មានបណ្ដឹងចំនួន២ នៅក្នុងដំណើរការបោះឆ្នោត ឃុំ សង្កាត់ តែមិនទាន់ចេញជាផ្លូវការ

លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងថា រហូតដល់ពេលនេះ បណ្ដឹងទាក់ទងទៅនឹងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលប្រព្រឹត្តទៅនាថ្ងៃអាទិត្យ ទី០៥ ខែមិថុនា ឆ្នាំ២០២២នេះ ជាទូទៅមិនទាន់ទទួលបានព័ត៌មានជាផ្លូវការនៅឡើយទេ។ តែបើតាមលោកទទួលបាន គឺមានបណ្ដឹងចំនួន២ ប៉ុន្តែមិនទាន់ចេញជាផ្លូវការ ដែលក្នុងការិយាល័យមួយនោះ មនុស្សម្នាក់បានប្ដឹងចំនួន២ ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក ប្រាជ្ញ ចន្ទ នៅក្នុងកិច្ចប្រជុំបូកសរុបលទ្ធផល នៃដំណើរការឃោសនាបោះឆ្នោត និងការប្រកាសលទ្ធផលបឋម នៃដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី០៥ ឆ្នាំ២០២ នាល្ងាចថ្ងៃទី០៥ ខែមិថុនា នេះ។

បើតាមលោក ប្រាជ្ញ ចន្ទ ដំណើរការបោះឆ្នោត ជ្រើសរើសក្រុមប្រឹក្សាឃុំសង្កាត់អាណត្តិទី០៥ ដែលប្រព្រឹត្តទៅរយៈពេលពេញមួយថ្ងៃនាថ្ងៃអាទិត្យទី០៥ ខែមិថុនានេះ បានប្រព្រឹត្តទៅដោយជោគជ័យ ក្នុងបរិយាកាសស្ងប់ស្ងាត់មានសន្តិសុខសុវត្ថភាព និងសណ្ដាប់ធ្នាប់សាធារណៈ គ្មានអំពើហិង្សា និងគ្មានការគំរាមកំហែងឡើយ បើទោះបីជាមានបែកធ្លាយអំពីផែនការអុកឡុកដំណើការបោះឆ្នោតនេះក៏ដោយ៕

អត្ថបទ៖ កោះកែវ