ពលករខ្មែរពី៤ទៅ៥ពាន់នាក់បន្ថែមទៀត ត្រៀមបញ្ជូនទៅធ្វើការនៅថៃនៅក្នុងខែនេះ

កម្ពុជាគ្រោងនឹបញូជួនពលករ MOUប្រមាណពី៤ទៅ៥ពាន់នាក់បន្ថែមទៀតទៅធ្វើការនៅប្រទេសថៃ នៅខែមីនាឆ្នាំ២០២២​នេះ បន្ទាប់ពីបានបញ្ជួនជាង១ពាន់នាក់រួចហើយកាលពីខែកុម្ភៈកន្លងទៅ។

លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជា បានមានប្រសាសន៍នៅព្រឹកថ្ងៃទី០៣ ខែមីនានេះឱ្យដឹងថា សម្រាប់ខែមីនានេះ ភាគីថៃមានតម្រូវការពលករខ្មែរច្រើនអាចពី៤ទៅ៥ពាន់នាក់ ក្នុងនោះប្រមាណ៥០ភាគរយ
ទៅ​ធ្វើការលើវិស័យសំណង់។ ក្រៅពីនេះធ្វើទៅលើវិស័យសេវាកម្មចំណីអាហារ និងគ្រឿងកំប៉ុង។

លោកបានបន្តថា ចំនួននេះបើប្រៀបធៀបទៅនឹងខែមុនឃើញថា មានការកើនឡើងខណៈខែមុនបានបញ្ជូនទៅចំនួន​១១២០នាក់ ចែកជា៤លើកក្នុងនោះលើកទី១បានបញ្ជូនពលករចំនួន២២០នាក់កាលពីថ្ងៃទី១ ខែកុម្ភៈ ធ្វើការនៅរោងចក្រសាច់មាន់ លើកទី២ បញ្ជួន៤០០នាក់ ថ្ងៃទី១៥ ខែកុម្ភៈ លើកទី៣បញ្ជូន៣៥០នាក់ថ្ងៃទី២១ ខែកុម្ភៈ និងលើកទី៤​បញ្ជូន​២៥០នាក់ នៅថ្ងៃទី២៨ ខែកុម្ភៈ ដោយពួកគេទៅធ្វើការនៅរោងចក្រស៊ីភីទាំងអស់ ហើយពលករទាំងនោះទទទួលបានការយកចិត្តទុកដាក់យ៉ាងខ្លាំងពីភាគីថៃទាំងកន្លែងធ្វើចត្តាឡីស័ក និងការផ្តល់ម្ហូបអាហារ។

លោកបានបន្តទៀតថា កម្ពុជាបានចាប់ផ្តើមបញ្ជូនពលករទៅធ្វើការនៅប្រទេសថៃឡើងវិញនៅក្នុងខែកុម្ភៈ ឆ្នាំ២០២២នេះបន្ទាប់ពីប្រទេសថៃបានបើកទទួលពលករបរទេសឡើងវិញ ។ លោកបានបន្ថែមថា ក្នុងចំណោមពលករបរទេសមានតែពលករខ្មែរត្រូវបានភាគីថៃទទួលយកមុនគេដោយសារពលករកម្ពុជាបានចាក់វ៉ាក់សាំងបានគ្រប់ដូសរហូតដល់ដូស​ជំរុញ ឬដូសទី៣ដែលធ្វើឱ្យកម្រិតហានិភ័យនៃការឆ្លងជំងឺកូវីដ-១៩មានកម្រិតទាបបំផុត។

លោកបានបញ្ជាក់ទៀតថា ពលករខ្មែរដែលអាចទៅធ្វើការនៅប្រទេសថៃត្រូវមានលក្ខខណ្ឌមួយចំនួនដូចជា ត្រូវមានកាតចាក់វ៉ាក់សាំង ធ្វើតេស្តរកជំងឺកូវីដ-១៩ រយៈពេល៧២ម៉ោង តាមម៉ាស៊ីន PCR ឬតេស្តរហ័សដែលធ្វើដោយគ្រូពេទ្យជំនាញ​ដើម្បីបញ្ជាក់វិញ្ញាបនបត្រថាមិនមានឆ្លងជំងឺកូវីដ-១៩។ ពលករទាំងនោះត្រូវបញ្ជូនតាមច្រកព្រំដែនអន្តរជាតិប៉ោយប៉ែតទល់នឹងខេត្តស្រះកែវ។ ពេលទៅដល់ព្រំដែនពលករត្រូវធ្វើតេស្ត ហើយបើលទ្ធផលតេស្តអវិជ្ជមានត្រូវបន្ត​ធ្វើចត្តាឡី​ស័ក​រយៈពេល៧ថ្ងៃ និងថ្ងៃទី៧ត្រូវធ្វើតេស្តម្តងទៀត បើលទ្ធផលនៅអវិជ្ជមានទៀតទើបអនុញ្ញាតឱ្យទៅរោងចក្រធ្វើការតែ
ម្តង។ ក្នុងករណីមានវិជ្ជមានកូវីដ-១៩ ត្រូវបញ្ជូនទៅកន្លែងព្យាបាល ហើយរាល់កាចំណាយទៅលើការព្យាបាលជាបន្ទុករបស់និយោជកថៃទាំងស្រុង ។

យោងតាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជីវៈបានឱ្យដឹងថា បច្ចុប្បន្ននេះកម្ពុជាមានពលករកំពុងធ្វើការងារនៅប្រទេសថៃមានចំនួន ១ ២២០១៩៧នាក់៕

អត្ថបទ៖ សំអឿន