Connect with us

ព័ត៌មានជាតិ

សម្តេចតេជោ ណែនាំឲ្យយកចិត្តទុកដាក់បន្ថែមលើវិស័យសេដ្ឋកិច្ច និងពាណិជ្ជកម្មរវាងកម្ពុជា-វៀតណាម

បានផុស

នៅ

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បា​នណែនាំឲ្យយកចិត្តទុកដាក់បន្ថែមទៀត ក្នុងការជំរុញកិច្ចសហប្រតិបត្តិការរវាងកម្ពុជា-វៀតណាម លើវិស័យសេដ្ឋកិច្ច និងពាណិជ្ជកម្ម ទោះបីទំហំពាណិជ្ជកម្មប្រទេសទាំងពីរ បានលើសផែន​ការគ្រោងទុកក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោនាយករដ្ឋមន្រ្តី បានណែនាំបែបនេះ គឺនៅក្នុងឱកាសអនុញ្ញាតឲ្យលោក ឌិញ ទៀន ហ្ស៊ង សមាជិកការិយាល័យនយោបាយបក្សកុម្មុយនិស្តវៀតណាម និងជាលេខាបក្សកុម្មុយនិស្តវៀតណាមប្រចាំក្រុងហាណូយ ចូលជួបសម្តែងការគួរសម និងពិភាក្សាការងារ នៅព្រឹកថ្ងៃទី ២៧ ខែមេសា ឆ្នាំ២០២២នេះ។

សម្តេចតេជោ ហ៊ុន សែន មានប្រសាសន៍ថា ទោះបីទំហំពាណិជ្ជកម្មប្រទេសទាំងពីរ បានលើសផែន​ការគ្រោងទុក តែប្រទេសទាំងពីរត្រូវយកចិត្តទុកដាក់ ក្នុងការជំរុញកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្មបន្ថែមទៀត ដោយខិតខំកែប្រែតំបន់ ដែលធ្លាប់ជាតំបន់ប្រយុទ្ធគ្នាឲ្យទៅជាតំបន់អភិវឌ្ឍន៍ តំបន់សេដ្ឋកិច្ចពិសេស និងការដោះដូរពាណិជ្ជកម្ម។ ជាមួយគ្នានេះសម្តេចតេជោ ក៏បានជំរុញឲ្យភាគីវៀតណាម ពិនិត្យមើលអ្វីដែលរដ្ឋធានីហាណូយ និងរាជធានីភ្នំពេញ អាចធ្វើបានរួមគ្នាបន្តទៀត។

នៅក្នុងជំនួបនោះលោក ឌិញ ទៀន ហ្ស៊ង បានថ្លែងអំណរគុណចំពោះសម្ដេចតេជោ ដែលបានចំណាយពេលវេលាដ៏មមាញឹកអនុញ្ញាតឲ្យលោក និងប្រតិភូបានចូលជួបសម្ដែងការគួរសម។ លោក ឌិញ ទៀនហ្ស៊ង បានវាយតម្លៃខ្ពស់ចំពោះវិធានការទប់ស្កាត់ជំងឺកូវីដ-១៩ របស់កម្ពុជា ហើយក៏បានគោរពរាយការណ៍ជូនសម្ដេចតេជោ អំពីស្ថានភាពកូវីដ -១៩ នៅរដ្ឋធានីហាណូយ ជាមួយស្ថានភាពសេដ្ឋកិច្ច ទិសដៅអភិវឌ្ឍន៍រដ្ឋធានីហាណូយ និងការប្ដេជ្ញាចិត្តពង្រឹងពង្រីកកិច្ចសហប្រតិបត្តិការ រវាងរដ្ឋធានីហាណូយ និងរាជធានីភ្នំពេញ ព្រមទាំងពង្រីកពង្រឹងមិត្តភាព និងការអនុវត្តឲ្យទទួលបានជោគជ័យលើរាល់សេចក្តីថ្លែងការណ៍ កិច្ចព្រមព្រៀង និងរាល់សេចក្ដីសម្រេចទាំងឡាយ របស់ថ្នាក់ដឹកនាំនៃប្រទេសទាំងពីរ៕

អត្ថបទ៖ ណារី

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម