កូរ៉េខាងត្បូង នឹងជួយសាងសង់អគារថ្មីកម្ពស់៥ជាន់តម្លៃ១៦លានដុល្លារនៅក្នុងមន្ទីរពេទ្យកុមារជាតិ

រដ្ឋាភិបាលកូរ៉េខាងត្បូង តាមរយៈទីភ្នាក់ងារសហប្រតិបត្តិការអន្តរជាតិកូរ៉េ( កយកា-KOICA) គ្រោងនឹងសាងសង់អគារមន្ទីរពេទ្យថ្មីមួយដែលមានកម្ពស់៥ជាន់នៅក្នុងបរិវេណមន្ទីរពេទ្យកុមារជាតិ ដើម្បីជួយសម្រួលក្នុងការព្យាបាលជំងឺជូនដល់កុមារកាន់តែប្រសើរឡើងថែមទៀត។

ក្នុងឱកាសចុះត្រួតពិនិត្យសមិទ្ធផលនានារបស់រដ្ឋាភិបាលកូរ៉េនៅមន្ទីរពេទ្យកុមារជាតិនៅថ្ងៃទី២៩ មីនានេះជាមួយលោកស្រី បណ្ឌិត អ៊ីម ចុងហ៊ី អនុប្រធានទីភ្នាក់ងារសហប្រតិបត្តិការអន្តរជាតិកូរ៉េ ( កយកា-KOICA) លោក សាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិបានឲ្យដឹងថា អគារមន្ទីរពេទ្យថ្មីមួយទៀត មានកម្ពស់៥ជាន់ដែលមានទំហំជាង៨៣០០ម៉ែត្រការ៉េ ដោយចំណាយថវិកាប្រមាណ១៦លានដុល្លារដែលជាការចំណាយដ៏ធំជាងគេបំផុតនៅកម្ពុជាតាំងពីប្រទេសកម្ពុជាមានកិច្ចសហប្រតិបត្តិការជាមួយរដ្ឋាភិបាលកូរ៉េ។

លោកសាស្ត្រាចារ្យបានបន្តថា៖ «ឥឡូវនេះ គម្រោងនេះ យើងបានបញ្ចប់ការសិក្សាលំអិត និងបានអនុម័តថវិការួចរាល់ហើយដែរទៅមុខទៀតដល់ដំណាក់កាលគូប្លង់សាងសង់បន្ទាប់មកទៀតមានការដេញថ្លៃហើយតាមផែនការគ្រោងនឹងសាងសង់នៅដើមឆ្នាំ២០២៣ដោយប្រើការសាងសង់រយៈពេល៣ឆ្នាំ»។ បើតាមលោកសាស្ត្រាចារ្យ អគារថ្មីនេះ មានផ្នែកពិគ្រោះជំងឺក្រៅតាមឯកទេសនីមួយៗ មានអាហារដ្ឋាន កន្លែងក្មេងលេង និងមានបង្កើតសេវាថ្មីៗសម្រាប់កុមារដូចជា ជំងឺត្រចៀក ច្រមុះបំពង់ក ភ្នែក តម្រង់នោម ក្រពេញក្នុង ម៉ាស៊ីនលាងឈាមផ្នែកកុមារ ជំងឺមហារីកឈាម សួត ក្រពះពោះវៀន ម៉ាស៊ីនថតឆ្លុះក្រពះទងសួត និងជំងឺ អូទីសឹមជាដើម។

លោកសាស្ត្រាចារ្យបានបន្ថែមទៀតថា ក្នុងអគារថ្មីនោះ គឺអាចដាក់គ្រែបានចំនួន១៦៩គ្រែ និងមានកន្លែងសម្រាប់បណ្តុះបណ្តាល និងការអនុវត្តផ្ទាល់ដល់ក្រុមគ្រូពេទ្យផ្នែកជំនាញកុមារមកពីតាមបណ្តាខេត្តផ្សេងៗផងដែរ។ លោកសាស្ត្រាចារ្យបានបញ្ជាក់ថា នេះ គឺជាអគារទី២ហើយដែលរដ្ឋាភិបាលកូរ៉េជួយសាងសង់ដល់មន្ទីរពេទ្យកុមារជាតិខណៈអគារទី១កូរ៉េបានសាងសង់រួចរាល់និងបានដាក់្យដំណើរការរួចហើយដែលមានកម្ពស់៣ជាន់៕

ដោយ៖ សំអឿន