Connect with us

ព័ត៌មានជាតិ

បើក​ការដ្ឋាន​ជួសជុល​កំណាត់​ផ្លូវ​ជាង​៦​គីឡូម៉ែត្រ​ ឆ្លងកាត់​ខណ្ឌ​៣​នៅ​ជាយក្រុង ជា​ចំណងដៃ​របស់​សម្ដេច​តេ​ជោ​ហ៊ុនសែន

បានផុស

នៅ

ភ្នំពេញ ​៖ កំណាត់​ផ្លូវ​ប្រវែង​ជាង​៦​គីឡូម៉ែត្រ​ឆ្លងកាត់​ខណ្ឌ​ចំនួន​៣​នៃ​រាជធានី​ភ្នំពេញ ដែលជា​ចំណងដៃ​របស់​សម្ដេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ត្រូវបាន​រដ្ឋបាល​រាជធានី​ភ្នំពេញ​បើក​ការដ្ឋាន​ជួសជុល​ឡើងវិញ​ក្រោយពី​កំណាត់​ផ្លូវ​នេះ​បាន​ទទួលរង​ការខូចខាត​ដោយ​ជំនន់​ទឹកភ្លៀង​នាពេល​កន្លងមក​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធី​បើកការ​ដ្ឋាន​នេះ​ត្រូវ​បាន​ធ្វើឡើង នា​ព្រឹក​ថ្ងៃទី១២ ខែវិច្ឆិកា​ ឆ្នាំ​២០២១​នេះ ក្រោម​អធិបតីភាព​លោក​ឃួ​ង ស្រេង​ អភិបាល​នៃ​គណៈ​អភិបាល​រាជធានី​ភ្នំពេញ​នៅ​ភូមិ​ស្រែ​រា​ជ្ជៈ​ សង្កាត់​សំរោងក្រោម​ខណ្ឌ​ពោធិ៍​សែន​ជ័យ​។

លោក​ឃួ​ង ស្រេង បាន​មានប្រសាសន៍​លើក​ឡើង​ថា ក្រោយ​ផ្ទុះ​ព្រឹត្តិការណ៍​ជំងឺ​កូ​វីដ​-១៩ ការដ្ឋាន​មួយចំនួន​ត្រូវ​បាន​ផ្អាក ប៉ុន្តែ​ក្រោយពី​សម្ដេច​អគ្គមហាសេនាបតី​តេ​ជោ​ហ៊ុនសែន បានសម្រេច​បើក​ប្រទេស​ជា​ប្រក្រតី​ឡើងវិញ​នោះ នេះ​គឺជា​ការដ្ឋាន​ទី​១​ហើយ​ដែល​រដ្ឋបាល​រាជធានី​ភ្នំពេញ បាន​បើក​ឲ្យ​ដំណើរការ​ស្ថាបនា​ផ្លូវ​ជាង​៦ គីឡូម៉ែត្រ​នេះ​ឡើងវិញ​។

លោក​ឃួ​ង ស្រេង​បាន​បន្ត​ទៀត​ថា កំណាត់​ផ្លូវ​១​ខ្សែ​នេះ គឺជា​ចំណងដៃ​របស់​សម្ដេច​តេ​ជោ​ហ៊ុនសែន​ជូន​ដល់​បងប្អូន​ប្រជាពលរដ្ឋ​នៅ​ក្នុង​រាជធានី​ភ្នំពេញ ពិសេស បងប្អូន​ប្រជាពលរដ្ឋ​ដែល​រស់​នៅ​ក្នុង​សង្កាត់​និង​ខណ្ឌ​ចំនួន​៣ ដែល​មាន​ដូចជា​ខណ្ឌ​ពោធិ៍​សែន​ជ័យ ខណ្ឌ​កំបូល និង​ខណ្ឌ​ព្រែក​ព្នៅ​។

លោក​ឃួ​ង ស្រេង​បន្ត​ទៀត​ថា សម្តេច​តេ​ជោ​មិន​ត្រឹមតែ​រំដោះ​ប្រទេសជាតិ​ពី​ចំណុចសូន្យ​និង​ធ្វើការ​អភិវឌ្ឍ​ប្រទេសជាតិ​ឲ្យ​មានការ​រីកចម្រើន​រុងរឿង​ប៉ុណ្ណោះ​ទេ។ តែ​សម្ដេច​បាន​គិតគូរ​ពី​សុខទុក្ខ​បងប្អូន​ប្រជាពលរដ្ឋ ថែមទៀត​។ ជាក់​ស្តែង​នៅ​ដំណាក់កាល​នៃ​ការ​រីក​រាលដាល​ជំងឺ​កូ​វីដ​-១៩​នេះ សម្ដេច​បាន​ខិតខំ​ស្វះស្វែង​គ្រប់​មធ្យោបាយ​ដើម្បី​រក​វ៉ាក់សាំង​ការពារ​កូ​វីដ​-១៩ មក​ចាក់​ជូន​បងប្អូន​ប្រជាពលរដ្ឋ​ឲ្យ​បាន​គ្រប់គ្នា​នៅ​ទូទាំង​ព្រះរាជាណាចក្រ​កម្ពុជា​។

ពាក់ព័ន្ធ​នឹង​ការចាក់​វ៉ាក់សាំង​នេះ​ផង​ដែរ លោក​ឃួ​ង ស្រេង ក៏បាន​អំពាវនាវ​ឲ្យ​បងប្អូន​ប្រជាពលរដ្ឋ​ដែល​មិនទាន់​បានទទួល​ការចាក់​វ៉ាក់សាំង​ទាំង​ដូ​ស​ទី​១ ដូ​ស​ទី​២ និង​ដូ​ស​ជំរុញ សូម​ទៅ​ទទួល​ការចាក់​សាំង​នៅតាម​មណ្ឌល​សុខភាព​នានា​នៅក្នុង​ខណ្ឌ​របស់​ខ្លួន ហើយ​អាជ្ញាធរ​ក៏​ត្រូវតែ​សម្រួល​ទៅដល់​បងប្អូន​ប្រជាពលរដ្ឋ​ដើម្បី​បាន​ទទួល​ការ​ចាក់​វ៉ាក់សាំង​នេះ​ឲ្យ​បាន​គ្រប់គ្នា​។​

​លោក ហែម ដា​រិ​ទ្ធិ អភិបាល​នៃ​គណៈ​អភិបាលខណ្ឌ​ពោធិ៍​សែន​ជ័យ បាន​មានប្រសាសន៍​លើកឡើង​ថា ​កំណាត់​ផ្លូវ​១​ខ្សែ​ដែល​បាន​បើក​ការដ្ឋាន​ជួសជុល​ខាងលើ​នេះ​ មាន​ប្រវែង​៦,៤៩០​ម៉ែត្រ​នៅ​ក្នុង​ភូមិសាស្ត្រ​អន្តរ​ខណ្ឌ​គឺ សង្កាត់​សំរោងក្រោម ខណ្ឌ​ពោធិ៍​សែន​ជ័យ សង្កាត់​ស្ងោរ ខណ្ឌ​កំបូល និង សង្កាត់​ព​ន្សាំ​ង​ខណ្ឌ​ព្រែក​ព្នៅ ដោយ​គិត​ចាប់ពី​មហាវិថី ឈ្នះ​ឈ្នះ ភូមិ​ស្រែ​រា​ជ្ជៈ សង្កាត់​សំរោងក្រោម ខណ្ឌ​ពោធិ៍​សែន​ជ័យ ដល់​ផ្លូវ​លេខ​៤២ ភូមិ​ន្នំ សង្កាត់​ព​ន្សំ​ង​ខណ្ឌ​ព្រែក​ព្នៅ ជា​ផ្លូវដី (​កាលពីមុន​ស្ថិតក្នុង​ខណ្ឌ​ពោធិ៍​សែន​ជ័យ​)​។

លោក​បន្ត​ថា នៅ​ក្នុង​ឆ្នាំ២០១៩ និង​ឆ្នាំ​២០២០ ដោយ​បញ្ញា​ជំនន់​ទឹកភ្លៀង​បាន​ធ្វើ​ឲ្យ​កំណាត់​ផ្លូវ​នេះ​ទទួលរង​ការខូចខាត​ធ្ងន់​។ ​ដោយ​មើល​ឃើញ​ពី​ទុក​លំបាក​របស់​បងប្អូន​ប្រជាពលរដ្ឋ​លោក​ឃួ​ង ស្រេង​ក៏បាន​លើក ផែនការ​ជួសជុល​ផ្លូវ​នេះ​ក្នុង​គម្រោង​អភិវឌ្ឍន៍​រាជធានី​ភ្នំពេញ សម្រាប់​ឆ្នាំ ២០២០ ប៉ុន្តែ​ដោយសារ​ការរីក​រាលដាល​នៃ​ជំងឺ​កូ​វីដ​-១៩ គម្រោង​ភាគច្រើន ត្រូវបាន​ផ្អាក ដោយ​បង្វែរ​ថវិកា​ទៅ​ប្រយុទ្ធ​ប្រឆាំងនឹង​ជំងឺ​កូ​វីដ​-១៩​វិញ​។ សម្រាប់​ឆ្នាំ​២០២១​នេះ​លោក​ឃួ​ង ស្រេង ក៏បាន​សម្រេច​ជាគោលការណ៍ បើក​ការ​រដ្ឋា​ន ជួសជុល​ផ្លូវ​ខាងលើ​នេះ ឡើង​វី​ញ​ជូន​ដល់​បងប្អូន​ប្រជាពលរដ្ឋ ដែល មាន​សាច់​ផ្លូវ​ទំហំ​១២ ម៉ែត្រ​និង​ដាក់​ប្រព័ន្ធ​លូ​សងខាង​ផ្លូវ​ផង​ដែរ​ ៕

ដោយ ៖ ស្រីរ័ត្ន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម