មន្ទីរ​សាធារណការជួសជុល​ពង្រីក​ផ្លូវជាតិ​លេខ​ ៥៣​ប្រវែង​ជាង ២ គីឡូម៉ែត្រ​ឱ្យរួចរាល់ក្នុងឆ្នាំនេះ

មន្ទីរសារធារណការខេត្តកំពង់ឆ្នាំងកំពុងជួសជុល ផ្លូវជាតិ​លេខ​ ៥៣ ប្រវែងជាង ២ពាន់ម៉ែត្រ​ ស្ថិតនៅក្នុងឃុំស្រែថ្មី​ ស្រុករលាប្អៀរ តាមផែនការ​និង​ត្រូវ​ធ្វើឱ្យរួចរាល់​នៅក្នុងឆ្នាំ​ ២០២២ នេះ។

​ការជួសជុលនេះ​តម្រូវឲ្យ​ប្រជា​ពលរដ្ឋរស់​នៅ​តាម​ដងផ្លូវ​នេះជួយ​សហការ​ដាក់លូ​បង្ហូរទឹក​នៅតាមមុខផ្ទះរៀងៗខ្លួន​ ដើម្បី​ឲ្យផែន​ការជួសជុល​ទទួលបាន​ជោគជ័យ​។

ប្រជាពលរដ្ឋជាស្ត្រី ឈ្មោះ សុខ ដាវី រស់នៅតាមដងផ្លូវនេះបាននិយាយឲ្យដឹងថា ​ថ្មីៗកន្លងទៅនេះខាងមន្ទីរ​សាធារណការ​ខេត្តបាន​កោះហៅប្រជាពលរដ្ឋទៅប្រជុំផ្សព្វផ្សាយថា ស្របពេលដែលផ្លូវជាតិលេខ ៥៣ នៅចំណុចភូមិ​ត្រោក​លិច និងភូមិសន្ទូច ឃុំស្រែថ្មីកំពុងជួសជុលឲ្យធំទូលាយនេះ ប្រជាពលរដ្ឋដែលរស់ នៅតាម​បណ្ដោយ​ផ្លូវជាតិលេខ ៥៣ ត្រូវសហការជួយដាក់លូបង្ហូរទឹកនៅតាមដីលំនៅឋានរៀងៗខ្លួន ដើម្បី​ឱ្យ​គម្រោងការជួសជុលនិងពង្រីកផ្លូវជាតិនៅចំណុចនេះទទួលបានជោគជ័យតាមផែនការ។

​ស្ត្រីខាងលើ​បានបញ្ជាក់ឲ្យដឹងទៀតថា​ ចំពោះរូបគាត់ការដាក់លូ​នៅតាមដីលំនៅដ្ឋាន​ជាប់នឹងផ្លូវ ជាតិ​នេះបានចំណាយអស់ជាង ២ លានរៀល ដោយត្រូវទិញជាច្រើន​កង់ដោយក្នុងមួយ​កង់ៗមាន​មុខកាត់ ៨ តឹក ប្រវែង១ម៉ែត្រ មានតម្លៃ ១១ ម៉ឺនរៀល។ ​

ចំណែកការ​ជីកប្រឡាយ​ដាក់លូ​ ការ​ស្ទូច​លូដាក់ក្នុងប្រឡាយ​ និងការចាក់​ដីលុបលើ​លូលូដែលបានដាក់រួចហើយនោះ​ គឺខាងមន្ទីរសាធា រណៈ​ការខេត្តជាអ្នកជួយធ្វើដោយមិនគិតប្រាក់នោះឡើយ​។ ដោយប្រជាពលរដ្ឋ​ជាម្ចាស់ដី​តាមលំនៅដ្ឋាន​ គឺជាអ្នកទិញលូ​ដោយខ្លួនឯង​ និងជួល​ជាងបិទ​លូភ្ជាប់​គ្នាដោយខ្លួនឯង​តែប៉ុណ្ណោះ។

​ប្រជាពលរដ្ឋខាងលើបាន​បន្តថា​សម្រាប់រូបគាត់ការ​សហការជួយដាក់លូ​នៅតាមមុខផ្ទះនិង​ដីលំ​នៅដ្ឋាន​ខាងលើនេះគឺគាត់ពេញចិត្ត​នឹងជួយរដ្ឋព្រោះថា​គាត់បានផ្លូវកៅស៊ូធំល្អស្អាត​នៅមុខផ្ទះដូច្នេះ​គ្មានអ្វី​ជាបញ្ហាចំពោះការសហការដាក់លូនៅតាមមុខផ្ទះខាងលើនេះឡើយ។

ទាក់ទងនឹងករណីខាងលើនេះដែរលោក ឆាយ លាភា ប្រធានមន្ទីរសាធារណការនិងដឹកជញ្ជូន​ខេត្ត​កំពង់ឆ្នាំង​បាននិយាយតាមទូរស័ព្ទឱ្យដឹងថា តាមគម្រោងការជួសជុលផ្លូវកៅស៊ូលេខ៥៣​ខាង​លើនេះ​គឺមានទទឹង ៨ ម៉ែត្រ និងបណ្តោយជាង ២ ពាន់ម៉ែត្រ ហើយបានធំទូ លាយដើម្បីជួយ​សម្រួលដល់ការធ្វើចរាចរណ៍របស់ប្រជាពលរដ្ឋ ស្របតាមការអភិវឌ្ឍលើគ្រប់វិស័យរបស់ជាតិ ហើយផ្លូវនៅចំណុចនេះនឹងត្រូវជួសជុលឲ្យរួចរាល់នៅក្នុងឆ្នាំ ២០២២នេះ។

ដោយឡែកការដាក់លូនៅតាមមុខផ្ទះ និងនៅតាមដីលំ នៅឋាន គឺជាភារកិច្ចរបស់ប្រជាពល រដ្ឋជាម្ចាស់ផ្ទះនិងម្ចាស់ដីនីមួយៗ។ ចំពោះប្រជាពលរដ្ឋក្រីក្រខ្វះខាតជីវ ភាពនោះអាជ្ញាធរភូមិ​ឃុំនិងមន្ទីរសាធារណការខេត្ត នឹងសិក្សាដើម្បីជួយគាត់។ ក្នុងនោះដែរចំពោះការដាក់លូនៅតាមមុខសាលារៀនសាលាបុណ្យ ឬតាមផ្លូវលំឆ្លងក្នុងភូមិ គឺមន្ទីរ​សាធារណៈការខេត្តនិងសិក្សាជាមួយអាជ្ញាធរភូមិ ឃុំ សម្របសម្រួលគ្នាដើម្បី​ដោះស្រាយ​ជាមួយ​សហគមន៍នៅក្នុងមូលដ្ឋាន។

មន្ទីរសាធារណការខេត្តកំពង់ឆ្នាំងក៏សូមអំពាវនាវផងដែរដល់ប្រជាពលរដ្ឋដែលជាអ្នកប្រើប្រាស់​ផ្លូវទាំងអស់សូមមេត្តាជួយសហការ និងផ្ដល់ការយោគយល់អធ្យាស្រ័យ ក្នុងពេលកំពុងជួសជុល​ពង្រីកផ្លូវខាងលើនេះដែលអាចនឹងមានការចាក់ដីហុយនិងកកស្ទះចរាចរណ៍ជាដើម៕

​អត្ថបទ៖ ឈៀងថារិទ្ធ