នាយករដ្ឋមន្រ្តីម៉ាឡេស៊ី គ្រោងមកបំពេញទស្សនកិច្ចផ្លូវការនៅកម្ពុជា នាថ្ងៃទី២៤ កុម្ភៈខាងមុខ

នៅក្នុងកិច្ចប្រជុំពេញអង្គគណៈរដ្ឋមន្ត្រី នាថ្ងៃទី ៤ ខែកុម្ភៈ ឆ្នាំ ២០២២នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា រាជរដ្ឋាភិបាលកម្ពុជា នឹងទទួលស្វាគមន៍នាយករដ្ឋមន្ត្រីម៉ាឡេស៊ី ដែលគ្រោងនឹងមកបំពេញទស្សនកិច្ចផ្លូវការ នៅព្រះរាជាណាចក្រកម្ពុជា នាថ្ងៃទី ២៤ខែកុម្ភៈ ឆ្នាំ២០២២ នេះ។

ជាមួយគ្នានេះ យោងតាមសេចក្ដីប្រកាសព័ត៌មាន ស្ដីពី លទ្ធផលកិច្ចប្រជុំពេញអង្គគណៈរដ្ឋមន្ត្រី ក៏ស្រង់ប្រសាសន៍ របស់សម្ដេចតេជោនាយករដ្ឋមន្ត្រីថា ព្រះរាជាណាចក្រកម្ពុជាក្នុង នាមជាប្រធានប្ដូរវេនអាស៊ានគាំទ្រ និងលើកទឹកចិត្តដល់បណ្ដាប្រទេស ជាសមាជិកអាស៊ាន ដើម្បីខិតខំជំរុញការអនុវត្តទស្សនាទានអាស៊ាន ស្ដីពី ឥណ្ឌូប៉ាស៊ីហ្វ៊ិក អាចចេញជាសកម្មភាពជាក់ស្ដែ ងព្រមទាំងបន្តខិតខំប្រឹងប្រែងទប់ស្កាត់ការរីករាលដាល នៃជំងឺកូវីដ-១៩ ជំរុញការបើកសេដ្ឋកិច្ចឡើងវិញ និងប្រកាន់ខ្ជាប់គោលការណ៍កុងសង់ស៊ីស របស់អាស៊ាន។

សម្តេចតេជោនាយករដ្ឋមន្រ្តី ក៏បានលើកឡើងដែរថា រាជរដ្ឋាភិបាលកម្ពុជា ថ្លែងអំណរគុណដល់បណ្ដាប្រទេសនានា ដែលតែងតែគាំទ្រព្រះរាជាណាចក្រកម្ពុជា ចំពោះការបំពេញតួនាទីស្នូល ក្នុងក្របខ័ណ្ឌអាស៊ាន ព្រមទាំងទទួលស្គាល់នូវអត្ថិភាពដ៏សំខាន់ របស់ព្រះរាជាណាចក្រកម្ពុជា ក្នុងសហគមន៍អាស៊ាន៕

អត្ថបទ៖ ណារី