រដ្ឋមន្ត្រីការបរទេស​អាមេរិក​ ផ្ញើសារអបអរជូន​ប្រជាពលរដ្ឋខ្មែរ​ ក្នុងឱកាស​ពិធីបុណ្យ​​ចូលឆ្នាំថ្មី​ប្រពៃណីជាតិខ្មែរ​

រដ្ឋមន្ត្រីក្រសួងការបរទេសសហរដ្ឋអាមេរិក លោក Antony J. Blinken បានផ្ញើសារអបអរសាទរ ជូនប្រជាពលរដ្ឋកម្ពុជា ក្នុងឱកាសពិធីចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តទៅចាប់ពីថ្ងៃទី១៤ ដល់ទី១៦ ខែមេសា ខាងមុខ នេះបើតាមលិខិតចុះថ្ងៃទី១២ ខែមេសា ឆ្នាំ២០២២ ដែលទើបទទួលបាននៅថ្ងៃនេះ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងលិខិតនោះ លោក Antony J. Blinken បានមានប្រសាសន៍ថា “ក្នុងនាមសហរដ្ឋអាមេរិក និងខ្លួនខ្ញុំផ្ទាល់ សូមគោរពជូនពរដល់ប្រជាជនកម្ពុជា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ”។

លោករដ្ឋមន្ត្រីការបរទេស បានបន្ថែមថា “នៅពេលដែលប្រជាជនកម្ពុជាកំពុងជួបជុំគ្នាដើម្បីនឹងអបអរពិធីបុណ្យប្រពៃណីជាតិនេះ សហរដ្ឋអាមេរិកបាននឹកទៅដល់វប្បធម៌ដ៏សម្បូរបែប និងរស់រវើករបស់កម្ពុជា។ យើងមានកិត្តិយសក្នុងការបន្តកសាងទំនាក់ទំនងវប្បធម៌ដ៏រឹងមាំរវាងសហរដ្ឋអាមេរិក និងព្រះរាជាណាចក្រកម្ពុជា ហើយយើងទន្ទឹងរង់ចាំការជំរុញទំនាក់ទំនងរបស់យើងបន្ថែមទៀតដើម្បីកសាងប្រទេសកម្ពុជាឱ្យកាន់តែរីកចម្រើន ប្រជាធិបតេយ្យ និងឯករាជ្យ”។

ជាមួយគ្នានេះ លោកក៏បានប្រសិទ្ធពរជ័យជូនដល់ ប្រជាជនកម្ពុជាទាំងអស់ ឱ្យទទួលបាននូវសេចក្តីសុខ សេចក្តីចម្រើន និងសុខភាពល្អក្នុងឆ្នាំថ្មី៕

អត្ថបទ៖ កោះកែវ