Connect with us

ព័ត៌មានជាតិ

ខេត្តតាកែវមានរោងចក្រផលិតទឹកដោះគោស្រស់ធំជាងគេនិងដំបូងបង្អស់នៅកម្ពុជា​

បានផុស

នៅ

ខេត្តតាកែវ​មាន​រោងចក្រ​ផលិត​ទឹកដោះគោ​ស្រស់​ធំជាងគេ​ និង​ដំបូងបង្អស់​នៅ​កម្ពុជា ​ក្នុង​ការ​ផលិត​ផល​ទឹកដោះគោ​ស្រស់និង​កែច្នៃ​សម្រាប់​ទីផ្សារ​ក្នុងស្រុក​ដោយ​ក្នុង​១​ថ្ងៃ​ផលិត​បាន​១​ម៉ឺន​លីត្រ​។​

ថ្លែង​ក្នុងឱកាស​ដឹកនាំ​គណៈប្រតិភូ​ចុះ​សិក្សា​ស្វែងយល់​អំពី​សង្វាក់​ផលិតកម្មផលិត​ទឹកដោះគោ​ស្រស់ ១០០% ម៉ាក​សញ្ញា (​គិរី​សួគ៌​) ស្ថិតនៅ​ឃុំ​កណ្ដឹង ស្រុក​បាទី​កាលពី​ម្សិលមិញ លោក អ៊ូច ភា អភិបាល នៃ​គណៈ​អភិបាល​ខេត្តតាកែវ បាន​ថ្លែង​ការកោតសរសើរ​ចំពោះក្រុមហ៊ុន Khmer Fresh Milk Co., Ltd. ដែល​បាន​បោះទុន​លើ​ការផលិត​ទឹកដោះគោ​ស្រស់ ប្រកបដោយ​គុណភាព​ខ្ពស់​ដែលជា​ស្នាដៃ​កូន​ខ្មែរ​ពិត ១០០% នៅក្នុង​ទឹកដី​នៃ​ខេត្តតាកែវ ។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក​អភិបាលខេត្ត​បាន​មានប្រសាសន៍ថា ​រោងចក្រ​ផលិត​ទឹកដោះគោ​ស្រស់​នេះ ពិតជា​នឹងចូលរួម​ចំណែក​ក្នុងការ​ផ្គត់​ផ្គង ផលិតផល​ទឹកដោះគោ​ស្រស់ និង​កែច្នៃ​សម្រាប់​ទីផ្សារ​ក្នុងស្រុក​។ មិនតែ​ប៉ុណ្ណោះគម្រោង​នឹង​ជួយ​នាំយក​បច្ចេកវិទ្យា​ទំនើប ទាន់សម័យ វៃឆ្លាត និង​ចុងក្រោយមក​ប្រើ​ក្នុងការ​ចិញ្ចឹម និង​ផលិត​ទឹកដោះធានា​គុណភាព និង​សុវត្ថិភាព ឈានទៅ​ធានា​សុខភាព​អ្នក​បរិភោគ និង​អាហារូបត្ថម្ភ​សម្រាប់​កុមារ​។​

បើតាម​ការបញ្ជាក់​ពី​តំណាង​កសិដ្ឋាន​គី​រី​សួរ​នេះ​ បានឱ្យដឹងថា កសិដ្ឋាន​ចិញ្ចឹម​គោ​ទឹកដោះ​ទំនើប​ទាន់​សម័យនេះ វា​ពិត​ធំជាងគេ​និង​ដំបូងបង្អស់​នៅ​កម្ពុជា ដែល​ប្រើប្រាស់​បច្ចេកវិទ្យា​ចុងក្រោយ​របស់​ប្រទេស​អី​ស្រា​អែល ​ទាំង​ការចិញ្ចឹម ការដាំ​ស្មៅ​ ជា​ចំណី​លើ​ផ្ទៃដី ២០០​ហិកតា រចនាសម្ព័ន្ធ​ស្រោចស្រព(​ប្រើ​ប្រព័ន្ធ​បច្ចេកវិទ្យា​កសិកម្ម​វៃឆ្លាត​) ប្រព័ន្ធ​ផ្គត់ផ្គង់​ទឹក អគ្គិសនី ផ្លូវ​រោងចក្រ​កែច្នៃ​ទឹកដោះ អគារ​រដ្ឋបាល អគារ​ផលិត​ចំណី ឃ្លាំង​ចំណី កន្លែង​ថែរក្សា និង​សម្លាប់​មេរោគ (Pasteurized milk) និង​ស្រះ​ស្តុក​ទឹក (២២០០០​ម៉ឺន​ម៉ែត្រគូប​)​។​ល​។​

តំណាង​កសិដ្ឋាន​គី​រី​សួរ​បាន​បន្តថា ​បច្ចុប្បន្ន គោ​ចំនួនជាង​៩០០​ក្បាលត្រូវបាន​នាំចូល ក្នុងនោះ​គោ​ចំនួន៥០០​ក្បាល​ចាប់ផ្តើម​ផ្តល់​ទឹកដោះ​បាន​ចន្លោះ​ពី​២០​ទៅ​៣០​លីត្រ​/​ថ្ងៃ ជា​មធ្យម​កសិដ្ឋាន​ផលិត​ទឹកដោះ​បាន ១​ម៉ឺន​លីត្រ ល​/​ថ្ងៃ​។​

ចំណែក​ចំណី (​ស្មៅ និង​ពោត​) ដាំ​ខ្លួនឯង ដោយឡែក​សណ្តែកសៀង និង​កាក​ស្រា​បៀ​ប្រមូល​ទិញ​ក្នុងស្រុក​។ ចំពោះ​សុខភាព​សត្វរាល់​សត្វ​នីមួយៗ​ត្រូវបាន​បំពាក់​ដោយ​សេន​ស័​រ​(Sensor)​និង​លេខ​កូដ​នៅ​ជើងហើយ​ភ្ជាប់​ទៅ​ប្រព័ន្ធ​ត្រួតពិនិត្យ​សុខភាពក្នុងករណី​គោ​ណាមួយ​មាន​បញ្ហា​សុខភាព​វា​នឹង​បង្ហាញ​ប្រាប់ជាបន្ទាន់​គេ​នឹង​ចាត់វិធានការ​ត្រួតពិនិត្យ​តាម​លក្ខណ​:​បច្ចេកទេស​ច្បាស់លាស់​មួយ​បាន​ទាន់ពេល និង​មាន​ប្រសិទ្ធភាព​។​

តំណាង​កសិដ្ឋាន​គី​រី​សួរ​បាន​បន្តទៀតថា​ បច្ចុប្បន្នកសិដ្ឋាន​មាន​មន្ត្រី បុគ្គលិក និង​កម្មករ​ក្នុងស្រុក​ចំនួន៦០​នាក់ និង​មន្ត្រី​ជំនាញ​បច្ចេកទេស​គ្រប់ផ្នែក​ចំនួន​៦​នាក់​ ក្នុងនោះ​មាន​ជនជាតិ​អី​ស្រា​អែល៤ និង​រុស្សី២នាក់៕

អត្ថបទ៖ ​សំអឿន​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម