ អ៊ី​ហ្សូ​កាក់ ជា​ស្ថាបនិក​ក្រុមហ៊ុន​អេ​ធូ​អេ ថោ​ន​ខេ​ម​បូ​ឌា និង​ជា​ប្រធាន​ក្រុមប្រឹក្សាភិបាល​នៃ​វិទ្យាស្ថាន បានប្រគល់​សញ្ញាប័ត្រ​ប​ណ្ឌិ​ត​កិត្តិយស​លើក​ទី​១ ដែល​គិត​ចាប់តាំងពី​ការបង្កើតឡើង​របស់​វិទ្យាស្ថាន​បច្ចេកវិទ្យា​គីរីរម្យ​ក្នុង​ឆ្នាំ​២០១៤​កន្លងមក ជូន​លោក​កិត្តិ​សេដ្ឋា​បណ្ឌិត​ទេសរដ្ឋមន្ត្រី រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ដោយ​ផ្អែកលើ​កត្តា​សំខាន់ៗ​ចំនួន​បី​គឺ​៖

• កត្តា​ទី​១៖ លោក​ទេសរដ្ឋមន្ត្រី​គឺ​ឥស្សរជន​ជាន់ខ្ពស់​ដែលមាន​ភាពចាស់ទុំ​ពោរពេញ​ដោយ​បទពិសោធន៍​ក្នុងការ​ដឹកនាំ ស្ថាប័ន​ជាតិ​ពាក់ព័ន្ធ​លើ​វិស័យ​ពាណិជ្ជកម្ម ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ នៅ​កម្ពុជា ដែលជា​ចលករ​ដ៏​ចាំបាច់​សម្រាប់​អង្គការនីតិប្រតិបត្តិ​ក្នុងការ​អភិវឌ្ឍ​ប្រទេសជាតិ និង​លើក​កិត្តិយស​ជាតិ​លើ​ឆាក​អន្តរជាតិ​។​

• កត្តា​ទី​២៖ លោក​ទេសរដ្ឋមន្ត្រី​បាន​ដឹកនាំ​ឥស្សរជន​ថ្នាក់ជាតិ ដើម្បី​ចូលរួម​ព្រឹត្តិការណ៍​សំខាន់ៗ​ដើម្បី​ការពារ​គោលជំហរ របស់​កម្ពុជា​លើ​ឆាក​អន្តរជាតិ និង​ស្វែងរក​បទពិសោធ​ពាក់ព័ន្ធ​វិស័យ​ពាណិជ្ជកម្ម ឧស្សាហកម្ម ថាមពល វិទ្យាសាស្ត្រ បច្ចេកវិទ្យា និង​នវានុវត្តន៍ ជាមួយ​បណ្តា​ប្រទេស​អភិវឌ្ឍ​ជាច្រើន​លើ​ពិភពលោក ដើម្បី​បានជា​ធាតុ​ចូល​សម្រាប់​រៀបចំ​ជា​គោលនយោបាយ​ជាតិ ដើម្បី​ជួយ​ជម្រុញ និង​សម្របសម្រួល​ដល់​វិស័យ​ពាក់ព័ន្ធ ជាពិសេស សហគ្រាស​ធុន​តូច និង​មធ្យម​នៅ​កម្ពុជា​។​

• កត្តា​ទី​៣៖ លោក​ទេសរដ្ឋមន្ត្រី​បាននិងកំពុង​ជំរុញ និង​លើកកម្ពស់​លើ​វិស័យ​ឧស្សាហកម្ម វិទ្យាសាស្ត្រ និង​បច្ចេកវិទ្យា តាមរយៈ​ការអញ្ជើញ​វិញ្ញុជន​ដែលមាន​ចំណេះ​ជំនាញ​ពាក់ព័ន្ធ​វិស័យ​ខាងលើ​ពី​បណ្តា​ស្ថាប័ន​ជាតិ និង​អន្តរជាតិ ឲ្យ​មក​ជុំគ្នា​រៀបចំ​គោលនយោបាយ ផែនការ​យុទ្ធសាស្ត្រ និង​កសាង​ស្ថាន​ប័ន​ជាតិ ដើម្បី​ជួយ​គាំទ្រ និង​លើកកម្ពស់​ស្ថាប័ន​ពាក់ព័ន្ធ​ដែល​កំពុងដំណើរការ​លើ​វិស័យ​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ឲ្យ​កាន់​តែមាន​វឌ្ឍន​ភាពល្អ​ប្រសើរ ដើម្បី​រុញ​នាវា​ជាតិ​កម្ពុជា​ឲ្យ​ប្រែក្លាយ​ពី​ប្រទេស​ដែលមាន​ការអភិវឌ្ឍ​ដោយ​ពឹង​ផ្អែកលើ​វិស័យ​កសិកម្ម​ទៅជា​ប្រទេស​ដែល​ពឹង​ផ្អែកលើ​វិស័យ​ឧស្សាហកម្ម​ស្របតាម​ទិសដៅ​របស់​រាជរដ្ឋាភិបាល​។​

ចាប់តាំងពី​ការបង្កើត​វិទ្យាស្ថាន​បច្ចេកវិទ្យា​គីរីរម្យ​មក ការប្រគល់​សញ្ញាបត្រ​ប​ណ្ឌិ​ត​កិត្តិយស​ជូន​ចំពោះ​ឥស្សរជន​ដែល មាន​ស្នាដៃ​ឆ្នើម​បាន​ចូលរួមចំណែក​ក្នុងការ​អភិវឌ្ឍ​សង្គមជាតិ​នាឱកាស​នេះ ជា​លើកដំបូង​សម្រាប់​វិទ្យាស្ថាន ដើម្បី​បង្ហាញ​ពី​ការគោរព និង​ទទួលស្គាល់​ស្នាដៃ​ឆ្នើម​ប្រកបដោយ​គុណ​តម្លៃ​ដ៏​ខ្ពង់ខ្ពស់ ព្រមទាំង​វីរភាព​របស់​ឥស្សរ​ជនជាតិ​កម្ពុជា​៕

អត្ថបទ៖ វិមាន​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម