អាចារ្យខ្មែរជាង១ម៉ឺននាក់ទទួលការ​បណ្តុះបណ្តាល​ទូទាំងប្រទេស

គិតត្រឹមឆ្នាំ២០២១នេះ ក្រសួងធម្មការ និងសាសនាបានបណ្តុះបណ្តាលអាចារ្យ អាចាររិនីខ្មែរបានប្រមាណជាង១ម៉ឺននាក់នៅទូទាំងប្រទេស។

លោក សេង សុមុនី អ្នកនាំពាក្យក្រសួងធម្មការនិងសាសនាបានឱ្យដឹងថា ក្រសួងបានបណ្តុះបណ្តាលអាចារ្យនិងអាចារិនីបានចំនួន ១០ ៧៧០ នាក់ក្នុងនោះមានព្រះសង្ឃចំនួន ៦១ អង្គ និងអាចារិនីចំនួន ១៤៦ នាក់ ដោយចាប់ផ្តើមបណ្តុះបណ្តាលលើកទី១ នៅថ្ងៃទី២៤ខែមិថុនាឆ្នាំ២០១០ រហូតមកដល់ឆ្នាំ២០២១សរុបចំនួន៣៦វគ្គ។ វគ្គទី៣៦នេះមាន​រយៈពេល​ ៤ ថ្ងៃ ដោយចាប់ពីថ្ងៃទី២៣ដល់ថ្ងៃទី២៦ខែវិច្ឆិកាឆ្នាំ២០២១ មានសិក្ខាកាមអាចារ្យចូលរួមទាំងអស់ចំនួន ៩៨ រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា សម្រាប់ឆ្នាំ២០២១នេះ ក្រសួងបើកវគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរជំនាន់ទី៣៦ តាមប្រព័ន្ធអនឡាញ(ហ្សូម)ដោយសារតែបញ្ហាជំងឺកូវីដ១៩។ ការបើកវគ្គបណ្តុះបណ្តាលដល់អាចារ្យនេះដើម្បីឱ្យពួកគាត់មានការទទួលខុសត្រូវ និងរក្សាបាននូវគុណធម៌ខ្ពស់ ចៀសវាងការប្រព្រឹត្តខុសឆ្គង ប្រកាន់បក្សពួកដែលធ្វើឲ្យប៉ះពាល់ដល់សេចក្តីថ្លៃថ្នូររបស់អាចារ្យ-អាចារិនីខ្មែរ។

លោកបានបន្ថែមទៀតថា មិនត្រឹមតែប៉ុណ្ណោះដើម្បីឱ្យពួកគាត់បំពេញតួនាទីឲ្យបានល្អប្រសើរ សក្តិសមជាអ្នកដឹកនាំកិច្ចពិធី អ្នកបង្ហាត់បង្រៀនអ្នកពន្យល់បង្ហាញ និងជាបុគ្គលដែលគួរគោរព និងចូលរួមក្នុងការថែរក្សានូវកេរ្តិ៍មរតកវប្បធម៌ព្រះពុទ្ធសាសនា និងប្រពៃណីទំនៀមទម្លាប់ខ្មែរ ឲ្យបានស្ថិតស្ថេរគង់វង្ស ដើម្បីរួមចំណែកលើកស្ទួយ វិស័យព្រះពុទ្ធ-សាសនាឲ្យបានថ្កុំថ្កើងរុងរឿង។

គួរបញ្ជាក់ថា ឆ្នាំ២០២០មានអាចារ្យ អាចារិនីចំនួន១៦៩៦៧នាក់ នៅទូទាំងប្រទេស៕

អត្ថបទ៖ សំអឿន