ព័ត៌មានជាតិ

អំណោយ សម្ដេចប្រធានរដ្ឋសភា បានផ្តល់ជូនពលរដ្ឋរងគ្រោះដោយទឹកជំនន់ នៅសង្កាត់វាលស្បូវ

បានផុស

៦ years មុន

នៅ

ថ្ងៃសៅរ៍ ២៤ តុលា ២០២០

ដោយ

ប្រជាពលរដ្ឋដែលបានទទួលរងគ្រោះទឹកជំនន់ទឹកភ្លៀងចំនួន៥៥១គ្រួសារ ក្នុងសង្កាត់វាលស្បូវ បានទទួលអំណោយសប្បុរសធម៌របស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា និង សម្តេចធម្មវិសុទ្ធវស្សា សៅ ទី ហេង សំរិន តាមរយៈ លោកជំទាវ ឡោក ខេង សមាជិការដ្ឋសភា និងជាប្រធានក្រុមការងារចុះជួយខណ្ឌច្បារអំពៅ កាលពីព្រឹកថ្ងៃទី២៤តុលានេះ នៅក្នុងបរិវេណវត្តវាលស្បូវ ខណ្ឌច្បារអំពៅ។

លោក ចេង មុនីរ៉ា អភិបាលខណ្ឌច្បារអំពៅ បានឲ្យដឹងថា ក្នុងមួយរយៈកាលកន្លងមកនេះ មូលដ្ឋានសង្កាត់វាលស្បូវ មានប្រជាពលរដ្ឋចំនួន៥៥១គ្រួសារ បានទទួលរងគ្រោះដោយសារទឹកជំនន់ទឹកភ្លៀង បង្កឲ្យផ្ទះមួយចំនួនធំរងនូវការលិចលង់ និង បង្ខំប្រជាពលរដ្ឋមួយចំនួនមករស់នៅតាមទីទួលសុវត្ថិភាព។

កន្លងមកនេះដែរ លោកអភិបាលខណ្ឌ និងមន្ត្រីសង្កាត់ភូមិ តែងបានចុះជាប់ជាប្រចាំ ជាមួយប្រជាពលរដ្ឋរងគ្រោះ ដោយមិនគិតយប់ថ្ងៃ និងដោះស្រាយជូនពួកគាត់ជាស្បៀងអាហារ និងសម្ភារៈចាំបាច់មួយចំនួនបានទាន់ពេលវេលា។

លោកជំទាវ ឡោក ខេង ក្នុងនាម សម្ដេចអគ្គមហាពញាចក្រី ហេង សំរិន និង សម្តេចធម្មវិសុទ្ធវស្សា សៅទី ហេងសំរិន បានសំដែងក្តីអាណិតអាសូរ ចំពោះប្រជាពលរដ្ឋរងគ្រោះទាំងអស់។

លោកជំទាវ បានបន្តថា នេះគឺជាគ្រោះធម្មជាតិ ដែលមិនអាចទប់ស្កាត់បានឡើយ។ សូមបងប្អូនយើងមានការប្រុងប្រយ័ត្នឲ្យខ្ពស់ ជាពិសេសកូនចៅ កុំបណ្តោយឲ្យលេងទឹក ចៀសវាងការលង់ទឹកជាយថាហេតុ។