ដល់​រដូវ​ប្រមូលផល​ត្រីប្រហុក​ មន្ត្រីជលផល​រំពឹងថា ឆ្នាំនេះ​ត្រីសម្បូរដូចឆ្នាំមុន

ក្នុងកំលុងខែធ្នូ ជារៀងរាល់ឆ្នាំ ជាពេលវេលាមួយ ដែលត្រីចាប់ផ្តើមចេញពីបឹងទន្លេសាប ចុះមក​តាម​ដង​ទន្លេសាប និងទៅតាមតំបន់ដទៃទៀត។

អំឡុងពេលនេះ ក៏ជាពេលវេលាដែល​ប្រជាពលរដ្ឋខ្មែរ​ចាប់​ផ្តើមនាំគ្នាគិតគូរ ពីការប្រមូលទិញ​ត្រីធ្វើប្រហុកផ្អកត្រៀមទុកបរិភោគ។

មន្ត្រីរដ្ឋបាលជលផល នៃ​ក្រសួងកសិកម្ម រុក្ខាប្រមាញ់ និង​នេសាទ បានឱ្យដឹងថា ក្រុមការងាររដ្ឋបាលជលផលកំពុងតាមដានពីពេលវេលាជាក់លាក់ត្រីចាប់ផ្ដើមចុះមកពីបឹងទន្លេសាប ដើម្បីឱ្យប្រាកដថាតើ ត្រីចុះមក​កម្រិតប៉ុនណា ប៉ុន្មានថ្ងៃ គឺនៅតាមដានពីទន្លេសាបមក ហើយទម្រាំចុះមកដល់ គឺ ៣ ទៅ ៤ ថ្ងៃ។

តាមការបង្ហើបឱ្យដឹងពីមន្ត្រីជលផល ត្រីឆ្នាំនេះ អាចមានច្រើនមិនតិចជាងឆ្នាំមុននោះទេ ដោយសារមើលឃើញស្ថានភាពពីប្រជាពលរដ្ឋនេសាទបាន ដោយការរាយមង និងដាក់លប ក៏ប៉ុន្តែក៏មិនទាន់សន្និដ្ឋានបានដែរ ពីព្រោះអ្វីៗ ទាក់ទងនឹងអាកាសធាតុ ប្រសិនបើភ្លៀងធ្លាក់មក ដាយក៏ចាប់មិនបានដែរ ហើយបើដាយចាប់មិនបាន គឺចាល់ទៅលើ​ប្រជាពលរដ្ឋ​រាយមង​នោះវិញ។

លោក ហុង ហ៊ី ប្រធាននាយកដ្ឋានកិច្ចការរដ្ឋបាល និងនីតិកម្ម នៃរដ្ឋបាលជលផល បានប្រាប់ថា រដូវប្រមូលផលត្រីប្រហុកបានមកដល់ហើយ ប៉ុន្តែមិនទាន់កំណត់ពេលវេលាជាក់លាក់ថ្ងៃ​ដែលត្រីចុះច្រើន អំឡុងពេល ប៉ុន្មានថ្ងៃខាងមុខឆាប់ៗនេះ លោកបញ្ជាក់ថា លោកមិនទាន់អាចកំណត់​បានពីសន្ទុះត្រី ដែលចុះមកពីបឹងទន្លេសាបកម្រិតណានៅឡើយនោះទេ រង់ចាំតាមដាននៅ ប៉ុន្មានថ្ងៃខាងមុខនេះ។ សូមជំរាបថា ការប្រមូលផលត្រីសម្រាប់ធ្វើប្រហុកផ្អក ក្នុងឆ្នាំ២០២០ មានចំនួន ៩,៩០០តោន៕

អត្ថបទ៖ ឡេង ដេត