ក្រុមគ្រូពេទ្យកម្ពុជា-អាមេរិក សហការពិនិត្យ ព្យាបាលជំងឺ វះកាត់មួយចំនួន រយៈពេល ៨ថ្ងៃ

មន្ទីរពេទ្យមិត្តភាពខ្មែរ-សូវៀត រួមសហប្រតិបត្តិការជាមួយក្រុមគ្រូពេទ្យមកពីសហរដ្ឋអាមេរិក (Surgeons for Cambodia) នឹងធ្វើការពិនិត្យ ពិគ្រោះ និងព្យាបាលជំងឺវះកាត់ពោះវៀន ឫសដូងបាត បូសអន្ទង់ វះកាត់ដុំពក ក មុខ មាត់ សម្ភព និងរោគស្រ្តី រយៈពេល ៨ថ្ងៃ។

នេះបើយោងតាម សេចក្ដីជូនដំណឹង ពីមន្ទីរពេទ្យមិត្តភាពខ្មែរសូវៀត ចុះនៅថ្ងៃទី ៣ ខែមករា ឆ្នាំ ២០២២ នេះ។

កម្មវិធីពិនិត្យ និងព្យាបាលជំងឺខាងលើនេះ នឹងដំណើរការចាប់ពីថ្ងៃទី ១៦ ដល់ថ្ងៃទី ២៣ ខែមករា ឆ្នាំ ២០២២ នេះតទៅ។

បើតាមវេជ្ជបណ្ឌិតប្រចាំនៅមន្ទីរពេទ្យ មិត្តភាពខ្មែរ សូវៀត បានឱ្យ “កម្ពុជាថ្មី” ដឹងនៅរសៀលថ្ងៃទី ៤ ខែមករា នេះថា ការពិនិត្យ ពិគ្រោះ និងព្យាបាលជំងឺវះកាត់ខាងលើ គឺគិតថ្លៃធម្មតាចំពោះប្រជាពលរដ្ឋទូទៅ លើកលែងសម្រាប់តែ ពលរដ្ឋដែលមានបណ្ណ ប.ស.ស (បេឡាជាតិសន្តិសុខសង្គម) ឬ បណ្ណក្រីក្រ។

គួរបញ្ជាក់ថា ទីតាំងនៅបន្ទប់ពិគ្រោះជំងឺក្រៅ នៃមន្ទីរពេទ្យ មិត្តភាពខ្មែរ-សូវៀត គឺពេលព្រឹក ចាប់ពីម៉ោង ៨ ដល់ម៉ោង ១១ និង ៣០ នាទី និង ពេលរសៀល ចាប់ពីម៉ោង ២ ដល់ម៉ោង ៥៕

អត្ថបទ៖ ច័ន្ទ វីរៈ