ចំណូលពន្ធដារ និងពន្ធគយសរុបជាង ៤៥០០​លានដុល្លារ អាចទ្រទ្រង់សេដ្ឋកិច្ចជាតិ​ទោះស្ថិតក្នុងវិបត្តិកូវីដ

នៅឆ្នាំ២០២១កន្លងទៅ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបាន ២,២៩៤លានដុល្លារ ស្មើនឹង៩៧.១០%នៃផែនការ។ ចំណែកឯកអគ្គនាយកដ្ឋានពន្ធដារប្រមូលបាន ២,២៤៣លានដុល្លារ លើសផែនការ ស្មើនឹង ១២៤.០២% ។ ដូច្នេះសរុបទាំងពីរផ្នែកកម្ពុជារកចំណូលបានជាង ៤៥០០លានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានថ្លែងនៅក្នុងពិធីបើកការដ្ឋានគម្រោងសាងសង់ លើកកម្រិតគុណភាព ផ្លូវជាតិលេខ៤៨ ប្រវែង១៤៨គីឡូម៉ែត្រ ក្រោមឥណទានសម្បទានពីរដ្ឋាភិបាលកូរ៉េខាងត្បូង នៅព្រឹកថ្ងៃទី៣ ខែមករា ឆ្នាំ២០២២ នៅខេត្តកោះកុងថា ការងើបឡើងចំណូលចុងឆ្នាំនេះ គឺជាសញ្ញាល្អរបស់កម្ពុជា។

សម្តេចបន្តថា« កំណើនសេដ្ឋកិច្ចរបស់យើង ស្ថិតនៅក្នុងរង្វង់៣%… ខែ៣ ទើបយើងកំណត់ចុងក្រោយ ប៉ុន្តែជាទូទៅ នៅក្នុងរង្វង់ ៣%ហើយ ដូច្នេះយើងខំទាំងអស់គ្នា ធ្វើយ៉ាងណា ចលនាកុំឲ្យមានកូវីដនេះ គឺជាដំណើររុញនៃកំណើនសេដ្ឋកិច្ចឡើងវិញ»។

សូមបញ្ជាក់ថា សេដ្ឋកិច្ចកម្ពុជា មានកំណើនងើបឡើងវិញគ្រប់វិស័យ ក្រោយរាជរដ្ឋាភិបាល បានសម្រេចបើកប្រទេសកាលពីខែវិច្ឆិកា ឆ្នាំ ២០២១ បន្ទាប់ពីបានចាក់វ៉ាក់ដល់ពលរដ្ឋ គ្រប់ផែនការកំណត់ និងជោគជ័យក្នុងការទប់ស្កាត់ ការរីករាយដាលជំងឺកូវីដ-១៩ ទ្រង់ទ្រាយធំ ឲ្យធ្លាក់ចុះការឆ្លងត្រឹមក្រោម ១០នាក់ ក្នុង១ថ្ងៃ។

មន្រ្តីជំនាញប៉ាន់ស្មានថា សេដ្ឋកិច្ចកម្ពុជាអាចនឹងហក់ឡើងដល់ ៧%វិញ នៅឆ្នាំ ២០២៤ខាងមុខ ប្រសិនបើអាចគ្រប់គ្រងវិបត្តិកូវីដ-១៩ បាន ១០០% និងគ្រប់ផ្នែកទាំងអស់ មានតម្រូវការខ្ពស់ ដូចកាលពីមិនទាន់មានកូវីដ-១៩៕ ទួន សុផល