យុទ្ធភណ្ឌមិនទាន់ផ្ទុះ ៥ គ្រាប់ ត្រូវបានប្រមូលពីរណ្តៅ ក្រោយឈ្មួញកាយដីលក់ ប្រទះឃើញ

ខេត្តតាកែវ៖ យុទ្ធភណ្ឌមិនទាន់ផ្ទុះចំនួន ៥ គ្រាប់ត្រូវបានកម្លាំងជំនាញចុះទៅប្រមូលយកមកបំផ្លាញចោល ក្រោយពីប្រទះឃើញនៅរណ្តៅដីដែលកំពុងធ្វើអាជីវកម្មយកអាចម៍ដីលក់។ 

ការចុះទៅប្រមូលពីសំណាក់សមត្ថកិច្ចជំនាញនេះ ធ្វើឡើងបន្ទាប់ពីមានសេចក្តីរាយការណ៍ពីឈ្មួញរកស៊ីកាយដីលក់បានប្រទះឃើញកាលពីថ្ងៃទី ៦ ខែធ្នូ ឆ្នាំ ២០២១ ដោយកម្លាំងជំនាញការិយាល័យគ្រប់គ្រងអាវុធគ្រឿងផ្ទុះ ជាតិផ្ទុះ នៃស្នងការដ្ឋាននគរបាលខេត្តតាកែវ សហការជាមួយកម្លាំងប៉ុស្តិ៍នគរបាលរដ្ឋបាល លាយបូរ រួមជាមួយកម្លាំងជំនាញអង្គភាពកំចាត់មីន ស៊ីម៉ាក់។ ទីតាំងស្ថិតនៅចំណុចរណ្តៅដីក្នុងភូមិសែនបន ឃុំលាយបូរ ស្រុកត្រាំកក់ ខេត្តតាកែវ។

យុទ្ធភណ្ឌមិនទាន់ផ្ទុះសល់ពីសម័យសង្គ្រាមទាំង ៥ គ្រាប់នោះរួមមាន គ្រាប់ត្បាល 60 M ចំនួន ២ គ្រាប់ គ្រាប់បែកដៃចំនួន ១ គ្រាប់ គ្រាប់ M79 ចំនួន ១ គ្រាប់ និងគ្រាប់ទម្លាក់ពីយន្តហោះប្រភេទ M117 ចំនួន ១ គ្រាប់។

បច្ចុប្បន្នយុទ្ធភណ្ឌមិនទាន់ផ្ទុះទាំង ៥ គ្រាប់ត្រូវបានប្រមូលពីរណ្តៅដីដែលប្រទះឃើញនោះ យកមករក្សាទុកដើម្បីធ្វើការបំផ្លាញចោលនៅការិយាល័យជំនាញនៃស្នងការដ្ឋាននគបាលខេត្តតាកែវនៅពេលក្រោយ៕

អត្ថបទ៖ វីរៈ