សាស្ត្រាចារ្យ ធ្វើកំណែប្រឡងបាក់ឌុប ៩នាក់ ត្រូវបានរកឃើញវិជ្ជមានកូវីដ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា សាស្រ្ដចារ្យនៅទូទាំងប្រទេសជាង ៨ពាន់នាក់ ដែលធ្វើដំណើរមកកាន់រាជធានីភ្នំពេញ ដើម្បីធ្វើកំណែវិញ្ញាសាប្រឡងបាក់ឌុប មានការរកឃើញវិជ្ជមានជំងឺកូវីដ-១៩ ចំនួន ៩នាក់ប៉ុណ្ណោះ។

សម្ដេចតេជោ ហ៊ុន សែន បានថ្លែងក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុងប្រវែង ១៤៨គីឡូម៉ែត្រ នាព្រឹកថ្ងៃទី ៣ ខែមករា ឆ្នាំ ២០២២នេះថា តាមរាយការណ៍ របស់រដ្ឋមន្ត្រីក្រសួងអប់រំ យុវជន និងកីឡា បានឲ្យដឹងថា មានសាស្រ្ដចារ្យចំនួន ៩នាក់ ​នៅពេលធ្វើតេស្ដរហ័ស ត្រូវបានរកឃើញវិជ្ជមានកូវីដ-១៩ នៅក្នុងចំណោមសាស្រ្ដចារ្យជាង ៨ពាន់នាក់ ដែលមករាជធានីភ្នំពេញ ដើម្បីធ្វើកំណែវិញ្ញាសាប្រឡងបាក់ឌុប។

សាស្រ្ដចារ្យទាំង ៩នាក់នោះ ត្រូវបានដាក់ឲ្យនៅដាច់ដោយឡែក និងបន្តពិនិត្យ និងតាមដានបន្តទៀត។ ជាមួយគ្នានេះ សម្ដេចតេជោនាយករដ្ឋមន្ត្រី ក៏បានឲ្យដឹងដែរថា នៅពេលប្រឡងបាក់ឌុប គឺមានសិស្សចំនួនតែ ៣នាក់ប៉ុណ្ណោះ ដែលរកឃើញវិជ្ជមានកូវីដ-១៩ ហើយក៏ត្រូវអនុញ្ញាតឲ្យប្រឡង នៅកន្លែងព្យា​បាលជំងឺកូវីដ-១៩ ផងដែរ៕

អត្ថបទ៖ ឃួន សុភ័ក្រ