រដ្ឋាករទឹកស្អាតខេត្តស្ទឹងត្រែង ស្នើឱ្យពលរដ្ឋមកដាក់ពាក្យស្នើសុំតទឹកបណ្តាញថ្មី

អង្គភាពរដ្ឋាករផ្គត់ផ្គង់ទឹកស្អាតខេត្តស្ទឹងត្រែង បានអំពាវនាវទៅប្រជាពលរដ្ឋជាអតិថិជនប្រើប្រាស់ទឹកបណ្តាញទឹកស្អាតដែលមិនទាន់បានដាក់ពាក្យស្នើសុំ សូមរួសរាន់មកដាក់ពាក្យស្មើសុំនៅអង្គភាពរដ្ឋាករទឹកដើម្បីក្រុមការងារតភ្ជាប់បណ្តាញទឹកថ្មីបានប្រើប្រាស់។

លោក ចាន់ ប៊ុនគង់ ប្រធានរដ្ឋាករទឹកស្អាតបានបញ្ជាក់ថា គិតមកដល់ថ្ងៃទី១៤ ខែមិថុនា នេះមានបងប្អូនប្រជាពលរដ្ឋ​មកដាក់ពាក្យស្នើសុំបាន៨៥%ហើយ ។ ហើយក្រុមកាងារបានចុះទៅតបណ្តាញថ្មីជូនរួចរាល់ហើយដែរ និងនៅសល់ប្រមាណតែជាង១០%ទៀត នៅមានភាពយឺតយ៉ាវមិនបានមកដាក់ពាក្យស្នើសុំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសំណូមពរឲ្យបងប្អូនប្រជាពលរដ្ឋដែលបានប្រើប្រាស់ទឹកស្អាតបណ្ដាញចាស់ សូមអញ្ជើញរួសរាន់មកដាក់ពាក្យដើម្បីឱ្យក្រុមការងារតភ្ជាប់បណ្តាញទឹកថ្មីជូន ព្រោះអង្គភាពរដ្ឋាករទឹកត្រូវបិទបណ្ដាញចាស់ហើយ ដោយមានការដូរបណ្ដាញថ្មីទាំងស្រុង ហើយយើងពង្រីកទៅគ្រប់ទីកន្លែងនៅក្នុងខេត្ត ដូចនេះសូមបងប្អូនប្រជាពលរដ្ឋជួយក្នុងការការពារបណ្ដាញយើងទាំងអស់គ្នា ចៀសវាងការជីកប៉ះលិចធ្លាយដោយមិនបានផ្ដល់ព័ត៌មានមកអង្គភាពរដ្ឋាករទឹកធ្វើឲ្យខាតបង់ថវិការបស់យើងទាំងអស់គ្នា អញ្ចឹងសូមប្រជាពលរដ្ឋចូលរួមទាំងអស់គ្នា។

លោក សាន លី ប្រជាពលរដ្ឋនៅក្រុងស្ទឹងត្រែង បានបញ្ជាក់ថា នេះជាសមិទ្ធផលថ្មី ព្រោះប្រជាពលរដ្ឋនៅក្នុងខេត្តមានទឹកស្អាតប្រើប្រាស់ហើយ និងបានលើកកម្ពស់ផ្នែកសុខភាពរស់នៅផងដែរ។

លោកបន្ថែមថា តាមការឱ្យដឹងពីក្រុមការងាររដ្ឋាករទឹកស្អាតទីប្រជុំជនបានបញ្ជាក់ថា មន្ត្រីជំនាញកំពុងរៀបចំពន្លឿនការ​តបណ្តញទឹកចូលផ្ទះប្រជាពលរដ្ឋជូនអតិថិជនចាស់ឱ្យរួចរាល់ ទើបឈានទៅតជូនអតិថិជនថ្មីឱ្យបានប្រើប្រាស់ដូចគ្នា ។

សូមបញ្ជាក់ថា ការតបណ្តាញចែកចាយទឹកស្អាតមន្ត្រីរដ្ឋាករទឹកតភ្ជាប់ជូនអតិថិជនចាស់ប្រើប្រាស់បាន២.៨៩៩គ្រួសារហើយ ចំណែកអ្នកមិនបានមកដាក់ពាក្យស្មើសុំមន្ត្រីរដ្ឋករទឹកមិនអាចតភ្ជាប់ឱ្យប្រើប្រាស់បានទេ ដូចនេះសូមអញ្ចើញមកដាក់ពាក្យឱ្យបានរុះរាន់ ព្រោះបញ្តាញទឹកចាស់ត្រូវបិទបញ្ឈប់ប្រើប្រាស់ ដើម្បីឱ្យបងប្អូនងាកមកប្រើទឹកស្អាតសុខភាពថ្មីវិញ៕

អត្ថបទ៖ ងិនលីម