ផ្ទុះមីនតោនមួយគ្រាប់ឆក់យកជីវិតអ្នកធ្វើចម្ការម្នាក់នៅខេត្តឧត្តរមានជ័យ

យុទ្ធភណ្ឌមិនទាន់ផ្ទុះកប់ក្រោមដីនាសម័យសង្គ្រាម នៅក្នុងស្រុកអន្លង់វែង នៅតែបន្តរយាយីដល់អាយុជីវិតរបស់ពលរដ្ឋនិងទ្រព្យសម្បិត្តជារឿយៗ និងជារាងរាល់ឆ្នាំ។

ជាក់ស្ដែងនៅវេលាម៉ោង១១និង៣០នាទីថ្ងៃទី២២ ខែមេសា ឆ្នាំ២០២២ មានករណីត្រាក់ទ័រមួយគ្រឿងបានបើកភ្ជួរដីចម្ការដោយបុរសម្នាក់បានជាន់មីនតោនមួយគ្រាប់បណ្ដាលអោយផ្ទុះនៅចំណុច ភូមិស្វាយចេក ឃុំថ្លាត ស្រុកអន្លង់វែង ខេត្តឧត្តរមានជ័យ។

អ្នកបើកបរត្រាក់ទ័រជាន់មីនតោនត្រូវបានគេស្គាល់ឈ្មោះ ឈៀក លី ភេទប្រុស អាយុ៣០ឆ្នាំ មុខរបរធ្វើស្រែរស់នៅ ភូមិផ្តៀកជ្រុំ ឃុំថ្លាត ស្រុកអន្លង់វែង ខេត្តឧត្តរមានជ័យ បានរងរបួសធ្ងន់ដាច់ដៃខាងធ្វេង និងធ្វើសង្គ្រោះបន្ទាន់បញ្ជូនដល់មន្ទីរពេទ្យបង្អែកស្រុកអន្លង់វែង បានដាច់ខ្យល់ស្លាប់។ ដោយឡែក ត្រាក់ទ័របានរងការខូចខាតស្ទើទាំងស្រុង ដាច់កង់ខាងក្រោយ ផ្នែកខាងឆ្វេង។
បច្ចុប្បន្ន សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកត្រាក់ទ័ររក្សាទុកនៅកន្លែងកើតហេតុ៕

អត្ថបទ៖ ចាន់ ធី