សម្ដេចតេជោ ហ៊ុន សែន បន្តអំពាវនាវឲ្យយកចិត្តទុកដាក់លើមនុស្សចាស់ ខណៈរដូវរងា នឹងឈានចូលមកដល់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តអំពាវនាវឲ្យយកចិត្តទុកដាក់លើមនុស្សចាស់ ខណៈ​ដែល​រដូវ​​រងា នឹងឈានចូលមកដល់ក្នុងពេលឆាប់ៗនេះ។

សម្ដេចតេជោ ហ៊ុន សែន បានថ្លែងក្នុងពិធីសម្ពោធ ដាក់ឲ្យប្រើប្រាស់ជាផ្លូវការស្ពានឆ្លងទន្លេមេគង្គ ស្ពានមិត្តភាពកម្ពុជា​-ចិន ស្ទឹងត្រង់-ក្រូចឆ្មារ នាព្រឹកថ្ងៃទី ២៣ ខែវិច្ឆិកានេះថា រដូវរងានឹងឈានចូលមកដល់ហើយ ដូច្នេះ​គ្រួសារ​នីមួយៗ ត្រូវយកចិត្តទុកដាក់ចំពោះមនុស្សចាស់នៅក្នុងគ្រួសារ ដែលជាឪពុក-ម្ដាយ និងជីដូនជីតារបស់ខ្លួន ដែល​ពួកគាត់ចាញ់​រងា។

ចំណែកអាជ្ញាធរមានសមត្ថកិច្ចទូទាំងប្រទេស ត្រូវយកចិត្តទុកដាក់ចំពោះមនុស្សចាស់ដែលគ្មានទីពឹង ដោយ​ត្រូវ​ផ្ដល់ភួយ មុង និងសម្ភារៈផ្សេងទៀត ជូនពួកគាត់។ នៅក្នុងរដូវចុះត្រជាក់នេះ ក៏ត្រូវពិនិត្យមើលផងដែរ ចំពោះ​ការ​ឆ្លង​រាលដាលជំងឺកូវីដ-១៩៕