ព័ត៌មានជាតិ

សម្តេចតេជោ ហ៊ុន សែន៖ គ្មានអ្នកណាមានលទ្ធភាពគ្រប់គ្រាន់ ដើម្បីដណ្ដើមយកចិត្តមនុស្សបាន១០០%នោះទេ សូម្បីតែសាសនា

បានផុស

៤ years មុន

នៅ

ថ្ងៃព្រហស្បតិ៍ ១២ ឧសភា ២០២២

ដោយ

សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសាសន៍ថា មិនមានអ្នកណាម្នាក់មានលទ្ធភាពគ្រប់គ្រាន់ដើម្បីយកចិត្តមនុស្សបាន ១០០%នោះទេ សូម្បីតែសាសនា។

ថ្លែងក្នុងពិធីជួបសំណេះសំណាលជាមួយប្រជាពលរដ្ឋខ្មែររស់នៅសហរដ្ឋអាមេរិក និងកាណាដា ប្រមាណជាង២ពាន់នាក់ នៅវេលាម៉ោងប្រមាណ៤ ព្រឹកថ្ងៃទី១២ ខែឧសភា ម៉ោងនៅកម្ពុជា ត្រូវនឹងម៉ោង១៧ និង០០ នាទីថ្ងៃទី១១ ខែឧសភា ម៉ោងនៅសហរដ្ឋអាមេរិកសម្តេចបានមានប្រសាសន៍យ៉ាងនេះថា “នៅលើលោកនេះ គ្មានអ្នកណាមានលទ្ធភាពគ្រប់គ្រាន់ ដើម្បីនឹងដណ្ដើមយកចិត្តមនុស្សមួយរយភាគរយនោះទេ សូម្បីតែព្រះពុទ្ធសាសនា ឬសាសនាដទៃ គ្មានសាសនាណាមួយយកចិត្តមនុស្សបានទាំងអស់នោះទេ”។

បើតាមសម្ដេចតេជោ ហ៊ុន សែន បច្ចុប្បន្ននៅលើពិភពលោកនេះមានសាសនាធំៗរហូតដល់ទៅ៤ ហើយសាសនាដេលមានអ្នកកាន់ច្រើនជាងគេ គឺគ្រឹស្តសាសនា បន្ទាប់មកអ៊ីស្លាមសាសនា បន្ទាប់មកហិណ្ឌូសាសនា ហើយព្រះពុទ្ធសាសនា ជាសាសនាទី៤។ ជាមួយគ្នានោះក៏មានសាសនាតូចផ្សេងៗទៀតដែរ ហើយសាសនាទាំងអស់សុទ្ធតែមានការបែងចែកជានិកាយ ដែលនេះ គឺជាដំណើរធម្មជាតិរបស់វា ហើយនេះក៏ជាផ្នែកមួយនៃដំណើរប្រជាធិបតេយ្យរបស់ប្រទេសផងដែរ ដូច្នេះសម្តេចមិនឆ្ងល់ទេ រឿងមានអ្នកគាំទ្រ មានអ្នកប្រឆាំង។

សម្តេចនាយករដ្ឋមន្រ្តីបញ្ជាក់ទៀតថា សម្តេចធ្លាប់បានស្ដាប់កាលពីលោក អ៊ំ ម៉ានណារិន កាលនៅរស់បាននិយាយថា “ក្មួយ ! កាលណាធ្វើនយោបាយវាមិនខុសពីការដែលដើរកាត់ទឹកភ្លៀងទេ ដូច្នេះការធ្វើនយោបាយក៏ដូចគ្នាដែរ បើដើរកាត់ទឹកភ្លៀងហើយ គ្មានទទឹកភ្លៀង ទើបហៅថាគ្មានសត្រូវ ។

ទោះជាយ៉ាងណា សម្តេចតេជោ ហ៊ុន សែន ការមកជួបជុំគ្នារបស់ប្រជាពលរដ្ឋ ដើម្បីជួបសម្តេចនេះ គឺជាការបង្ហាញនូវទឹកចិត្តគាំទ្រមួយ ដែលសម្ដេចត្រូវតែថ្លែងអំណរគុណនៅចំពោះទឹកចិត្តនេះ បើទោះបីជាពួកគាត់គេចចេញពីប្រទេសកម្ពុជាតាមរបៀបណាក៏ដោយ ក៏បង្ហាញនូវទឹកចិត្តសម្រាប់ការគាំទ្រ ដើម្បីការរស់នៅដោយសុវត្ថិភាពនៅក្រៅប្រទេស៕

អត្ថបទ៖ កោះកែវ